လွှတ်တော်ကိုယ်စားလှယ်များအနေဖြင့် နိုင်ငံတကာလွှတ်တော်များ၊ အာဆီယံလွှတ်တော်များနှင့် နိုင်ငံတကာဆက်ဆံရေး တိုးမြှင့်ဆောင်ရွက်ရန်၊ အာဆီယံဒေသတွင်းလွှတ်တော်အဖွဲ့အစည်းများနှင့်ကဏ္ဍပေါင်းစုံမှ ပူးပေါင်းဆောင်ရွက်နိုင်ရေးပြင်ဆင်ဆောင်ရွက်ရမည်ဟု ပြည်သူ့ လွှတ်တော်ဥက္ကဋ္ဌဦးခင်ရီက ရန်ကုန်တိုင်းရှိ လွှတ်တော်ကိုယ်စားလှယ်များနှင့် မေ ၂ ရက်တွင်တွေ့ဆုံရာ၌ ပြောကြားခဲ့ခြင်းဖြစ်သည်။
ဥပဒေပြုရေးမဏ္ဍိုင်၊ အုပ်ချုပ်ရေးမဏ္ဍိုင်၊ တရားစီရင်ရေးမဏ္ဍိုင်ကြီးသုံးရပ်ကို ကဏ္ဍအလိုက်အပြန်အလှန်ပေါင်းစပ်ညှိနှိုင်းပြီး စစ်မှန်စည်းကမ်းပြည့်ဝသော ဒီမိုကရေစီအလေ့အကျင့်ကောင်းများရရှိအောင်တည်ဆောက်ရန်၊ ဥပဒေပြုမဏ္ဍိုင်အနေဖြင့် ဥပဒေ၏ အကာအကွယ်အောက်တွင် နိုင်ငံတော်နှင့် နိုင်ငံသူ၊ နိုင်ငံသားများကို အေးအေးချမ်းချမ်းနေနိုင်ရေးအတွက် ဆောင်ရွက်ပေးနိုင်အောင်ကြိုးစားရန် ပြောသည်။
လွှတ်တော်ကိုယ်စားလှယ်များသည် ပြည်သူများကယုံယုံကြည်ကြည်ဖြင့် ဆန္ဒမဲပေးရွေးချယ်ထားသည့် ပြည်သူ့ကိုယ်စားလှယ်များဖြစ်၍ ပြည်သူများ၏ ဆန္ဒနှင့်မျှော်လင့်ချက်များကို အထူးအလေးထားဆောင်ရွက်ရန်၊ လွှတ်တော်ကိုယ်စားလှယ်များ ဥပဒေရေးရာများကိုနားလည်တတ်ကျွမ်းရန်၊ နိုင်ငံတော်တွင် ပကတိဖြစ်ပေါ်နေသည့် အခြေအနေအရပ်ရပ်နှင့် တည်ဆဲဥပဒေများကိုနှိုင်းယှဉ်သုံးသပ်ပြီး နိုင်ငံသူ၊ နိုင်ငံသားများကို ဥပဒေအကာအကွယ်အောက်တွင်ထားရှိနိုင်ရေးကြိုးပမ်းဆောင်ရွက်ရန် ပြောသည်။
နိုင်ငံတော်၏ကဏ္ဍအသီးသီးမှ ဆောင်ရွက်လျက်ရှိသည့် လုပ်ငန်းစဉ်များကို ပြည်သူလူထုများနားလည်ပြီး ပူးပေါင်းပါဝင်လာအောင်လွှတ်တော်ကိုယ်စားလှယ်များကဆောင်ရွက်ရန်၊ ပြည်သူလူထုအကျပ်အတည်းဖြစ်စေသည့်ကိစ္စများကို နိုင်ငံတော်အစိုးရနှင့်ပူးပေါင်း ၍ ပြည်သူလူထု၏မျှော်မှန်းချက်၊ မျှော်လင့်ချက်များကို အကောင်အထည်ဖော်ဆောင်ရွက်နိုင်ရေးအတွက် စွမ်းရည်မြင့်မားသည့် လွှတ်တော်ကိုယ်စားလှယ်များဖြစ်အောင်ကြိုးပမ်းဆောင်ရွက်ရန် ပြောကြားခဲ့သည်။
ထို့နောက် ပြည်သူ့လွှတ်တော်ဥက္ကဋ္ဌဦးခင်ရီက ရန်ကုန်တိုင်းဒေသကြီးလွှတ်တော်အစည်းအဝေးခန်းမအား ကြည့်ရှုစစ်ဆေးခဲ့သည်။