၂၀၂၅ ခုနှစ် တက္ကသိုလ်ဝင်စာမေးပွဲအောင်မြင်သူများသည် ကျန်းမာရေးလူ့စွမ်းအားအရင်းအမြစ်ဦးစီးဌာနအောက်ရှိ ဆေးတက္ကသိုလ်များ၊ သွားဘက်ဆိုင်ရာဆေးတက္ကသိုလ်နှင့် ဆေးပညာနှီးနွယ်တက္ကသိုလ်တစ်ခုခုသို့ ဦးစားပေးလျှောက်ထားနိုင်ပြီဖြစ်ကြောင်း အသိပေးထားသည်။
ဆေးဝါးတက္ကသိုလ်များ၊ ဆေးဘက်ဆိုင်ရာနည်းပညာတက္ကသိုလ်များ၊ သူနာပြုတက္ကသိုလ်များနှင့် အခြေခံကျန်းမာ ရေးတက္ကသိုလ်သို့ ပထမဦးစားပေးလျှောက်ထားလိုသူများသည် တက္ကသိုလ်ဝင်ခွင့် လျှောက်လွှာစာအိတ်ကို ပညာရေးဝန်ကြီးဌာနအောက်ရှိ လျှောက်လွှာတင်သွင်းရန် သတ်မှတ်ထားသောတက္ကသိုလ်များသို့ ပေးပို့လျှောက်ထားရမည်လည်း ဖြစ်သည်။
ဆေးတက္ကသိုလ်နှင့် သွားဘက်ဆိုင်ရာဆေးတက္ကသိုလ်များသို့ ပထမဦးစားပေးလျှောက်ထားလိုသူများသည် တက္ကသိုလ်ဝင်ခွင့်လျှောက်လွှာများကို ဆေးတက္ကသိုလ်(၁)ရန်ကုန်၊ ဆေးတက္ကသိုလ်(၂)ရန်ကုန်၊ ဆေးတက္ကသိုလ် မန္တလေး၊ မကွေး၊ တောင်ကြီး ၊ သွားဘက်ဆိုင်ရာ ဆေးတက္ကသိုလ်(ရန်ကုန်)၊ (မန္တလေး)တို့ကို တိုက်ရိုက်ပေးပို့ လျှောက်ထားရမည်ဟု သိရသည်။
ဆေးတက္ကသိုလ်များ၊ သွားဘက်ဆိုင်ရာ ဆေးတက္ကသိုလ်နှင့် ဆေးပညာနှီးနွယ် တက္ကသိုလ်များ၏ ဝင်ခွင့်ရွေးချယ်ရေးကိုလည်း တက္ကသိုလ်ဝင်ခွင့် လမ်းညွှန်စာအုပ်တွင် ဖော်ပြထားသည့်အတိုင်း ရွေးချယ်မည်ဖြစ်သဖြင့် ယင်းစာအုပ်ကို သေချာစွာ ဖတ်ရှုပြီးမှသာ စက်တင်ဘာ (၂)ရက်မှ စက်တင်ဘာ (၁၉)ရက်အထိ ပိတ်ရက်မရှိ လက်ခံပေးမည်ဖြစ်ကြောင်းလည်း သိရသည်။