အင်ဒိုနီးရှား အာဏာပိုင်များသည် နိုင်ငံ၏ သမိုင်းတလျှောက် အကြီးမားဆုံး မူးယစ်ဆေးဝါး ဖမ်းဆီးရမိမှုအဖြစ် ဆူမာတြားကျွန်းကမ်းလွန်တွင် မက်သာဖီတမင်း ၂ တန်ခန့် ကို ဖမ်းဆီးရမိခဲ့ကြောင်း နိုင်ငံ၏ မူးယစ်ဆေးဝါးအေဂျင်စီက တနင်္လာနေ့(မေလ ၂၆ရက်နေ့) တွင် ပြောကြားခဲ့သည်။
အဆိုပါမူးယစ်ဆေးဝါးများသည် ဂျပန်၊ နူးဇီလန်တို့ထိတိုင် ဖြန့်ဖြူးရန်အတွက် မူးယစ်ဆေးဝါးများ ထုတ်လုပ်သော ရှည်လျားသည့် သမိုင်းကြောင်းရှိ ထိုင်း၊ လာအိုနှင့် မြန်မာနိုင်ငံအရှေ့မြောက်အစိတ်အပိုင်းတို့ ထိပ်စပ်ရာ ရွှေတြိဂံဒေသရှိ မူးယစ်ဆေးဝါးဂိုဏ်းတစ်ခုနှင့် ဆက်စပ်နေသည်ဟု အေဂျင်စီက ပြောကြားခဲ့သည်။
အချိန် ငါးလကြာတိုင် စောင့်ကြည့်ထောက်လှမ်းမှုများကိုပြုလုပ်ခဲ့ပြီးနောက် ပြီးခဲ့သည့် သီတင်းပတ်တွင် အာဏာပိုင်များသည် အခင်းဖြစ်ရေပြင်သို့ သင်္ဘောများစေလွှတ်ကာ “Sea Dragon Tarawa” အမည်ရ ရေယာဉ်တစ်စီးကို ရပ်တန့်စစ်ဆေးစေခဲ့ရာ သေတ္တာများအတွင်းမှ မက်သာဖီတမင်းများကို ရှာဖွေတွေ့ရှိခဲ့ခြင်း ဖြစ်သည် ဟု အင်ဒိုနီးရှား မူးယစ်ဆေးဝါးအေဂျင်စီ အကြီးအကဲ Marthinus Hukom က သတင်းထောက်များကို ပြောကြားခဲ့သည်။
ယင်း မူးယစ်ဆေးဝါးများသည် ရွှေတြိဂံဒေသ မူးယစ်ဂိုဏ်းတစ်ခုမှ လာသည်ဟု ယူဆထားပြီး အင်ဒိုနီးရှားနိုင်ငံအပြင် မလေးရှားနှင့် ဖိလစ်ပိုင်ကဲ့သို့ အခြားအရှေ့တောင်အာရှနိုင်ငံများသို့လည်း ပို့ဆောင်ရန် ရည်မှန်းထားသည်ဟု Hukom က ပြောဆိုသည်။
မူးယစ်ဆေးဝါးတင် သင်္ဘောပေါ်ပါ အင်ဒိုနီးရှားနိုင်ငံသား လေးဦးနှင့် ထိုင်းနိုင်ငံသား နှစ်ဦးကို ဖမ်းဆီးထားသည်ဟုလည်း ၎င်းက ပြောဆိုခဲ့သည်။
“ဒီ ဖမ်းဆီးရမိမှုက အင်ဒိုနီးရှား မူးယစ်ဆေးဝါးတိုက်ဖျက်ရေးသမိုင်းမှာ အကြီးမားဆုံး ရှာဖွေတွေ့ရှိမှုဖြစ်ပါတယ်” ဟု သူက ဆိုခဲ့သည်။
ယခုလအစောပိုင်းက ကျွန်းစု၏ အနောက်ပိုင်းရှိ အလားတူဧရိယာတစ်ဝိုက်တွင် အမေရိကန်ဒေါ်လာ ၄၂၅ သန်းတန်ဖိုးရှိ မက်သာဖီတမင်းနှင့် ကိုကင်း နှစ်တန်နီးပါးသယ်ဆောင်လာသော သင်္ဘောတစ်စီးကို အင်ဒိုနီးရှားရေတပ်က ဖမ်းဆီးရမိခဲ့ပြီးနောက် ယခု မူးယစ်ဆေးဝါးများကို ထပ်မံ ဖမ်းဆီးမိခြင်းဖြစ်သည်။ ယင်းဖြစ်စဉ်တွင် ထိုင်းနိုင်ငံသားတစ်ဦးနှင့် မြန်မာနိုင်ငံသား လေးဦးတို့ ဖမ်းဆီးခံခဲ့ရကြောင်း သိရသည်။
Ref: အေးရှားဝမ်း