အနာဂတ်မျိုးဆက်သစ်လူငယ်များအတွက် အခြေခံကောင်း၊ အမွေခံကောင်းများထားခဲ့နိုင်ရန် ကြိုးစားရမည်ဟု မြန်မာနိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က ပြောသည်။
မြန်မာနိုင်ငံတော် ယာယီသမ္မတမှ ယနေ့ အောက်တိုဘာ ၁၃ ရက်နံနက်ပိုင်းကကျင်းပသည့် (၂၆)ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ၏ ဆုချီးမြှင့်ပွဲသို့တက်ရောက်၍ ဂုဏ်ပြုအမှာစကားပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
မြန်မာလူမျိုးများသည် ကိုယ်ပိုင်အမျိုးသားရေးစရို-က်လက္ခဏာများ၊ အဆင့်အတန်းမြင့်မားသည့် ကိုယ်ပိုင်အမျိုးသားယဥ်ကျေးမှုများ၊ နက်ရှိုင်းသိမ်မွေ့သည့် ယဥ်ကျေးမှုဓလေ့စရိုက်နှင့် အတွေးအခေါ်အယူအဆများ၊ လူမှုကျင့်ဝတ်စည်းကမ်းများ၏ ဂုဏ်ကျေးဇူးများကြောင့် သမိုင်းအစဥ်အဆက်တွင် ကျက်သရေရှိရှိ ရပ်တည်ထွန်းပြောင်နိုင်ခဲ့သည့် အစဥ်အလာကောင်းများရှိထားပြီးဖြစ်သည်ဟု ပြောသည်။
” မိမိတို့အနေနဲ့ ကောင်းမွန်တဲ့အတိတ်အစဥ်အလာကောင်းတွေ၊ ကောင်းမွေတွေကို တည်တံ့တိုးပွားအောင်ထိန်းသိမ်းမြှင့်တင်ရင်း ပစ္စပ္ပာန်ကာလရဲ့ အခွင့်အလမ်းကောင်းတွေနဲ့ပေါင်းစပ်ပြီး အနာဂတ်မျိုးဆက်သစ်လူငယ်တွေအတွက် အခြေခံကောင်း အမွေခံကောင်းတွေထားခဲ့နိုင်ဖို့ကြိုးစားကြရပါမယ်။ ဒါဟာ မိမိတို့ရဲ့ အမျိုးသားရေးတာဝန်ဖြစ်ပါတယ်”ဟု ယာယီသမ္မတက ပြောသည်။
မျက်မှောက်ခေတ်တွင် နိုင်ငံသူ၊ နိုင်ငံသားများဖြစ်သည့် မိမိတို့အားလုံး၏ ပုခုံးပေါ်သို့ရောက်ရှိလာပြီဖြစ်ရာ အထူးသဖြင့် ဦးနှောက်နှင့် နှလုံးသားတွေးခေါ်မြှော်မြင်မှုနှင့် စိတ်ဓာတ်တို့ကို မှန်ကန်သည့်လမ်းကြောင်းပေါ်၌ တစ်ပေါင်းတစ်စည်းတည်းဖြစ်ထွန်းလာစေရန် စေ့ဆော်ပေးနိုင်သည့် မြန်မာ့အနုပညာစွမ်းအားကို တန်ဖိုးရှိထိရောက်စွာအသုံးချရမည်ဟု ပြောသည်။
ထိုသို့ အသုံးချပြီး တိုင်းပြည်နှင့် လူမျိုးကြီးပွားတိုးတက်ရေး၊ ပြည်ထောင်စုကြီးအဓွန့်ရှည်တည်တံ့ခိုင်မြဲရေးတို့အတွက် ပြည်သူများက တစ်စိတ်တစ်ဝှမ်းတည်း စိတ်တူကိုယ်တူပူးပေါင်းကာ အနုပညာစွမ်းပကားဖြင့် ကြိုးစားဆောင်ရွက်ပေးကြရန်လည်း ယာယီသမ္မတက တိုက်တွန်းပြောကြားခဲ့သည်။