လော့စ်အိန်ဂျလိစ် တောမီးဒဏ်သင့် ဒေသခံ ထောင်ပေါင်းများစွာကို ဘေးလွတ်ရာသို့ ရွှေ့ပြောင်းရန် အမိန့်ပေးထားကြောင်း ဒေသရဲအရာရှိ ရောဘတ်လူနာက သတင်းထောက်များအား ပြောကြားခဲ့သည်။
“အခုလောလောဆယ် လူပေါင်း ၁၈၀,၀၀၀ နီးပါးကို ဘေးလွတ်ရာ ရွှေ့ပြောင်းဖို့ အမိန့်ပေးထားပြီး နောက်ထပ် လူ ၂သိန်းနီးပါးကိုလဲ ဘေးလွတ်ရာကို ရွှေ့ပြောင်းဖို့ သတိပေးထားပါတယ်” ဟု သူက ပြောကြားခဲ့သည်။
မီးဘေးအတွင်း လုယက်သူ နှစ်ဒါဇင်ခန့်ကိုလည်း ဖမ်းဆီးထားကြောင်း အဆိုပါ ရဲအရာရှိက ပြောသည်။
“အခုအချိန်အထိ ဖ-မ်းဆီးထားတာ အယောက် (၂၀)ရှိပြီ။ အဲဒီအရေအတွက် တိုးလာမယ်လို့ထင်ပါတယ်။ ဒီလိုအချိန်မှာ ခုလိုလုပ်တာမျိုးကို ကျွန်တော်တို့ သည်းမခံနိုင်ပါဘူး”ဟု ရဲမှူးက ပြောသည်။
နောက်ဆုံးရသတင်းများအရ လော့စ်အိန်ဂျလိစ်နယ်မြေတွင် တောမီးကြီးငါးခု လောင်ကျွမ်းနေပြီး စုစုပေါင်းမြေဧက ၂၉,၀၀၀ နီးပါး မီးလောင်ကျွမ်းခဲ့ပြီး၊ ယင်းတို့အနက် တောမီး နှစ်ခုကိုသာ တစ်စိတ်တစ်ပိုင်း ထိန်းနိုင်ခဲ့သည်။ မြို့တော်၏ အခမ်းနားဆုံး ခရိုင်အချို့ အပါအဝင် မီးလောင်ကျွမ်းမှုကြောင့် အဆောက်အဦ ၁,၀၀၀ ကျော် ပျက်စီးခဲ့သည်။ တောမီးကြောင့် အိုးအိမ်ဆုံးရှုံးခဲ့ရသည့် နာမည်ကြီးများထဲတွင် အမေရိကန်သမ္မတ ဂျိုးဘိုင်ဒင်၏သား ဟန်တားဘိုင်ဒင်နှင့် သရုပ်ဆောင်မော်ဒယ် ပဲရစ်ဟီလ်တန် တို့လည်း ပါဝင်သည်။
လေပြင်းတိုက်ခတ်ခြင်းနှင့် ခြောက်သွေ့သော ရာသီဥတုအခြေအနေများ သည် အနည်းဆုံးသောကြာနေ့အထိ ဆက်လက်တည်ရှိနေမည်ဟု မျှော်လင့်ရသည်။ ဒေသအာဏာပိုင်များသည် အိမ်နီးချင်း ခရိုင်များမှ မီးသတ်သမားများနှင့် ဝါရှင်တန်၊ အော်ရီဂွန်နှင့် နီဗားဒါး ပြည်နယ်များထံမှ အရေးပေါ် ဝန်ဆောင်မှုများ တောင်းခံထားသည်။