အာဆီယံ နိုင်ငံများနှင့် ကိုရီးယားနိုင်ငံတို့ အကြား စီးပွားရေး မူဝါဒများ ဆွေးနွေး

အာဆီယံနိုင်ငံများနှင့် ကိုရီးယားနိုင်ငံတို့အကြား ကုန်သွယ်မှုနှင့် ရင်းနှီးမြှုပ်နှံမှုများမြှင့်တင်ကာ စီးပွားရေး ဖွံ့ဖြိုးတိုး တက်စေနိုင်သည့် မူဝါဒများနှင့် မဟာဗျူဟာများ ပုံဖော်နိုင်ရေး အာဆီယံ – ကိုရီးယားစင်တာမှ ကျင်းပပြုလုပ်သည့် ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ စားပွဲဝိုင်းဆွေးနွေးပွဲတွင် ဆွေးနွေးခဲ့ကြကြောင်း နိုင်ငံခြားရေးဝန်ကြီးဌာန ထုတ်ပြန်ချက်အရ သိရသည်။

အာဆီယံကော်မတီ – ဆိုးလ် (ASEAN Committee in Seoul) ၏ အလှည့်ကျ ဥက္ကဋ္ဌအဖြစ် တာဝန်ယူဆောင်ရွက်လျက်ရှိသည့် ကိုရီးယားသမ္မတနိုင်ငံဆိုင်ရာ မြန်မာသံအမတ်ကြီး ဦးသန့်စင်မှ မေ(၈) ရက်တွင် ဆိုးလ်မြို့ရှိ Four Seasons Hotel Seoul ၌ ကျင်းပခဲ့သည့် အာဆီယံ-ကိုရီးယား ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ စားပွဲဝိုင်းဆွေး နွေးပွဲ ၂၀၂၄ (ASEAN–Korea Trade and Investment Roundtable 2024) သို့ တက်ရောက်၍ မိန့်ခွန်းပြောကြားခဲ့ခြင်းဖြစ်သည်။

အာဆီယံနှင့် ကိုရီးယားနိုင်ငံတို့အကြား တက်ကြွ၍ တိုးတက်မှုရှိသော ဆွေးနွေးဖက်ဆက်ဆံရေးသည် (၃၅) နှစ်ရှိပြီ ဖြစ်ကြောင်း၊ အားလုံးပါဝင်၍ စဉ်ဆက်မပြတ် ဖွံ့ဖြိုးတိုး တက်မှု ရှိသောပန်းတိုင်ဆီသို့ရောက်ရှိရန် နှစ်ဖက်ဆက်ဆံရေးကို ပိုမိုလေးနက်အောင်ဆောင်ရွက်ရာတွင် စီးပွားရေးအရ ပူးပေါင်းဆောင်ရွက်မှုသည် အရေးပါကြောင်း မြန်မာသံအမတ်ကြီးက ပြောကြားခဲ့သည်။

အာဆီယံတွင် တောင်ကိုရီးယားနိုင်ငံ၏ ဒုတိယမြောက်အများဆုံး ကုန်သွယ်ဖက်နိုင်ငံဖြစ်ပြီး တောင်ကိုရီးယားနိုင်ငံသည် အာဆီယံ၏ ပဉ္စမမြောက်အများဆုံး ကုန်သွယ်ဖက်နိုင်ငံအဖြစ် ရပ်တည်လျက်ရှိပါကြောင်း သိရသည်။

အာဆီယံတွင် ရင်းနှီးမြှုပ်နှံမှု အများဆုံးနိုင်ငံများတွင် တောင်ကိုရီးယားနိုင်ငံသည် နံပါတ် (၆) နေရာတွင်ရှိနေသည်ဟု ၂၀၂၂ ခုနှစ်၊ အာဆီယံမှ ထုတ်ပြန်သောစာရင်းဇယားများတွင် ဖော်ပြထားသည်။

သို့ဖြစ်၍ ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ စားပွဲဝိုင်းဆွေးနွေးပွဲသည် အာဆီယံနိုင်ငံများနှင့် ကိုရီးယားနိုင်ငံတို့ အကြား ကုန်သွယ်မှုနှင့်ရင်းနှီးမြှုပ်နှံမှုများမြှင့်တင်၍ နှစ်ဖက်လုံး၏ စီးပွားရေးဖွံ့ဖြိုး တိုးတက် စေနိုင်သည့် မူဝါဒများနှင့် မဟာဗျူဟာများ ပုံဖော်နိုင်ရေးအတွက် ထူးကဲစွာ အထောက်အကူပြုနိုင်သည့် ဆွေးနွေးမှုရလဒ်များ ရရှိမည်ယုံကြည်ကြောင်း ၎င်းက ထည့်သွင်းပြောကြားခဲ့သည်။

ASEAN–Korea Trade and Investment Roundtable ကို အာဆီယံနိုင်ငံများနှင့် ကိုရီးယားနိုင်ငံ တို့အကြား ကုန်သွယ်မှုနှင့် ရင်းနှီးမြှုပ်နှံမှုများမြှင့်တင်၍ စီးပွားရေးပူးပေါင်းဆောင်ရွက်မှု ပိုမိုခိုင်မာလာ စေရန် ရည်ရွယ်၍ ကျင်းပခဲ့ခြင်းဖြစ် ကြောင်း သိရသည်။

အဆိုပါ ဆွေးနွေးပွဲအား အာဆီယံ- ကိုရီးယားစင်တာသည် ကိုရီးယားနိုင်ငံရှိ နိုင်ငံတကာ စီးပွားရေးမူဝါဒဆိုင်ရာတက္ကသိုလ်နှင့် ပူးပေါင်း၍ နှစ်စဉ်ကျင်းပလာခဲ့ရာ ယခုနှစ် စားပွဲဝိုင်းဆွေးနွေးပွဲမှာ စတုတ္ထအကြိမ်မြောက်ဆွေးနွေးပွဲဖြစ်သည်။