သင်္ကြန်ကာလအတွင်း နေရပ်ပြန်ကြမည့် ပြည်သူများ များပြားသဖြင့် ရထားစီးခရီးသည် ဦးရေမှာ နှစ်ဆခန့်မြင့်တက်လာကြောင်း မြန်မာ့မီးရထားမှ သိရသည်။
သင်္ကြန်ကာလ နေရပ်ပြန်များအတွက် ရထားစီးနင်းနိုင်မှု စီစဉ်ထားသည့် အခြေအနေနှင့်ပတ်သက်၍ ရန်ကုန်ဘူတာကြီးမှ တာဝန်ရှိသူထံ ဆက်သွယ်မေးမြန်းစဉ် ၎င်းက ပြန်လည်ဖြေကြားခဲ့ခြင်း ဖြစ်သည်။
” အရင်ထက် ခရီးသည်က နှစ်ဆလောက်မြင့်တက်လာတယ်။ အထက်တန်းဝယ်မရရင် ရိုးရိုးတန်းလက်မှတ်ကိုဝယ်ကြပါ။ အထူးတန်းတွဲဆိုင်း နည်းနည်းပဲထည့်ထားတာ။ ရိုးရိုးတန်းက ပိုများတယ်။ ခရီးသည်တွေကိုလည်း လက်မှတ်ကို ကိုယ်တိုင်ဝယ်ပေးဖို့ ကျွန်တော်တို့ကြေညာထားပေးပြီးသား။ တချို့ခရီးသည်တွေက ကိုယ်တိုင်တန်းစီပြီး မဝယ်ချင်ကြဘူး။ တန်းမစီပဲနဲ့ လိုချင်ကြတယ်။ ပြီးတော့မှသာ လက်မှတ်မှောင်ခိုရောင်းတယ်ဆိုပြီးအော်ကြတာ။ အထူးတန်းလက်မှတ်ဝယ်ဖို့ဆိုရင် မနက် ၅ နာရီလောက်ထပြီး ဝယ်ရမယ်”ဟု ရန်ကုန်ဘူတာကြီး ရုံပိုင်ချုပ်ကြီး ဦးသောင်းထိုက်က ပြောသည်။
ရန်ကုန် – မန္တလေး၊ မန္တလေး – ရန်ကုန်နှင့် နေပြည်တော် – ရန်ကုန် သင်္ကြန်အထူးရထားများ၊ ရန်ကုန်- မော်လမြိုင်၊ ရန်ကုန် – ပြည် နှင့် ပြည် – ရန်ကုန် အထူးရထားများကို ပြီးခဲ့သည့် ၇ ရက်မှစတင်ကာ ပြေးဆွဲပေးနေပြီ ဖြစ်ကြောင်းလည်း သိရသည်။
လာမည့် သင်္ကြန်ကာလအတွင်း လူစီးရထားများ အားလုံး ပြေးဆွဲမှု ခေတ္တရပ်နားထားမည်ဖြစ်ပြီး လာမည့် ဧပြီလ (၁၇) ရက်တွင် အထူးရထားခရီးစဉ်များကို ပြန်လည်ပြေးဆွဲပေးသွားမည်ဖြစ်ကြောင်း သိရသည်။
ယခင်က နယ်ဝေးရထား ခရီးသည်စီးနင်းမှုမှာ နေ့စဉ် ခရီးသည် ၄၀၀၀ ဝန်းကျင်သာရှိပြီး လက်ရှိတွင် ၈၀၀၀ ဝန်းကျင်အထိ စီးနင်းမှုရှိကြောင်း မြန်မာ့မီးရထားမှ သိရသည်။
