လော့စ်ဆန်းဂျလိစ်တောမီး ‌ေ-သဆုံးသူ ၁၆ ဦးရှိလာ၊ မီးငြိမ်းရေး အပြင်းအထန်ကြိုးပမ်းနေ

လေပြင်းများတိုက်ခတ်လာမှုကြောင့် လော့စ်ဆန်းဂျလိစ်မြို့တစ်ဝိုက် လောင်ကျွမ်းလျက်ရှိသော တောမီးကြီးကို ထိန်းချုပ်နိုင်ရန် စနေနေ့တွင် မီးသတ်သမားများက အချိန်နှင့်တပြေးညီ အသည်းအသန်ကြိုးပမ်းခဲ့ကြပြီး တောမီးသည် ရပ်ကွက်သစ်များသို့ ဦးတည်လောင်ကျွမ်းလျက်ရှိသည်။

မြို့ကြီးတစ်ဝန်း လောင်ကျွမ်းလျက်ရှိသော တောမီးကြောင့် ‌ေ-သဆုံးသူ ၁၆ ဦးထက်မနည်းရှိခဲ့ပြီဟု အတည်ပြုထားကာ လူနေရပ်ကွက်များကို အပျက်အစီးပြင်ဖြစ်စေခဲ့ပြီး ထောင်နှင့်ချီသော မီးသတ်သမားများနှင့် သန်းနှင့်ချီသော ကယ်လီဖိုးနီးယားပြည်နယ်သားတို့၏ ခံနိုင်ရည်ကို စမ်းသပ်နေခဲ့သည်။

ဝေဟင်တပ်ဖွဲ့ဝင်များ၏ တိကျသေချာသော ဝေဟင်မီးငြိမ်းသတ်မှုများအပါအဝင် သူရဲကောင်းဆန်ဆန် ကြိုးပမ်းငြိမ်းသတ်မှုများလုပ်နေသော်လည်း တောမီးကြီးသည် ဇန်နဝါရီ ၁၁ ရက်တွင် ဆက်လက်ကြီးထွားနေခဲ့ပြီး အရှေ့ဘက်ရှိ အဖိုးမဖြတ်နိုင်သော လက်ရာပစ္စည်းများစုစည်းထားရာ Getty Centre အနုပညာပြတိုက်နှင့် မြောက်ဘက်ရှိ လူဦးရေထူထပ်သော San Fernando တောင်ကြားဆီသို့ ဦးတည်လောင်ကျွမ်းလျက်ရှိသည်။

လေပြင်းတိုက်ခတ်မှုများကြောင့် လာမည့်ရက်ပိုင်းအထိ မီးလောင်ကျွမ်းမှု အားကောင်းလာမည်ဟု ရာသီဥတုခန့်မှန်းသူများက သတိပေးခဲ့သည်။

ကယ်လီဖိုးနီးယားတောင်ပိုင်း၏ စိုးရိမ်ရသော မီးဘေးရာသီအခြေအနေများသည် ယနေ့တွင် ကံအကြောင်းမလှစွာဖြင့် ပြန်မြင့်တက်လာမည်ဖြစ်ကြောင်းနှင့် အနည်းဆုံး နောက်သီတင်းပတ်အစောပိုင်းအထိ ကြာမြင့်နိုင်ကြောင်း နိုင်ငံတော်မိုးလေဝသဌာနက ပြောကြားခဲ့သည်။

“ဒီအတွက်ကြောင့် မီးလောင်တဲ့နေရာက ပိုမိုကျယ်ပြန့်လာနိုင်ပြီး မီးလောင်ပြင်အသစ်တွေလည်း ဖြစ်ပေါ်လာနိုင်ပါတယ်” ဟု ဆိုခဲ့သည်။

မြို့ကို ဖုံးလွှမ်းနေသော ထူထဲသောမီးခိုးများမှ အဆိပ်အတောက်များ မရှုရှိုက်မိစေရန် မီးဘေးကြုံရသူများအနေဖြင့် အဆောက်အအုံများအတွင်းသာနေထိုင်ကြရန်နှင့် နှာခေါင်းစည်းများတပ်ဆင်ကြရန် သတိပေးထားသည်။

တရားဝင်ကိန်းဂဏန်းများအရ မီးလောင်မှုအတွင်း အဆောက်အအုံပေါင်း ၁၂,၀၀၀ ကျော် မီးကျွမ်းခဲ့သည်ဟု ဆိုသော်လည်း ကယ်လီဖိုးနီးယား သစ်တောနှင့်မီးဘေးကာကွယ်ရေးအရာရှိ တော့ဒ် ဟော့ကင်းစ်က ယင်းတွင် အားလုံးသည်နေအိမ်များချည်းမဟုတ်ကြောင်း၊ ဘေးဆွယ်အဖီများ၊ ယာဉ်များနှင့် တဲများကို လည်းပါဝင်ကြောင်း ဆိုခဲ့သည်။

Ref: သည်စထရိတ်တိုင်းမ်စ်