ဝန်ကြီးဌာန ၂ခုနှင့် ရုရှားသံအမတ်ကြီး တွေ့ဆုံဆွေးနွေး​ချက်များ

ပညာရေးဝန်ကြီးဌာန၊ ပြည်ထောင်စုဝန်ကြီးဒေါက်တာညွှန့်ဖေနှင့် နိုင်ငံခြားရေးဝန်ကြီးဌာန ဒု-ဝန်ကြီးဦးကိုကိုကျော်တို့သည် ဇူလိုင် ၂၈ ရက်က မြန်မာနိုင်ငံဆိုင်ရာ ရုရှားနိုင်ငံသံအမတ်ကြီး H.E Mr. Iskander Azizov နှင့်သီးခြားစီတွေ့ဆုံခဲ့ကြသည်။

ဝန်ကြီးဒေါက်တာညွှန့်ဖေနှင့်တွေ့ဆုံစဥ် ရုရှား-မြန်မာနှစ်နိုင်ငံကြား ပညာရေးကဏ္ဍပူးပေါင်းဆောင် ရွက်မှုမြှင့်တင်ရေး၊ နိုင်ငံခြားပညာတော်သင်ကိစ္စများ၊ ရုရှားဘာသာစကားပို့ချသည့် ဆရာ၊ ဆရာမများ၏ အရည်အသွေးတိုးတက်စေရေးနှင့် ရုရှားဘာသာစကားသင်ကြားရေးဆိုင်ရာများကို ဆွေးနွေးခဲ့ကြသည်။

ဒု-ဝန်ကြီးဦးကိုကိုကျော်နှင့်တွေ့ဆုံစဥ် အာဆီယံ-ရုရှား ဆွေးနွေးဖက်ဆက်ဆံရေး ပိုမိုခိုင်မြဲလာစေရန် ညှိနှိုင်းရေးမှူးနိုင်ငံဖြစ်သည့် မြန်မာနိုင်ငံက ဆောင်ရွက်လျက်ရှိသည့်များ၊ မြန်မာနိုင်ငံနှင့် ရုရှားနိုင်ငံတို့က ပူးတွဲဥက္ကဋ္ဌများအဖြစ်ကြီးမှူး၍ မလေးရှားနိုင်ငံ ကွာလာလမ်ပူမြို့၌ ၂၀၂၅ ခုနှစ်၊ ဇူလိုင် ၁၀ ရက်ကကျင်းပခဲ့သော အာဆီယံ-ရုရှား နိုင်ငံခြားရေးဝန်ကြီးများအစည်းအဝေး၏ ဖြစ်ပေါ်တိုးတက်မှုရလဒ်များကို ဆွေးနွေးခဲ့ကြသည်။

ထို့ပြင် အရှေ့အာရှထိပ်သီးအစည်းအဝေးနှင့် အာဆီယံဒေသဆိုင်ရာဖိုရမ်ကဲ့သို့သော အာဆီယံဦးဆောင်သည့် ယန္တရားများအောက်မှ အာဆီယံနှင့် ရုရှားကြား ထိတွေ့ဆက်ဆံမှုနှင့် ပူးပေါင်းဆောင်ရွက်မှုအပါအဝင် အကျိုးတူကိစ္စများကိုလည်း ဆွေးနွေးခဲ့ကြသည်။

ဆွေးနွေးမှုအပြီး၌ ရုရှားသံအမတ်ကြီးမှ ၂၀၂၅ ခုနှစ်၊ ဧပြီ ၁၈ ရက်ကကျင်းပခဲ့သည့် အာဆီယံ-ရုရှားအွန်လိုင်းစစ်တုရင်ပြိုင်ပွဲတွင် ပါဝင်ယှဉ်ပြိုင်ခဲ့သော နိုင်ငံခြားရေးဝန်ကြီးဌာနမှ ကစားသမား(၆) ဦးကို အမှတ်တရလက်ဆောင်များပေးအပ်ပြီး မော်စကိုဒေသစစ်တုရင်အဖွဲ့ဥက္ကဋ္ဌနှင့် ရုရှားဖက်ဒရေးရှင်းဖက်ဒရယ်ကောင်စီအဖွဲ့ဝင် Mr. Sergei Karjakin ၏ လက်မှတ်ရေးထိုးထားသည့် စစ်တုရင်ခုံကို ဒု-ဝန်ကြီးထံလွှဲပြောင်းပေးအပ်ခဲ့သည်။