နူးဒေလီ၊ဇန်နဝါရီ ၂၄
အိန္ဒိယနိုင်ငံအနောက်ပိုင်း မဟာရက်စ်ထရာပြည်နယ်ရှိ စစ်လက်နက်ပစ္စည်းစက်ရုံပေါက်ကွဲသဖြင့် လူ ၈ ဦးသေဆုံးကာ ၇ ဦး ထိခိုက်ဒဏ်ရာရခဲ့ကြောင်း ဒေသဆိုင်ရာအာဏာပိုင်များကပြောကြားခဲ့သည်။
အဆိုပါပေါက်ကွဲမှုသည် ဒေသစံတော်ချိန် နံနက် ၁၀ နာရီ ၃၀ မိနစ်ခန့်တွင် မဟာရက်စ်ထရာပြည်နယ်၏မြို့တော် မွမ်ဘိုင်းမြို့အရှေ့ဘက် ကီလိုမီတာ ၈၃၀ အကွာ ဘန်ဒရာခရိုင်ရှိ စက်ရုံတွင် ဖြစ်ပွားခဲ့ခြင်းဖြစ်ကြောင်းသိရသည်။
မီးသတ်သမားများသည် အခင်းဖြစ်နေရာသို့ အလျင်အမြန်သွားရောက်ကာ အခြေအနေကို ထိန်းချုပ်နိုင်ခဲ့သော်လည်း ပေါက်ကွဲမှုအရှိန်ကြောင့် စက်ရုံခေါင်မိုးပြိုကျပြီး အလုပ်သမားများပိတ်မိ နေခဲ့ခြင်းဖြစ်သည်ဟုသိရသည်။
အာဏာပိုင်များသည် အပျက်အစီးများကိုဖယ်ရှားရန်နှင့်ပိတ်မိနေသူများကိုရှာဖွေရန် မြေတူးစက်ဖြင့်ကယ်ဆယ်ရေးလုပ်ငန်းများဆောင်ရွက်ခဲ့ပြီး ဒဏ်ရာရသူများကိုလည်း ဆေးရုံသို့ပို့ဆောင်ပေးခဲ့သည်။
လုပ်ငန်းရှင်များနှင့်ဝန်ထမ်းများက ဘေးအန္တရာယ်ကင်းရှင်းရေးစံနှုန်းများကို လိုက်နာခြင်းမရှိသဖြင့် အိန္ဒိယစက်ရုံများတွင် ပေါက်ကွဲမှုများသည် မကြာခဏဆိုသလိုဖြစ်လေ့ရှိသည်။
ယခုဖြစ်စဉ်အတွင်း ကွယ်လွန်သူများ၏မိသားစုဝင်များနှင့်ထပ်တူ ဝမ်းနည်းမိပါကြောင်း ကာကွယ်ရေးဝန်ကြီးကပြောကြားခဲ့ပြီး ဒဏ်ရာရသူများ အမြန်ဆုံးပြန်ကောင်းမွန်ရေးအတွက်လည်း ဆုမွန်ကောင်းတောင်းပေးခဲ့သည်။
Source : ရှင်းဟွာ