ပေကျင်း၊ ဧပြီလ ၅ ရက်
တရုတ်နိုင်ငံသည် အာကာသအခြေပြု ဉာဏ်ရည်တု ကွန်ပျူတာတွက်ချက်မှု ကွန်ရက်တစ်ခုအတွက် ဘက်စုံဖြစ်နိုင်ခြေလေ့လာမှုနှင့် စီမံကိန်းမတိုင်မီ အကဲဖြတ်မှုများကို စတင်လိုက်ပြီဖြစ်ကြောင်း နိုင်ငံတော်ကာကွယ်ရေး သိပ္ပံ၊ နည်းပညာနှင့် စက်မှုစီမံခန့်ခွဲရေးဌာနအဆင့်မြင့်အရာရှိတစ်ဦးက ပြောကြားခဲ့သည်။
အဆိုပါဌာန၏ ကော်မာရှယ်အာကာသကဏ္ဍ ဒုတိယညွှန်ကြားရေးမှူး ယူဂေါင်ဘင် က ပြီးခဲ့သည့်သောကြာနေ့တွင် ပေကျင်း၌ ကျင်းပခဲ့သော ၂၀၂၆ ခုနှစ် အာကာသကွန်ပျူတာလုပ်ငန်းဆိုင်ရာ ညီလာခံတွင် ပြောကြားရာ၌ ၎င်းတို့ဌာနအနေဖြင့် စီမံကိန်းစတင်ခြင်း အစည်းအဝေးများနှင့် ကျွမ်းကျင်သူအဖွဲ့များ၏ ဆွေးနွေးပွဲများကို ဦးဆောင်ကျင်းပပေးခဲ့ပြီး လုပ်ငန်းစဉ်များမှာ အစီအစဉ်တကျ ရှေ့ဆက်နေပြီဖြစ်ကြောင်း Science and Technology Daily သတင်းစာက ဖော်ပြခဲ့သည်။
အာကာသအခြေပြု ကွန်ပျူတာတွက်ချက်မှု ဆိုသည်မှာ ကွန်ပျူတာတွက်ချက်နိုင်စွမ်း ကို အာကာသထဲတွင် ဖြန့်ကြက်ချထားခြင်းဖြစ်ပြီး ဂြိုဟ်တုကွန်ရက်များမှတစ်ဆင့် တစ်ကမ္ဘာလုံးကို လွှမ်းခြုံနိုင်စေမည်ဖြစ်သည်။
မြေပြင်အခြေစိုက် ဒေတာစင်တာများနှင့် နှိုင်းယှဉ်ပါက ၎င်း၏ အကြီးမားဆုံး အားသာချက်မှာ အချိန်နှင့်တစ်ပြေးညီ တုံ့ပြန်နိုင်စွမ်းနှင့် ကမ္ဘာအနှံ့ လွှမ်းခြုံနိုင်စွမ်းတို့ ဖြစ်သည်။
အာကာသအခြေပြု ကွန်ပျူတာစနစ် ဖွံ့ဖြိုးတိုးတက်ရေးသည် အရေးပါသောလိုအပ်ချက်တစ်ခုဖြစ်ကြောင်း၊ ၎င်းသည် မြေပြင်ကွန်ပျူတာစနစ်၏ အကန့်အသတ်များကို ကျော်လွှားရန်နှင့် ဒစ်ဂျစ်တယ်စီးပွားရေး ရေရှည်ဖွံ့ဖြိုးတိုးတက်စေရန်အတွက် အဓိကသော့ချက်ဖြစ်ကြောင်း ယူ က အလေးပေးပြောကြားခဲ့သည်။
ပုံမှန်ဒေတာစင်တာများသည် စွမ်းအင်သုံးစွဲမှု မြင့်မားခြင်း၊ မြေနေရာ အကန့်အသတ်ရှိခြင်း၊ အအေးပေးစရိတ် မြင့်မားခြင်းနှင့် လွှမ်းခြုံမှု အကန့်အသတ်ရှိခြင်းတို့ကြောင့် အနာဂတ်တွင် အလွန်ကြီးမားပြီး ပတ်ဝန်းကျင်ထိန်းသိမ်းရေးနှင့် တစ်ကမ္ဘာလုံး လွှမ်းခြုံနိုင်ရေး လိုအပ်ချက်များကို ဖြည့်ဆည်းရန် ခက်ခဲသော်လည်း အာကာသအခြေပြုစနစ်က ကာဗွန်ထုတ်လွှတ်မှုမရှိသော၊ ရေရှည်တည်တံ့ပြီး ကျယ်ပြန့်စွာ အသုံးပြုနိုင်သော အစားထိုးစနစ်တစ်ခု ဖြစ်လာမည်ဟု ယူ က ဆိုထားပါသည်။
