မြန်မာနိုင်ငံက အိမ်ရှင်အဖြစ်လက်ခံကျင်းပမည့် အာရှချန် ပီယံလိဂ်အမျိုးသမီးအသင်းခြေစစ်ပွဲအုပ်စုအဆင့်ပွဲစဉ်များကို မနက်ဖြန် ဩဂုတ်(၂၅)ရက် ညနေပိုင်းအချိန်တွင် ISPE အမျိုးသမီးအသင်းက ဧည့်ခံယှဉ်ပြိုင်ကစားသွားကြမည်ဖြစ်သည်။
ယင်းအတွက် ယနေ့ ဩဂုတ်(၂၄)ရက်၌ ရန်ကုန်မြို့ သုဝဏ္ဏကွင်းရှိ Press Conference Room တွင် သတင်းစာရှင်း လင်းပွဲပြုလုပ်ခဲ့ပြီး ပါဝင်ယှဉ်ပြိုင်မည့် အသင်း(၄)သင်း၏ နည်းပြချုပ်များက ပွဲကြိုသတင်းစကားများပြောကြားခဲ့သည်။
“ဒီပြိုင်ပွဲ မတိုင်မီကတည်းက ကြိုတင်ပြင်ဆင်မှုတွေ ပြုလုပ်ခဲ့ပါတယ်။ ပြိုင်ဘက်အသင်းတွေရဲ့ ကစားပုံကို လေ့ လာထားပါတယ်။ ကျွန်မတို့ အသင်းအကောင်းဆုံး ကစားနိုင်မယ်လို့ ယုံကြည်ထားပါတယ်။ တစ်ပွဲချင်း အာရုံစိုက် ပြင် ဆင်သွားမှာပါ။ ပရိသတ်ကို ပျော်ရွှင်မှုပေးနိုင်အောင် ကြိုးစားသွားမှာပါ” ဟု ISPE အမျိုးသမီးအသင်းနည်းပြချုပ် ဒေါ်စန်းစန်းသိန်းက ဆိုသည်။
ထို့အတူ “ပွဲဦးထွက်မှာ အိမ်ရှင် ISPE အသင်းနဲ့ ကစားရမှာဖြစ်လို့ ခက်ခဲမှာဖြစ်ပေမယ့် ကြိုးစားယှဉ်ပြိုင်သွားမှာပါ။ အသင်းမှာ နိုင်ငံခြားသား ကစားသမား မပါဘူး။ အခြားအသင်းတွေနဲ့ ယှဉ်ရင်အားနည်းပေမယ့် ယုံကြည်မှု အပြည့်နဲ့ ကစားသွားမှာ ဖြစ်ပါတယ်”ဟု ဂူအမ်ကလပ် Bank of Gu am Strykers FC အမျိုးသမီးအသင်း နည်းပြချုပ် Gadia ကလည်း ဆိုသည်။
အလားတူ နိုင်ငံခြားသားကစားသမား (၈)ဦးအထိ ပါဝင်လာသည့် ဖိလစ်ပိုင်ကလပ် Stallion Laguna FC အမျိုးသမီးအသင်း၏ နည်းပြချုပ်ဖြစ်သူ Thomas Victoria က “ဒီပြိုင်ပွဲ ဝင်ရောက်ခွင့်ရလို့ ကျေနပ်မိပါတယ်။ ပြိုင်ပွဲမတိုင်မီ မြန်မာနိုင်ငံကို ကြိုတင်လာရောက်ပြီးလေ့ကျင့်မှုတွေ ပြုလုပ်ခဲ့လို့ ဒီကရာသီဥတုနဲ့ အသားကျနေပြီ ဖြစ်ပါတယ်။ အသင်းမှာ နိုင်ငံခြားသားက စားသမား ရှစ်ယောက် ပါဝင်ပါတယ်။ ISPE အသင်းက မြန်မာ့လက်ရွေးစင်တွေပါဝင်လို့ အသင်းကောင်းတစ်သင်းပါ” ဟု သတင်းစကားပါးသည်။
ထို့ပြင် မွန်ဂိုလီးယားကလပ် Khovd Western FC အသင်းနည်းပြချုပ် Bayarmagnai ကလည်း”ကျွန်တော်တို့ အုပ်စုမှာ အသင်းကောင်းတွေ ပါဝင်နေလို့ ပွဲတိုင်းက ခက်ခဲနေမှာပါ။ ကျွန်တော်တို့အကောင်းဆုံး ပြင်ဆင်သွားပါမယ်။ ISPE နဲ့ Stallion တို့မှာ လက်ရွေးစင်က စားသမားတွေ ပါနေတာမို့ တောင့်တင်းတဲ့ အသင်းတွေပါ”ဟု ပြောကြားသည်။
မြန်မာကလပ်အသင်းဖြစ်သည့် ISPE အမျိုးသမီးအသင်းတွင် မြန်မာ့လက်ရွေးစင်အမျိုးသမီးအသင်းမှ ကစားသမား (၅)ဦးကို ကာလတို အငှားစာချုပ်ဖြင့် ခေါ်ယူထားကြောင်းသိရသည်။
ပြိုင်ပွဲအား Pyone Play Sports နှင့် Readers Channel တို့မှ တိုက်ရိုက်ထုတ်လွှင့်သွားမည်ဖြစ်ကြောင်းလည်း သိရသည်။