အမေရိကန်ပြည်ထောင်စု လော့စ်အိန်ဂျလိစ်တွင် တောမီးပြန့်နှံ့ပြီး ယင်းဧရိယာအတွင်း မဖြစ်မနေ ဘေးလွတ်ရာရွှေ့ပြောင်းရန် အမိန့်ထုတ်ပြန်ခဲ့ပြီးနောက် ဟောလိဝုဒ်တောင်ကုန်းတွင် အရှိန်အဟုန်ဖြင့် မီးလောင်မှုဖြစ်ပွားခဲ့ကြောင်း မီးသတ်အရာရှိက ပြောကြားခဲ့သည်။
ကယ်လီဖိုးနီးယားမီးသတ်အကြီးအကဲ ဒေးဗစ် အကူနာက ပြောကြားရာတွင် လေပြင်းတိုက်ခတ်မှုနှင့် ခြောက်သွေ့သော အခြေအနေများကြောင့် မီးထိန်းနိုင်မှုမှာ တိုးတက်မှု လုံးဝမရှိကြောင်း သိရသည်။
“လေဟာ မနေ့က မနက်ကတည်းက တစ်နာရီ မိုင် ၆၀ ကနေ ၁၀၀ နှုန်းလောက်နဲ့ အဆက်မပြတ်တိုက်နေတယ်” ဟု အကူနာကပြောကြားခဲ့သည်။ “မနေ့ညကတည်းက လေပြင်းတွေ တိုက်နေခဲ့တာ”ဟုလည်း သူကဆိုသည်။
လော့စ်အိန်ဂျလိစ်တခွင်တွင် အနည်းဆုံး မီးလောင်ကျွမ်းမှု ၅ ခု ရှိနေပြီး လက်ရှိအချိန်အဖိလူငါးဦး ေ-သဆုံးကြောင်း အတည်ပြုထားသည်။
လေတိုက်နှုန်းမှာ အချို့နေရာများတွင် တစ်နာရီ မိုင် ၃၀ ခန့်အထိ ကျဆင်းသွားသော်လည်း “လေပြင်းတဲ့ နေရာတွေ အများကြီးရှိတာကြောင့် ဒါဟာ အလွန်အန္တရာယ်များပါတယ်” ဟု ကယ်လီဖိုးနီးယားမီးသတ်အကြီးအကဲ ဒေးဗစ် အကူနာကပြောသည်။
ယခုအချိန်အဖိ လူပေါင်း ၁၃၀၀၀၀ ကျော်ကို ဘေးလွတ်ရာသို့ ရွှေ့ပြောင်းခဲ့ရပြီး Paris Hilton နှင့် Billy Crystal အပါအဝင် နာမည်ကျော် ဟောလိဝုဒ်သရုပ်ဆောင် အများအပြား၏ နေအိမ်များ ပျက်စီးဆုံးရှုံးခဲ့သည်။
မာလီဘူးမြို့ အနီးရှိ ပစိဖိတ် ပါလီဆိတ်ဒ်ရပ်ကွက်တွင် အင်္ဂါနေ့က ပထမဆုံး မီးစတင်လောင်ကျွမ်းခဲ့ပြီးနောက်မြို့၏ မြောက်ဘက်တွင် မီးလောင်မှုများ ထပ်ဆင့် ဖြစ်ပွားခဲ့သည်။
ဒေသစံတော်ချိန် ၂၀:၁၅ နာရီ (၀၄း၀၀ ဂရင်းနစ်စံတော်ချိန်) အရ ပါလီဆိတ်ဒ်စ်၊ ပါဆာဒန်နာ၊ ဆယ်လ် နှင့် ဟောလိဝုဒ်တောင်ကုန်းဒေသများရှိ ဧရိယာ လေးခုတွင် မီးလောင်ကျွမ်းမှုသည် ဧက ၂၇၀၀၀ ကျော် (၄၂ စတုရန်းမိုင်/၁၀၉ စတုရန်းကီလိုမီတာ) ရှိပြီး မီး ထိန်းနိုင်ခြင်းမရှိကြောင်း လော့စ်အိန်ဂျလိစ်မီးသတ်ဌာနမှ သိရသည်။