သီရိလင်္ကာသမ္မတဟောင်း ရာနီးလ် ဝစ်ခ်ရီမီဆင်းသည် သမ္မတတာဝန်ထမ်းဆောင်စဉ်အချိန်က ပြည်သူ့ဘဏ္ဍာငွေ အလွဲသုံးစားလုပ်ခဲ့သည်ဟူသော စွပ်စွဲချက်ဖြင့် ဖမ်းဆီးခံရပြီးနောက် တစ်ရက်အကြာ စနေနေ့တွင် ဆေးရုံတင်လိုက်ရကြောင်း ဒေသတွင်း မီဒီယာများက ဖော်ပြသည်။
စီးပွားရေးအကျပ်အတည်းကာလအတွင်းက တောင်အာရှနိုင်ငံကို ဦးဆောင်ခဲ့သူဖြစ်သော ဝစ်ခ်ရီမီဆင်း(၇၆) ကို သောကြာနေ့တွင် ဖမ်းဆီးထိန်းသိမ်းခဲ့သည်ဟု ရဲတပ်ဖွဲ့က ပြောကြားခဲ့သည်။
၎င်းသည် နောက်တစ်နေ့တွင် ရေဓာတ်ခန်းခြောက်ခြင်း၊ ဆီးချိုနှင့် သွေးတိုးရောဂါတို့ကြောင့် ကိုလံဘိုအမျိုးသားဆေးရုံ အရေးပေါ်ကုသရေးဌာနသို့ တင်ပေးထားကြောင်း ဆေးရုံဒါရိုက်တာ ဒေါက်တာ ရပ်ခ်ရှန် ဘဲလ်လာနာက သတင်းထောက်များကို ပြောကြားခဲ့သည်။ ဝစ်ခ်ရီမီဆင်းကို နောက်ပိုင်းတွင် အထူးကြပ်မတ်ကုသဆောင်သို့ ရွှေ့ပြောင်းပေးခဲ့ကြောင်းနှင့် အခြေအနေသည် တည်တည်ငြိမ်ငြိမ်ရှိကြောင်း ၎င်းက ပြောဆိုသည်။
ယမန်နှစ်က သမ္မတရာထူးကို ဆုံးရှုံးခဲ့သည့် ဝန်ကြီးချုပ်တာဝန်ကို ခြောက်ကြိမ်ထမ်းဆောင်ဖူးသူ ဝစ်ခ်ရီမီဆင်းသ်ည် ၎င်း၏ ဇနီးဖြစ်သူ၏ ဂုဏ်ထူးဆောင်ပါမောက္ခရာထူးကို ဂုဏ်ပြုရန်အတွက် ဗြိတိန်နိုင်ငံသို့ သွားရောက်ကာ အထူးဘွဲ့နှင်းသဘင်နေ့လည်စာဖြင့် တည်ခင်းခဲ့မှုနှင့် ပတ်သက်၍ စုံစမ်းစစ်ဆေးမှုခံခဲ့ရကြောင်း ဒေသတွင်းမီဒီယာများက သတင်းဖော်ပြခဲ့သည်။
၎င်းဖမ်းဆီးခံရမှုနှင့် ပတ်သက်၍ မှတ်ချက်ပြု ပြောကြားပေးရန်တောင်းဆိုမှုကို စနေနေ့တွင် ၎င်း၏ ရုံးက တုန့်ပြန်ဖြေကြားခဲ့ခြင်းမရှိပေ။ ၎င်း၏ အမျိုးသားညီညွတ်ရေးပါတီမှ မဟာမိတ်တစ်ဦးကမူ ဝစ်ခ်ရီမီဆင်းသည် အပြစ်ကင်းသူဖြစ်ကြောင်းနှင့် ယခုကိစ္စသည် နိုင်ငံရေးရည်ရွယ်ချက်တစ်ခုဖြစ်ဖွယ်ရှိကြောင်း ပြောကြားခဲ့သည်။
Ref: ယဟျူးနူးစ်