မြန်မာနိုင်ငံအတွင်း အွန်လိုင်းလိမ်လည်မှုများ (Digital Fraud) ကို နားလည်ရှောင်ရှားနိုင်ရန်နှင့် လူငယ်များအကြား မီဒီယာနှင့်သတင်းအချက်အလက်ဆိုင်ရာ သိနားလည်မှုစွမ်းရည် (Media Literacy) မြှင့်တင်ပေးနိုင်ရန် ရည်ရွယ်သည့် “Freedom 250: မြန်မာနိုင်ငံတွင်း အွန်လိုင်း လိမ်လည်မှုများအား တိုက်ဖျက်ခြင်း” အပြန်အလှန်သင်ယူမှုပွဲတော် (Interactive Learning Festival) ကျင်းပမည်ဖြစ်ကြောင်း သိရသည်။
လာမည့် ဇွန်လ ၄ ရက်မှ ၆ ရက်အထိ ၃ ရက်တိုင်တိုင် ကျင်းပသွားမည်ဖြစ်ကြောင်းလည်း အဆိုပါပွဲကို ဦးဆောင်ကျင်းပသည့် အမေရိကန်စင်တာ (American Center Yangon) က အသိပေးထားသည်။
ဒစ်ဂျစ်တယ်ကမ္ဘာတွင် ဘေးကင်းပြီး စမတ်ကျသည့် လူငယ်များဖြစ်လာစေရန် ရည်ရွယ်ကာ စိတ်လှုပ်ရှားစရာ အပြန်အလှန်ဆွေးနွေးမှုပုံစံ (Interactive Sessions) များဖြင့် အခမဲ့ စီစဉ်ပေးထားခြင်း ဖြစ်သည်။
တက်ရောက်လိုသူများအနေဖြင့် ရန်ကုန်မြို့ရှိ အမေရိကန်စင်တာတွင် လူကိုယ်တိုင် (In-person) သော်လည်းကောင်း၊ အွန်လိုင်း (Virtual) မှသော်လည်းကောင်း ရွေးချယ်တက်ရောက်နိုင်ရန် စီစဉ်ထားသည်။
အဆိုပါ ၃ ရက်အတွင်း သတင်းမီဒီယာကဏ္ဍ နားလည်ကျွမ်းကျင်မှု အခြေခံ (Media Literacy): မီဒီယာ၏ သဘောသဘာဝနှင့် လူသားတို့၏ အတွေးအမြင်၊ ဆုံးဖြတ်ချက်များအပေါ် မီဒီယာ၏ လွှမ်းမိုးသက်ရောက်မှုများကို အခြေခံကစ၍ လေ့လာခြင်းများ ပါဝင်ကြောင်း သိရသည်။
ထိုပြင် လူမှုအဖွဲ့အစည်းနှင့် သတင်းမီဒီယာ ဆက်နွယ်မှု (Social Influence & Trends): လူမှုအသိုင်းအဝိုင်းအပေါ် မီဒီယာ၏ သက်ရောက်မှု၊ ခေတ်ရေစီးကြောင်းများ၊ အများပြည်သူအမြင်နှင့် လူမှုရေးရာလွှမ်းမိုးမှုများ ပုံဖော်လာပုံကို ဆွေးနွေးမည်ဖြစ်ကြောင်း သိရသည်။
ထိုအတူ တာဝန်သိ နိုင်ငံသားများ ဖြစ်လာခြင်း (Ethical & Responsible Digital Engagement): ဒစ်ဂျစ်တယ်နယ်ပယ်အတွင်း အကြောင်းအရာများ ဖန်တီးမျှဝေရာတွင် ကျင့်ဝတ်ဆိုင်ရာ အတွေးအခေါ်နှင့် တာဝန်ယူမှုရှိစွာ ပါဝင်ပတ်သက်ရန် လိုအပ်ချက်များကို လေ့လာခြင်းများ လည်း ပြုလုပ်မည်ဖြစ်ကြောင်း သိရသည်။
ဒစ်ဂျစ်တယ်စပေ့စ် (Digital Space) အတွင်း တာဝန်သိစိတ်ဖြင့် အပြုသဘောဆောင် ပါဝင်လိုသည့် လူငယ်တိုင်းအတွက် မဖြစ်မနေတက်ရောက်သင့်သည့် ပွဲတစ်ခုဖြစ်ပြီး လက်ရှိတွင် အခမဲ့ စာရင်းပေးသွင်းခြင်း (Free Register) လုပ်ဆောင်နိုင်ကြောင်း သိရသည်။