ဖေဖေါ်ဝါရီ (၉) ရက် ညပိုင်းက နေပြည်တော်ရှိ MICC (1) တွင် ကျင်းပသည့် မြန်မာ့ရုပ်ရှင်ထူးချွန်ဆု ပေးအပ်ချီးမြှင့်ခြင်း အခမ်းအနားတွင် ရုပ်ရှင်တစ်သတ်တာဆု (၄)ဆုအပါအဝင် အကယ်ဒမီဆု စုစုပေါင်း (၁၅) ခုကို ချီးမြှင့်ပေး အပ်ခဲ့သည်။
ယမန်နေ့ည ကျင်းပသည့် မြန်မာ့ရုပ်ရှင် ထူးချွန်ဆု ချီးမြှင့်ပွဲတွင် ၂၀၂၄ ခုနှစ်အတွက် ရုပ်ရှင်တစ်သက်တာဆု (၄) ဆုချီးမြှင့်ရာတွင် ဦးကြည်စိုး၊ ဒါရိုက်တာ ဦးနှင်းမိုး၊ အကယ်ဒမီများရှင် ဝါဝါဝင်းရွှေ၊ အကယ်ဒမီ ခင်သန်းနု ရရှိခဲ့သည်။
ထို့နောက် အကယ်ဒမီဆုများ ပေးအပ်ချီးမြှင့်ရာတွင် ၂၀၂၄ ခုနှစ်အတွက် ရုပ်ရှင်ဓာတ်ပုံဆုကို ကောင်းဇံ က “ချစ်သူသာပန်းတစ်ပွင့်ဖြစ်ခဲ့ရင်” ဇာတ်ကားဖြင့်လည်းကောင်း၊ အကောင်းဆုံး ရုပ်ရှင်နောက်ခံ တေးဂီတဆုကို ဓိရာမိုရ်က “အိမ်မက်ကာရန်” ဇာတ်ကားဖြင့်လည်းကောင်း ၊ အကောင်းဆုံး အသံဆုကို အောင်မျိုးမြတ်နှင့် ရဲဝင်းတို့က ” မီး “ဇာတ် ကားဖြင့်လည်းကောင်းရရှိခဲ့သည်။
အလားတူ ၂၀၂၄ ခုနှစ်အတွက် အကောင်းဆုံး ရုပ်ရှင် ဇာတ်ညွှန်းဆုကို အေးသီရိကိုက ” တိမ်ပန်းချီ “ဇာတ်ကားဖြင့်လည်းကောင်း၊ ရုပ်ရှင်ဇာတ်ကားဆုကို ” ချစ်သူသာပန်းတစ်ပွင့်ရခဲ့ရင် ” ဇာတ်ကားမှလည်းကောင်း ရရှိခဲ့သည်။
ထို့ပြင် ရုပ်ရှင်အထူးဆုအနေဖြင့် မိတ်ကပ်ပညာရှင် လုံလုံ (လင်္ကာဒီပ) ကရရှိခဲ့သည်။
ဆက်လက်၍ အကောင်းဆုံး ရုပ်ရှင်ဒါရိုက်တာဆုကို ပေးအပ်ရာတွင် ဒါရိုက်တာ ဝင်းလွင်ထက်က “အိပ်မက်ကာရန်” ဇာတ်ကားဖြင့် ရရှိခဲ့သည်။
ထို့ပြင် ၂၀၂၄ ခုနှစ်အတွက် အကောင်းဆုံး အမျိုးသမီးဇာတ်ပို့ဆုကို ခြူးလေးက “ဘိုးတော်ကင်း”ဇာတ်ကားဖြင့် လည်းကောင်း ၊ ၂၀၂၄ ခုနှစ်အတွက် အကောင်းဆုံး အမျိုးသားဇာတ်ပို့ဆုကို အေးချမ်းမောင်က “မီး”ဇာတ်ကားဖြင့်လည်းကောင်း ရရှိခဲ့ကြသည်။
၂၀၂၄ ခုနှစ်အတွက် အကောင်းဆုံး အမျိုးသမီး ဇာတ်ဆောင်ဆုကို အကယ်ဒမီ ဝတ်မှုံရွှေရည်က “တိမ်ပန်းချီ ” ဇာတ်ကားနှင့် အကောင်းဆုံး အမျိုးသားဇာတ်ဆောင်ဆုကို နေတိုးက “နှောင်” ဇာတ်ကားတို့ဖြင့် ရရှိခဲ့ကြသည်။
ထို့ပြင် ၂၀၂၄ ခုနှစ်အတွက် မြန်မာ့ရုပ်ရှင်ထူးချွန်ဆုချီးမြှင့်ပွဲတက်ရောက်လာသူများအနက် အကောင်းဆုံးဝတ်စားဆင်ယင်မှုဆုများလည်း ချီးမြှင့်ခဲ့ရာ အကောင်းဆုံးအမျိုးသား ဝတ်စားဆင်ယင်မှု အကြီးတန်းဆုကို အကယ်ဒမီများရှင် ရန်အောင်၊ အကောင်းဆုံး အမျိုးသမီး ဝတ်စားဆင်ယင်မှု အကြီးတန်းဆုကို အကယ်ဒမီ စိုးမိုးကြည်၊ အကောင်းဆုံး အမျိုးသားဝတ်စားဆင်ယင်မှုဆုကို ထက်အောင်ရှိုင်းနှင့် အကောင်းဆုံးအမျိုးသမီး ဝတ်စားဆင်ယင်မှုဆုကို နန်းဆုရတီစိုးတို့က ရရှိခဲ့ကြသည်။