အွန်လိုင်းလောင်းကစား လုပ်ငန်းများတွင်ပတ်သက်လုပ်ကိုင်နေသူများနှင့် မှတ်ပုံတင် ငှားရမ်းသူများကိုပါ ဖော်ထုတ်အရေးယူမည်ဟုဆို

ယခုနှစ်များတွင် ခေတ်စားလာသည့် အွန်လိုင်းဂိမ်းများနှင့် တရားမဝင်ငွေချေးလုပ်ငန်းများကို ဖော်ထုတ်အရေးယူလျက်ရှိရာ အဆိုပါလုပ်ငန်းများတွင် ပါဝင်ပတ်သက်နေသူများနှင့် Kpay ,Wave စသည့်အကောင့်များဖွင့်လှစ်နိုင်ရန် အခကြေးငွေရယူကာ မှတ်ပုံတင် ငှားရမ်းသူများကိုပါ အရေးယူသွားမည်ဖြစ်ကြောင်း နစက ကသတင်းထုတ်ပြန်သည်။

ယင်းအွန်လိုင်းလောင်းကစားလုပ်ငန်းလုပ်ကိုင်သူများနှင့် ငွေချေးလုပ်ငန်းလုပ်ကိုင်သူများသည် မှတ်ပုံတင်တစ်ခုလျင် ကျပ်ငွေ (၁၀၀၀၀) ဖြင့် ငှားရမ်းကာ KBZpay နှင့် Wave pay အကောင့်များ ဖွင့်လှစ်ပြီး အများပြည်သူထံမှ ငွေကြေးလိမ်လည်မှုများ လုပ်ဆောင်နေခြင်းဖြစ်သည့်အတွက် အဆိုပါ မှတ်ပုံတင်ငှားရမ်းသူများအနေဖြင့် ဥပဒေအရ အရေးယူခံရမည်ဖြစ်ကြောင်းလည်း နစက က သတိပေးထားသည်။

လတ်တလောတွင် မြန်မာနိုင်ငံအတွင်းရှိ အနုပညာရှင်အချို့နှင့် ဟာသလူရွှင်တော်အချို့အပါအဝင် Social Influencer အချို့သည်ပင် အဆိုပါ အွန်လိုင်းဂိမ်းများအား အခကြေးငွေရယူကာ ၎င်းတို့၏ ပရိသတ်များနှင့် အားပေးသူများအား ဆွဲဆောင်ကြော်ငြာမှုများ ပေါ်တင်လုပ်ဆောင်နေပြီး အစိုးရက အရေးယူဆောင်ရွက်ခြင်း မရှိသည့်အပေါ် ပြစ်တင်ဝေဖန်မှုများလည်း ရှိနေသည်။

အွန်လိုင်းဂိမ်းများနှင့် ငွေချေးလုပ်ငန်းအယောင်ပြ၍ ငွေကြေးလိမ်လည်မှုများမှာ မြန်မာနိုင်ငံတွင် ၂၀၂၀ ခုနှစ် နောက်ပိုင်း ပိုမိုခေတ်စားလာပြီး ပြည်သူအချို့မှာ သိန်းရာနှင့်ချီကာ ဆုံးရှုံးနစ်နာမှုများ ရှိနေခြင်း ဖြစ်သည်။

အဆိုပါ လုပ်ငန်းများနှင့်ပတ်သက်၍ ပြီးခဲ့သည့်ရက်ပိုင်းအတွင်းက ရန်ကုန်တိုင်းအတွင်းရှိ မြို့နယ်အချို့တွင် လူပုဂ္ဂိုလ် (၇၁) ဦးကို ဖမ်းဆီးခဲ့ပြီး ငွေကျပ် သိန်း (၅၀၀၀) နီးပါးရှိသည့် ‌KBZ pay နှင့် Wave pay အကောင့်အချို့ကို ယာယီပိတ်သိမ်းခဲ့ကြောင်း နစက က သတင်းထုတ်ပြန်ထားပြီး ဖြစ်သည်။

နစက၏ သတိပေးစာတွင် ဖော်ပြထားသည့် ဖော်ပြချက်များအရ အဆိုပါ အွန်လိုင်းလောင်းကစား လုပ်ငန်းများ ၊ ကံစမ်းမဲဖောက်လောင်းကစားလုပ်ငန်းနှင့်တရားမဝင် Online ချေးငွေလုပ်ငန်း လုပ်ကိုင်သူများအား ဆက်လက်ဖော်ထုတ်အရေးယူမည်ဖြစ်ပြီး ပါဝင်လုပ်ကိုင်သူများကိုပါ အရေးယူမည်။ ယင်းလုပ်ငန်းများ လုပ်ကိုင်ရာမှရရှိလာသည့် ငွေကြေးအကျိုးအမြတ်များကို ငွေကြေးခဝါချမှုတိုက်ဖျက်ရေးဥပဒေဖြင့် စစ်ဆေးအရေးယူသွားမည် ဖြစ်ကြောင်း သိရသည်။

လက်ရှိတွင် TTbet Online Game လောင်းကစားလုပ်ငန်း၊ Golden Gift Online ကံစမ်းမဲဖောက်လောင်းကစားလုပ်ငန်း၊ Money Bag Application ၊ Cash Now Application ၊ Cola Kyat Application နှင့် U Loan Application စသည့် တရားမဝင် အွန်လိုင်းလောင်းကစားလုပ်ငန်းနှင့် ကံစမ်းမဲဖောက် လောင်းကစားလုပ်ငန်းများကို ဖော်ထုတ်အရေးယူထားပြီး လူပုဂ္ဂိုလ် (၇၁) ဦးနှင့် ငွေကျပ် သိန်း (၅၀၀၀) ဝန်းကျင်ကို ဖမ်းဆီးထိန်းသိမ်းအရေးယူထားကြောင်းသိရသည်။

ပုံစာ -Online မှတရားမဝင်လုပ်ငန်းများလုပ်ကိုင်သူ ၇၁ ဦးအား ဖမ်းဆီးရမိသည့် သတင်းဓါတ်ပုံ