အီလွန်မတ်ဦးဆောင်သော အစိုးရစွမ်းဆောင်ရည်မြှင့်တင်ရေးဌာန(DOGE)၏ အမေရိကန်ပြည်ထောင်စု ပြည်သူ့ဝန်ထမ်းစနစ် ပြန်လည်ပြင်ဆင်မှုကို လောလောဆယ်အနေဖြင့် ခွင့်ပြုကြောင်း ဝါရှင်တန်ရှိ အမေရိကန်ပြည်ထောင်စုတရားရုံးမှ တရားသူကြီး တန်ယာချတ်ကင်က ကြေညာလိုက်သည်။
သူက အစိုးရစွမ်းဆောင်ရည်မြှင့်တင်ရေးဌာနကို ဦးဆောင်နေသော အီလွန်မတ်၏ လုပ်ဆောင်ချက်များကို ချက်ချင်းတားဆီးရန် ပြည်နယ်ပေါင်း ၁၀ ခုကျော်မှ တောင်းဆိုချက်များကို လောလောဆယ်အားဖြင့် ငြင်းဆန်လိုက်ခြင်းဖြစ်သည်။ အစိုးရအေဂျင်စီ ၇ ခု၏ ကွန်ပျူတာစနစ်များကို ဝင်ရောက်ကြည့်ရှုခြင်း သို့မဟုတ် အစိုးရဝန်ထမ်းများကို ဖယ်ရှားခြင်းတို့ကို တားမြစ်သည့် တရားဝင် အမိန့်ထုတ်ပေးရန် ပြည်နယ်ပေါင်း ၁၀ ခုကျော်မှ တောင်းဆိုထားခြင်း ဖြစ်သည်။
ထိုတောင်းဆိုချက်တွင် ဘီလီယံနာ အီလွန်မတ်သည် “လက်တွေ့အားဖြင့် ကန့်သတ်မှုမရှိသော အာဏာ” ရှိပြီး အမေရိကန်ဖွဲ့စည်းပုံအခြေခံဥပဒေပါ ခန့်အပ်မှုဆိုင်ရာ ပြဋ္ဌာန်းချက်ကို ချိုးဖောက်နေကြောင်း စွပ်စွဲထားခြင်းလည်းပါဝင်သည်။
သို့သော် တရားသူကြီး တန်ယာချတ်ကင်က ၁၀ မျက်နှာပါ ဆုံးဖြတ်ချက်ကိုထုတ်ပြန်လိုက်ပြီး၊ ယခုတောင်းဆိုကြသော ပြည်နယ်များအနေဖြင့်အီလွန်မတ် နှင့် DOGE ၏ လုပ်ဆောင်ချက်များကို တရားရုံးမှ ချက်ခြင်းမတားမြစ်ပေးပါက သူတို့အနေဖြင့် “ပြန်လည်ကုစားမရနိုင်သော ထိခိုက်မှုများ ကြုံတွေ့ရမည်”ဟူ၍ စွပ်စွဲထားခြင်းနှင့်ပတ်သက်၍ ထင်ရှားသည့် ခိုင်လုံသောအထောက်အထားများ မပြသနိုင်ကြောင်းကို အဆိုပါ တရားရုံးဆုံးဖြတ်ချက်တွင် ရှင်းလင်းဖော်ပြခဲ့သည်။