ထို့ပြင် ပုံမှန်ပုံစံများတွင် ဂြိုဟ်တုများသည် အာကာသမှ ဒေတာအမြောက်အမြားကို စုဆောင်းသော်လည်း ဂြိုဟ်တုပေါ်တွင် ကွန်ပျူတာတွက်ချက်နိုင်စွမ်း အလွန်နည်းပါးသဖြင့် ဒေတာအားလုံးကို မြေပြင်စခန်းများသို့ ပြန်လည်ပေးပို့ပြီးမှသာ ခွဲခြမ်းစိတ်ဖြာနိုင်သည်။ ဤပုံစံသည် လိုင်းအကျယ်အကန့်အသတ်ရှိသဖြင့် အချိန်နှင့်တစ်ပြေးညီ အသုံးပြုနိုင်သော ဒေတာနှုန်းမှာ ၁၀ ရာခိုင်နှုန်းအောက်သာ ရှိသော်လည်း အာကာသအခြေပြုစနစ်တွင် ဂြိုဟ်တုပတ်လမ်းပေါ်၌ပင် ဉာဏ်ရည်တုဖြင့် တိုက်ရိုက်တွက်ချက်နိုင်မည်ဖြစ်ရာ ဒေတာပေးပို့မှု ကြန့်ကြာချိန်ကို စက္ကန့်ပိုင်းအထိ လျှော့ချနိုင်မည်ဖြစ်သည်။
တရုတ် သတင်းအချက်အလက်နှင့် ဆက်သွယ်ရေးနည်းပညာ အကယ်ဒမီမှ ရှဲ့လီနာ ကလည်း ကွန်ပျူတာဂြိုဟ်တုများသည် လေဆာဆက်သွယ်ရေးစနစ်ကို အသုံးပြု၍ ကမ္ဘာတစ်ဝန်း ချိတ်ဆက်ကာ ပတ်လမ်းပေါ်တွင် ဒေတာများကို တို-က်ရို-က်တွက်ချက်နိုင်မည် ဖြစ်ကြောင်း၊ ၎င်းကြောင့် သဘာဝဘေးအန္တရာယ် ကြိုတင်သတိပေးခြင်းနှင့် အရင်းအမြစ် စောင့်ကြည့်ခြင်းကဲ့သို့သော လုပ်ငန်းများတွင် ကြန့်ကြာချိန်ကို နာရီပိုင်းမှ စက္ကန့်ပိုင်းအထိ လျှော့ချနိုင်မည်ဖြစ်ကြောင်း ရှင်းပြခဲ့သည်။
စက်မှုနှင့် သတင်းအချက်အလက် နည်းပညာဝန်ကြီးဌာန၏ အဆိုအရ တရုတ်နိုင်ငံသည် အာကာသကွန်ပျူတာလုပ်ငန်း ဂေဟစနစ်ကို အရှိန်အဟုန်ဖြင့် ပျိုးထောင်လျက်ရှိသည်။ အနာဂတ်တွင် ဟာ့ဒ်ဝဲ၊ ဆော့ဖ်ဝဲ၊ ကွန်ရက်နှင့် လုံခြုံရေးဆိုင်ရာ စံနှုန်းများကို သတ်မှတ်သွားမည်ဖြစ်ပြီး အာကာသသုံး ရောင်ခြည်သင့်မှုဒဏ်ခံ ချစ်ပ်ပြားများနှင့် ဂြိုဟ်တုအချင်းချင်း လေဆာဖြင့် ချိတ်ဆက်သည့် နည်းပညာများကို ပိုမိုမြှင့်တင်သွားမည် ဖြစ်ပါသည်။
Ref: ရှင်းဟွာ