အိန္ဒိယတွင် သင်္ချိုင်းအတွင်း ဝှက်ထားသော ဓာတ်ငွေ့အိုးများကို ရှာတွေ့

        
အီရန်စစ်ပွဲကြောင့် လောင်စာရှားပါးမှုများဖြစ်နေချိန်တွင် အိန္ဒိယရဲတပ်ဖွဲ့သည် ယခုသီတင်းပတ်တွင် ဟိုက်ဒရာဘတ်မြို့ရှိ သင်္ချိုင်းတစ်ခုအတွင်း ဝှက်ထားသော မီးဖိုချောင်သုံး ဓာတ်ငွေ့အိုး ၄၁၄ လုံးကို သိမ်းဆည်းရမိခဲ့ပြီး မှောင်ခိုဈေးကွက်တွင် ရောင်းချရန်ကြိုးစားသူများကို ဖမ်းဆီးခဲ့ကြောင်း အစိုးရအရာရှိတစ်ဦးက ဧပြီလ ၂ ရက်နေ့တွင် ပြောကြားခဲ့သည်။
        
အီရန်နှင့် အမေရိက-အစ္စရေးစစ်ပွဲကြောင့် သင်္ဘောတင်ပို့မှုများ အနှောင့်အယှက်ဖြစ်ကာ ထောက်ပံ့ဖြည့်တင်းမှုပြတ်လပ်ခြင်းများဖြစ်ပေါ်ခဲ့ပြီးနောက် ရေနံဓာတ်ငွေ့ရည်(အယ်လ်ပီဂျီ) အိုးများ ဝယ်ယူစုဆောင်းမှုကို ထိန်းချုပ်ရန် အိန္ဒိယအာဏာပိုင်းများက စီးနင်းဖမ်းဆီးမှုများကို တိုးမြှင့်လုပ်ဆောင်နေခဲ့သည်။  
        
အယ်လ်ပီဂျီတင်သွင်းမှုတွင် ကမ္ဘာ့နံပါတ် ၂ နေရာတွင်ရှိနေသော အိန္ဒိယသည် ၎င်း၏ လိုအပ်ချက်၏ ၆၀ ရာခိုင်နှုန်းခန့်ကို အရှေ့အလယ်ပိုင်းမှ အများစုပါဝင်သော ပြည်ပတဆင့် ဖြည့်ဆည်းနေရခြင်းဖြစ်သည်။
      
မနေ့ကပင် စီးနင်းမှု အကြိမ် ၂,၆၀၀ ခန့်ပြုလုပ်ခဲ့ပြီး ဓာတ်ငွေ့အိုး ၇၀၀ ခန့်ကို သိမ်းဆည်းရမိခဲ့သည် ဟု ရေနံနှင့် သဘာဝဓာတ်ငွေ့ဝန်ကြီးဌာနမှ အကြီးတန်းအရာရှိ မစ္စ ဆူဂျာတာ ရှားမားက အရှေ့အလယ်ပိုင်းအကျပ်အတည်းအရေး ပုံမှန်သတင်းစာရှင်းလင်းပွဲတွင် ပြောကြားခဲ့သည်။
       
ထို့အပြင် ဟိုက်ဒရာဘတ်မြို့ရှိ သင်္ချိုင်းတစ်ခုအတွင်းမှ နေရာတစ်ခုတွင် ဓာတ်ငွေ့အိုး ၄၀၀ ခန့်ကို မကြာခင်က တွေ့ရှိခဲ့ကြောင်းနှင့် ထိုနေရာတွင် လူ ၁၀ ဦးကို ဖမ်းဆီးထားကာ ပါဝင်ပတ်သက်သော ဖြန့်ဖြူးရေးဆိုင်ကို လုပ်ငန်းဆိုင်းငံ့ထားသည်ဟု သူက ဆက်လက်ပြောကြားခဲ့သည်။
      
တရားခံသည် သင်္ချိုင်းတွင် ဝှက်ထားသော စီးပွားဖြစ်နှင့် အိမ်သုံး ဓာတ်ငွေ့အိုးများကို ဈေးကွက်ပေါက်ဈေးထက် ၃ ဆနီးပါးပို၍ ရောင်းချနေကြောင်း ရဲတပ်ဖွဲ့က ပြောကြားခဲ့သည်။ အိန္ဒိယ ရူပီး ၂,၁၀၀ (စင်ကာပူဒေါ်လာ ၂၉ ဒေါ်လာ) ခန့်ကုန်ကျသော စီးပွားဖြစ် ဓာတ်ငွေ့အိုးတစ်အိုးကို ရူပီး ၆,၀၀၀ အထိ ရောင်းချခဲ့သည်။
        
သိမ်းဆည်းရမိသော ဓာတ်ငွေ့အိုးများနှင့် တရားခံအသုံးပြုသည့် ယာဉ်အချို့၏ စုစုပေါင်းတန်ဖိုးမှာ ရူပီး ၂ ဒဿမ ၂ သန်းနီးပါးရှိကြောင်း ရဲတပ်ဖွဲ့က ပြောကြားခဲ့သည်။
        
အယ်လ်ပီဂျီ ထောက်ပံ့ဖြန့်ဖြူးမှုအပေါ် ဖိအားများကို လျှော့ချရန်အတွက် အိန္ဒိယသည် ရေနံဆီ၊ ကျောက်မီးသွေးနှင့် ဇီဝဓာတ်ငွေ့ကဲ့သို့သော အခြားရွေးချယ်စရာများကို ပိုမိုအသုံးပြုရေးကို ဆောင်ရွက်နေပြီး အိမ်ထောင်စုများအတွက် ပိုက်လိုင်းသဘာဝဓာတ်ငွေ့ဖြန့်ဖြူးမှုကို တိုးမြှင့်ဆောင်ရွက်လျက်ရှိသည်။

Ref: သယ်စထရိတ်တိုင်းမ်စ်