ရှီ-ထရမ့် တွေ့ဆုံပွဲမတိုင်မီ အမေရိကန်နှင့် တရုတ်ကိုယ်စားလှယ်တို့ တောင်ကိုရီးယားတွင် ဆွေးနွေးမည်

တရုတ်နိုင်ငံ သမ္မတ ရှီကျင့်ဖိန်နှင့် တွေ့ဆုံရန်အတွက် အမေရိကန်သမ္မတထရမ့်သည် ဗုဒ္ဓဟူးနေ့မှ သောကြာနေ့အထိ တရုတ်နိုင်ငံသို့ သွားရောက်ရန် စီစဉ်ထားသည်။

အမေရိကန်သမ္မတ ဒေါ်နယ်ထရမ့်၏ ယခုအပတ် ပေကျင်းခရီးစဉ်မတိုင်မီ ကုန်သွယ်ရေးအငြင်းပွားမှုများကို ဖြေရှင်းနိုင်ရန် တရုတ်နှင့် အမေရိကန် ကိုယ်စားလှယ်များသည် ဆွေးနွေးပွဲတစ်ရပ် ပြုလုပ်သွားမည်ဖြစ်ကြောင်း ပေကျင်းရှိ ကူးသန်းရောင်းဝယ်ရေးဝန်ကြီးဌာနက တနင်္လာနေ့တွင် ကြေညာခဲ့သည်။

တရုတ်ဒုတိယဝန်ကြီးချုပ် ဟဲလိဖုန်းသည် ကိုယ်စားလှယ်အဖွဲ့နှင့်အတူ အင်္ဂါနေ့မှ ဗုဒ္ဓဟူးနေ့အထိ တောင်ကိုရီးယားနိုင်ငံ မြို့တော် ဆိုးလ်သို့ သွားရောက်မည်ဖြစ်ကြောင်း ဝန်ကြီးဌာနက ပြောကြားခဲ့သည်။ အဆိုပါ ဆွေးနွေးပွဲတွင် နှစ်ဖက်အကျိုးတူ စီးပွားရေးနှင့် ကုန်သွယ်ရေးဆိုင်ရာ ကိစ္စရပ်များကို ဆွေးနွေးသွားမည်ဖြစ်ကြောင်းလည်း ဖြည့်စွက်ပြောကြားခဲ့သည်။

အမေရိကန် ဘဏ္ဍာရေးဝန်ကြီး စကော့ ဘဲဆင့်ကလည်း အဆိုပါ တွေ့ဆုံမှုကို လူမှုကွန်ရက် ပလက်ဖောင်း X တွင် အတည်ပြုခဲ့သည်။

ဘဲဆင့်က ၎င်းအနေဖြင့် “ဂျပန်နှင့် တောင်ကိုရီးယားနိုင်ငံတို့တွင် ဆက်တိုက်ပြုလုပ်မည့် အစည်းအဝေးများအတွက်” တနင်္လာနေ့တွင် စတင်ထွက်ခွာမည်ဖြစ်ကြောင်း ပြောကြားခဲ့သည်။

သူသည် အင်္ဂါနေ့တွင် တိုကျိုမြို့၌ ဂျပန်ဝန်ကြီးချုပ် စနာအေ တာကာအီချီ နှင့် တွေ့ဆုံကာ နှစ်နိုင်ငံစီးပွားရေး ဆက်ဆံရေးကို ဆွေးနွေးရန် စီစဉ်ထားသည်။ ဗုဒ္ဓဟူးနေ့တွင်မူ ဆိုးလ်မြို့၌ ခေတ္တရပ်နားကာ ဒုတိယဝန်ကြီးချုပ် ဟဲ နှင့် တွေ့ဆုံမည်ဖြစ်ပြီး၊ ထို့နောက် တရုတ်သမ္မတ ရှီကျင့်ဖိန်နှင့် တွေ့ဆုံမည့် သမ္မတထရမ့်၏အဖွဲ့ထံသို့ သွားရောက်ပူးပေါင်းမည်ဖြစ်ကြောင်း ဘဲဆင့်က ရေးသားခဲ့သည်။

ဘဲဆင့်နှင့် ဟဲတို့သည် ယခင်ကပြုလုပ်ခဲ့သော ညှိနှိုင်းဆွေးနွေးပွဲများတွင်လည်း ၎င်းတို့နိုင်ငံများကို ကိုယ်စားပြု တက်ရောက်ခဲ့ကြသူများ ဖြစ်သည်။ ကမ္ဘာ့အကြီးဆုံး စီးပွားရေးအင်အားကြီး နှစ်နိုင်ငံအကြား ပြီးခဲ့သည့်နှစ်က ဖြစ်ပွားခဲ့သော ကုန်သွယ်ရေးအငြင်းပွားမှုကြောင့် အပြန်အလှန် အခွန်တိုးမြှင့်မှုများ ဖြစ်ပေါ်ခဲ့သည်။ တရုတ်နိုင်ငံက အဓိကကုန်ကြမ်းပစ္စည်းများအပေါ် ပို့ကုန်ကန့်သတ်မှုများဖြင့် တုံ့ပြန်ခဲ့ရာ ကမ္ဘာတစ်ဝန်းရှိ စက်မှုလုပ်ငန်းများကို ဆိုးကျိုးသက်ရောက်စေခဲ့သည်။

အောက်တိုဘာလကုန်ပိုင်းက တောင်ကိုရီးယားနိုင်ငံ၊ ဘူဆန်မြို့တွင် ပြုလုပ်ခဲ့သော ရှီနှင့် ထရမ့်တို့၏ တွေ့ဆုံမှုက အခွန်တိုးမြှင့်မှု အငြင်းပွားမှုကို ယာယီရပ်တန့်စေခဲ့သည်။ သို့သော်လည်း မြေရှားသတ္တု တင်ပို့မှု ကန့်သတ်ချက်များကဲ့သို့သော တားမြစ်ချက်များမှာမူ ဆက်လက်တည်ရှိနေဆဲ ဖြစ်သည်။