အစ္စရေးဓားစာခံအားလုံးကို တစ်ပြိုင်နက် လွှတ်ပေးရန် ဟာမတ်စ် အဖွဲ့ အဆင်သင့်ဖြစ်နေ

ဂါဇာမြေပေါ်ရှိ ပါလက်စတိုင်း ဟာမတ်စ်အဖွဲ့သည် ကျန်ရှိနေသေးသည့် အစ္စရေးဓားစာခံများအားလုံးကို တစ်ပြိုင်နက် လွှတ်ပေးရန် အဆင်သင့်ရှိနေပြီဖြစ်ကြောင်း Al Jazeera သတင်းဌာနက ဖော်ပြသည်။

ဂါဇာမြေပေါ်တွင် စစ်ပြေငြိမ်းရေး ဆွေးနွေးမှုများ၏ ဒုတိယအဆင့်အတွင်း ၎င်းတို့၏ သဘောထားကို ဖော်ပြသည့် ကြေညာချက်တစ်ရပ်ကို ထုတ်ပြန်ခဲ့သည်။

“ဟာမတ်စ်အဖွဲ့သည် ဂါဇာစစ်ပြေငြိမ်းရေးသဘောတူညီချက်၏ ဒုတိယအဆင့်တွင် အစ္စရေးဓားစာခံများနှင့် ပါလက်စတိုင်းအကျဉ်းသားများအား တစ်ပြိုင်နက် လဲလှယ်ရန် အဆိုပြုထားပြီး၊ ထိုသို့ပြုလုပ်ရာတွင် စစ်ပြေငြိမ်းရေးကို အမြဲတမ်းရရှိရန်နှင့် အစ္စရေးတပ်များ လုံးဝဆုတ်ခွာသွားရန် ရည်ရွယ်ထားကြောင်း” သတင်းဌာနက ဖော်ပြသည်။

အီဂျစ်၊ ကာတာနှင့် အမေရိကန်ပြည်ထောင်စုတို့၏ ကြားဝင်ဆောင်ရွက်မှုကြောင့် အစ္စရေးနှင့် ဟာမတ်စ်အဖွဲ့တို့သည် ဂါဇာတွင် စစ်ပြေငြိမ်းရေးကို အကောင်အထည်ဖော်ရန်နှင့် အကျဉ်းသားများအား လွှတ်ပေးရန် သဘောတူညီချက်ရရှိခဲ့ကြောင်း ကာတာနိုင်ငံ၏ ဝန်ကြီးချုပ်နှင့် နိုင်ငံခြားရေးဝန်ကြီး Mohammed bin Abdulrahman Al Thani က ဇန်နဝါရီ ၁၅ ရက်တွင် ပြောကြားခဲ့သည်။ အဆိုပါသဘောတူညီချက်သည် အဆင့်သုံးဆင့်ပါဝင်ပြီး ဇန်နဝါရီ ၁၉ ရက်တွင် စတင်အသက်ဝင်ခဲ့သည်။ သဘောတူညီချက်၏ ပထမအဆင့် ၄၂ ရက်အတွင်း ဟာမတ်စ်အဖွဲ့သည် အစ္စရေးအကျဉ်းထောင်မှ ပါလက်စတိုင်းအကျဉ်းသား ၃၃ ဦးနှင့် လဲလှယ်ရန် အစ္စရေးဓားစာခံ ၃၃ ဦးအား လွှတ်ပေးရန် ရှိသည်။