အမေရိကန်ပြည်ထောင်စုအနေဖြင့် အိန္ဒိယမှ ကုန်ပစ္စည်းများအပေါ် ၂၅% အခွန်စည်းကြပ်ရန် ရည်ရွယ်ထားကြောင်း အမေရိကန်သမ္မတ ဒေါ်နယ်လ်ထရမ့်က စကော့တလန်နိုင်ငံ၊ အေဘာဒင်းမြို့မှ ဝါရှင်တန်သို့ ပြန်အလာ လေယာဉ်ပေါ်တွင် သတင်းထောက်များကို ပြောကြားခဲ့သည်။
“၂၅% ပေးရမှာပါ” ဟု လွန်ခဲ့သည့်ရက်အနည်းငယ်က စကော့တလန်တွင် ဂေါက်ရိုက်ပြီး လုပ်ငန်းခွင်အစည်းအဝေးများ ကျင်းပခဲ့စဥ်ကလည်း သူကပြောကြားခဲ့သေးသည်။
အိန္ဒိယနှင့် ကုန်သွယ်ရေးသဘောတူညီချက် အပြီးသတ်ပြီလားဟု မေးမြန်းရာတွင်မူ “အဆင်မပြေသေးဘူးဆိုတာ သိပါတယ်” ဟု ထရမ့်က ပြန်လည်ဖြေကြားခဲ့သည်။
“စောင့်ကြည့်ရမှာပေါ့။ အိန္ဒိယဟာ ကောင်းမွန်တဲ့ မိတ်ဆွေတစ်ဦးဖြစ်ခဲ့ပေမဲ့ တခြားနိုင်ငံတွေထက်အခွန်ပိုလျော့အောင် အမျိုးမျိုးလုပ်ခဲ့ကြပါတယ်။ … ဒါပေမဲ့ အခု ကျွန်တော်တာဝန်ယူနေပြီ၊ အဲဒီလိုလုပ်လို့ မရတော့ဘူး” ဟု အမေရိကန်သမ္မတက အလေးပေး ပြောကြားခဲ့သည်။
The Indian Express သတင်းစာက ၎င်းတို့၏ သတင်းရင်းမြစ်များကို ကိုးကား၍ အိန္ဒိယနှင့် အမေရိကန်ကြား ကုန်သွယ်ရေးသဘောတူညီချက်သစ်နှင့် ပတ်သက်သည့် ဆွေးနွေးမှုများသည် ထူးခြားသောတိုးတက်မှုမရှိသောကြောင့် ရပ်တန့်နေကြောင်း ဖော်ပြခဲ့သည်။ သတင်းစာအရ ဝါရှင်တန်က အမေရိကန်ကုန်ပစ္စည်းများကို အိန္ဒိယဈေးကွက်သို့ အခွန်လွတ်ဝင်ရောက်ခွင့်ပေးရန် တောင်းဆိုနေသည်။ နယူးဒေလီကမူ အိန္ဒိယကုန်ပစ္စည်းများအပေါ် အမေရိကန်အခွန်များသည် ၁၅% ထက် မကျော်လွန်စေရန် တောင်းဆိုထားသည်။ ထို့အပြင် အိန္ဒိယသည် အမေရိကန်ထံမှ လက်နက်များ၊ သဘာဝဓာတ်ငွေ့နှင့် နျူကလီးယားဓာတ်ပေါင်းဖိုများ ဝယ်ယူရန် အသင့်ရှိကြောင်းကိုလည်း ကြေညာခဲ့သည်။