လှော်ကား ရေတွန်းစက်ရုံ နှစ်နာရီခန့် ပြုပြင်မည်ဖြစ်၍ ရန်ကုန်တိုင်းရှိ မြိုနယ် ၁၆ မြို့နယ်တွင် ရေခေတ္တပြတ်တောက်မည်

ရန်ကုန်၊ ဇူလိုင်-၂၅

လှော်ကားရေလှောင်ကန်ရှိ ရေတွန်းစက်ရုံ ပြုပြင်ထိန်းသိမ်းခြင်းလုပ်ငန်းများ ဆောင်ရွက်မည်ဖြစ်သောကြောင့် လာမည့် ဇူလိုင် (၂၇) ရက် (တနင်္လာနေ့) နေ့လယ်ပိုင်းတွင် ရန်ကုန်မြို့ရှိ မြို့နယ် (၁၆) မြို့နယ်၌ ရေပြတ်တောက်ခြင်းနှင့် ရေအားနည်းခြင်းများ ဖြစ်ပေါ်နိုင်ကြောင်း ရန်ကုန်မြို့တော်စည်ပင်သာယာရေးကော်မတီ၊ အင်ဂျင်နီယာဌာန (ရေနှင့်သန့်ရှင်းမှု) မှ အသိပေး ထုတ်ပြန်ထားသည်။​

လှော်ကားရေတွန်းစက်ရုံရှိ 33/6 kV, 4 MVA Transformer သည် OLCT Control ပိုင်း ချို့ယွင်းမှု ဖြစ်ပေါ်နေသဖြင့် ဇူလိုင် (၂၇) ရက် နေ့လယ် (၁:၀၀) နာရီမှ (၃:၀၀) နာရီအထိ ရေတွန်းစက်ကြီးများကို ခေတ္တရပ်နားကာ ပြုပြင် ထိန်းသိမ်းသွားမည် ဖြစ်သည်။​

ထိုသို့ ပြုပြင်စဉ်ကာလအတွင်း လှော်ကားရေလှောင်ကန်မှ ရေဖြန့်ဖြူးပေးဝေလျက်ရှိသည့် မင်္ဂလာဒုံ၊ ရွှေပြည်သာ၊ မရမ်းကုန်း၊ လှိုင်၊ လှိုင်သာယာ (စက်မှုဇုန်)၊ အင်းစိန်၊ ကမာရွတ်၊ ဗဟန်း၊ ပန်းဘဲတန်း၊ ကျောက်တံတား၊ လမ်းမတော်၊ လသာ၊ တာမွေ၊ မင်္ဂလာတောင်ညွန့်၊ ပုဇွန်တောင်နှင့် ဗိုလ်တထောင် စသည့် မြို့နယ်များ၌ ရေပြတ်တောက်ခြင်းနှင့် ရေအားနည်းခြင်းများ ဖြစ်ပေါ်နိုင်မည်ဖြစ်သည်။​

သို့ဖြစ်ပါ၍ အဆိုပါ မြို့နယ်များတွင် နေထိုင်ကြသော ရေသုံးစွဲသူ ပြည်သူများအနေဖြင့် ရေများ ကြိုတင် စုဆောင်းထားကြရန်နှင့် ရေသုံးစွဲရန် အခက်အခဲ ဖြစ်ပေါ်ပါက သက်ဆိုင်ရာ ခရိုင်အလိုက် ဆက်သွယ်နိုင်သည့် ဖုန်းနံပါတ်များသို့ ဆက်သွယ် အကူအညီတောင်းခံနိုင်ကြောင်း သိရသည်။