ရှမ်း/မြောက် လားရှိုးမြို့တွင် ကုတင် (၅၀၀) ဆံ့ပြည်သူ့ဆေးရုံအပါအဝင် ဌာနဆိုင်ရာလုပ်ငန်းများ စတင်လည်ပတ်နေပြီဖြစ်ကြောင်းနှင့် ဝန်ထမ်းမိသားစုများ၊ စစ်ရှောင်မြို့ခံများလည်း ပြန်လည်ဝင်ရောက်အခြေချနေထိုင်နေပြီဖြစ်သည်ဟု ဒေသတွင်းသတင်းရင်းမြစ်တစ်ဦးက ပြောသည်။
လက်ရှိတွင် လားရှိုးပြည်သူ့ဆေးရုံကြီးကို မေလ ၂ ရက် နံနက် ၉ နာရီက ဖွင့်လှစ်ခဲ့ပြီး အရေးပေါ်ကုသမှုများ ဆောင်ရွက်နေကာ အခြားသော အထွေထွေအုပ်ချုပ်ရေးမှုးရုံး၊ စည်ပင်သာယာရေးဦးစီးဌာနတို့လည်း လုပ်ငန်းများစတင်လုပ်ဆောင်နေပြီဖြစ်သည်ဟု ဆိုသည်။
” ဝန်ထမ်းမိသားစုတော်တော်များများလည်း ပြန်ရောက်ပြီ၊ မြို့ခံတော်တော်များများလည်း ပြန်ရောက်ပြီ။ မြို့တွင်းတော့ လျှပ်စစ်မီးမရသေးဘူး။ တဖြည်း ဖြည်းတော့ပြန်ရလာမယ်ထင်တယ်။”ဟု ရှင်းပြသည်။
လားရှိုးမြို့တွင် နစက ကပြန်လည်အခြေချရန် ပြီးခဲ့သည့် မတ်လနောက်ဆုံးပတ်အတွင်း ကိုးကန့်တပ်ဖြင့် နှစ်ရက်ကြာ တွေ့ဆုံဆွေးနွေးမှုများအပြီး ဧပြီ (၂၂) ရက်နေ့တွင် တပ်မတော်နှင့် ဌာနဆိုင်ရာများ လားရှိုးမြို့သို့ပြန် လည်ဝင်ရောက်လာခဲ့သည်။
ထို့နောက် မေ(၁)ရက်နေ့မှစတင်၍ တရားဥပဒေစိုးမိုးရေးအတွက် ရဲတပ်ဖွဲ့ဝင်များအရပ်ဘက် ဌာနဆိုင်ရာဝန်ထမ်းများပြန်လည်ရောက်ရှိခဲ့ကြခြင်း ဖြစ်သည်။
လားရှိုးမြို့သို့ ပြန်လည်ဝင်ရောက်နေထိုင်ကြသည့် ပြည်သူများအနေဖြင့်လည်းလုံခြုံရေးနှင့် တရားဥပဒေစိုးမိုးမှုကိုထိခိုက်စေမည့် ခိုးဆိုးလုယက် အနိုင့်အထက် တရားဥပဒေမဲ့ကျူးလွန်မှုများနှင့်စပ်လျဥ်းပြီး မြို့မရဲစခန်းသို့ လူကိုယ်တိုင်လာရောက်၍ သတင်းပေးတိုင်ကြားနိုင်ပြီဖြစ်ကြောင်း သိရသည်။