တောင်ကြီး၊ စက်တင်ဘာ ၁၃
အမှတ် (၂) သံမဏိစက်ရုံ (ပင်းပက်) လည်ပတ်နိုင်ရေးအတွက် စက်တပ်ဆင်ရေးလုပ်ငန်းများ ဆောင်ရွက်လျက်ရှိပြီး လုပ်ငန်းများပြီးစီးပါက စက်စမ်းသပ်လည်ပတ်ခြင်းနှင့် စီးပွားဖြစ်ကုန်ထုတ်လုပ်ခြင်းတို့ကို ဆက်လက်ဆောင်ရွက်မည်ဖြစ်ကြောင်း စက်မှုနှင့် အသေးစား၊ အငယ်စား၊ အလတ်စားနှင့် စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက ပြောကြားသည်။
ပြည်ထောင်စုဝန်ကြီးသည် ယမန်နေ့က တောင်ကြီးမြို့ရှိ အမှတ် (၂) သံမဏိစက်ရုံ (ပင်းပက်) မှ တာဝန်ရှိသူများနှင့် တွေ့ဆုံစဉ် ယင်းသို့ ပြောကြားခဲ့ခြင်းဖြစ်သည်။
စက်ရုံတွင် ပညာရပ်ပိုင်းဆိုင်ရာ မတူညီသည့် စက်ရုံခွဲများကို ပေါင်းစပ်လည်ပတ်ရမည်ဖြစ်သဖြင့် စက်ပစ္စည်းများအား ကြိုတင်စစ်ဆေးပြုပြင်သည့်စနစ်များ ထူထောင်ရန်၊ သံစိမ်းထုတ်လုပ်မှုနည်းပညာ ရရှိရေးနှင့် စက်ရုံကို ကိုယ်တိုင်မောင်းနှင်၍ အရည်အသွေးမီထုတ်ကုန်များ ထုတ်လုပ်နိုင်ရေး ကြိုတင်လေ့လာပြင်ဆင်ထားရန် ပြည်ထောင်စုဝန်ကြီးက တိုက်တွန်းခဲ့သည်။
ထို့ပြင် စီမံကိန်းပြီးစီး၍ ကုန်ထုတ်လုပ်မှုစတင်ချိန်တွင် လိုအပ်မည့် လူ့စွမ်းအားအရင်းအမြစ်များ ခန့်ထားရေး၊ ထုတ်ကုန်များ ဖြန့်ဖြူးရောင်းချရေး၊ အရည်အသွေးမီကုန်ကြမ်းများ ရရှိရေး၊ ဘဏ္ဍာငွေသုံးစွဲမှုနှင့် စက်ရုံဘေးအန္တရာယ်ကင်းရှင်းစွာ လည်ပတ်နိုင်ရေးတို့အတွက်လည်း အသေးစိတ်စီမံဆောင်ရွက်လျက်ရှိကြောင်း သိရသည်။