ယခုနှစ် ဒီဇင်ဘာလအတွင်း၌ လွတ်လပ်၍တရားမျှတသည့် ပါတီစုံဒီမိုကရေစီအထွေထွေရွေးကောက်ပွဲကျင်းပပြီးချိန်တွင် ဆောင်ရွက်မည့်လုပ်ငန်းစဥ်များနှင့်ပတ်သက်၍ ယနေ့ မေ ၂၀ ရက်ကကျင်းပသည့် နိုင်ငံတော်စီမံအုပ်ချုပ်ရေးကောင်စီအစိုးရအဖွဲ့ လုပ်ငန်းညှိနှိုင်းအစည်းအဝေး ဒုတိယနေ့တွင် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ပြောကြားခဲ့ခြင်းဖြစ်သည်။
ရွေးကောက်ပွဲပြီးဆုံးချိန်တွင် အနိုင်ရသည့်ပါတီ အား မိမိတို့အနေဖြင့် နိုင်ငံတော်တာဝန်များကို ပြန်လည်အပ်နှင်းပေးသွားမည်ဖြစ်ကာ မိမိတို့အစိုးရတာဝန်ထမ်းဆောင်ခဲ့သည့်အချိန်မှစ၍ တာဝန်များပြန်လည်လွှဲပြောင်းပေးသည်အထိဆောင်ရွက်ခဲ့မှု မှတ်တမ်းများကို စနစ်တကျဖြင့်ပြုစုထိန်းသိမ်း ဆောင်ရွက်ရမည်ဟု ပြောကြားခဲ့သည်။
ထို့အတူ နစက ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်းမှလည်း ပါတီစုံဒီမိုကရေစီအထွေထွေရွေးကောက်ပွဲတစ်ရပ်ကို ယခုနှစ်လကုန်ပိုင်းတွင်ကျင်းပသွားမည်ဖြစ်၍ တိုင်းနှင့်ပြည်နယ်ဝန်ကြီးချုပ်များအနေဖြင့် ရွေးကောက်ပွဲအောင်မြင်မှုရှိစေရေးအတွက် လိုအပ်သည်များကို ကြိုတင်ပြင်ဆင်ဆောင်ရွက်ထားရမည်ဖြစ်ပြီး တိုင်းနှင့် ပြည်နယ်များအလိုက် ရွေးကောက်ပွဲဆိုင်ရာအချက်အလက်များကို ပြည့်စုံစွာဆောင်ရွက်ရမည်ဟု ပြောသည်။
ထို့အတူ လွတ်လပ်ပြီးတရားမျှတသည့် ရွေး ကောက်ပွဲအောင်မြင်စွာကျင်းပနိုင်ရေးအတွက် လုံခြုံရေးနှင့်တည်ငြိမ်အေးချမ်းရေးသည် အဓိကကျသဖြင့် ရွေးကောက်ပွဲဆောင်ရွက်၍ရနိုင်သည့်နေရာများအားလုံး၌ တည်ငြိမ်အေးချမ်းမှုရှိအောင် ဆောင်ရွက်ရမည်ဖြစ်ကာ ရွေးကောက်ပွဲကျင်းပပြီးစီးချိန်၌ အနိုင်ရပါတီအား အာဏာလွှဲပြောင်း ပေးအပ်ချိန်တွင် စနစ်တကျလွှဲပြောင်းပေးအပ်နိုင်ရေးကိုလည်း ကြိုတင်ပြင်ဆင်ဆောင်ရွက်ထားရမည်ဟု ပြောသည်။
ထို့ပြင် မိမိတို့အနေဖြင့် နိုင်ငံ့အရေးကိုဆောင်ရွက်ခြင်းဖြစ်ရာ မိမိတို့အစိုးရအဖွဲ့တာဝန်ယူဆောင်ရွက်ချိန်မှစ၍ အာဏာရပါတီအားလွှဲပြောင်းချိန်အထိပြည်သူများအထင်အမြင်လွဲမှားမှုမရှိစေရေး၊ မိမိတို့ကိုယ်တိုင်နှင့် မိမိတို့လက်အောက်ဝန်ထမ်းများအား စနစ်တကျဆောင်ရွက်စေရေးတို့ကို ကြပ်မတ်ဆောင်ရွက်ရမည်ဟုလည်း ဒု-ဗိုလ်ချုပ်မှူးကြီးစိုးဝင်းက ပြောကြားခဲ့သည်။