သြဂုတ်လအတွင်းကအမေရိကသို့ တင်ပို့ခဲ့သော ပုစွန်များတွင် ရေဒီယိုသတ္တိကြွပစ္စည်းပါဝင်ေနသည်ကို စစ်ဆေးတွေ့ရှိခဲ့သဖြင့် အင်ဒိုနီးရှားနိုင်ငံ၏ ပုစွန်ပြုပြင်ထုတ်လုပ်မှု သည် ၃၀ မှ ၃၅ ရာခိုင်နှုန်းအထိ ကျဆင်းသွားခဲ့ကြောင်း နိုင်ငံ၏ ပုစွန်မွေးမြူသူများအသင်းက အောက်တိုဘာလ ၃ ရက် နေ့တွင် ပြောကြားခဲ့သည်။
အဆိုပါ ပုစွန်များကို ဂျကာတာအနီးရှိ စက်မှုဇုန်တစ်ခုတွင် ပြုပြင်ထုပ်ပိုးခဲ့ခြင်းဖြစ်ပြီး နောက်ပိုင်းတွင် ရေဒီယိုသတ္တိကြွ ဆက်စီယမ် ၁၃၇ ကို စစ်ဆေးတွေ့ရှိခဲ့သည်။
ရေဒီယိုသတ္တိကြွမှု သက်ရောက်ခဲ့သည့် ဧရိယာ အကျယ်အဝန်းကို တိကျစွာသိရရန် အင်ဒိုနီးရှားနျူကလီးယားအေဂျင်စီက ကြိုးပမ်းနေသည်။
အင်ဒိုနီးရှားနိုင်ငံသည် ကမ္ဘာ့ပဉ္စမမြောက် ပုစွန်တင်ပို့မှုအများဆုံးနိုင်ငံဖြစ်ပြီး ကမ္ဘာလုံးဆိုင်ရာ တင်ပို့မှု၏ ၆ ရာခိုင်နှုန်းရှိသည်။ ၎င်း၏ ပုစွန်ပို့ကုန် သုံးပုံနှစ်ပုံခန့်ကိုအမေရိကန်ပြည်ထောင်စုသို့ တင်ပို့သည်။
ရေဒီယိုသတ္တိ ကြွပစ္စည်းတွေ့ရှိမှုသည် ကုမ္ပဏီတစ်ခုဖြစ်သော PT Bahari Makmur Sejati(BMS) ၏ ပုစွန်တင်ပို့ရောင်းချမှုတွင်သာဖြစ်သော်လည်း အမေရိကနှင့် အခြားသော နိုင်ငံခြားဝယ်လက်များသည် အင်ဒိုနီးရှားမှ ပုစွန်များအားလုံး ဘေးကင်းမှုရှိမရှိကို ဆုံးဖြတ်ရန် စောင့်ဆိုင်းနေကြသည်ဟု အင်ဒိုနီးရှား ပုစွန်မွေးမြူသူများအသင်း အကြီးအကဲမစ္စတာ အန်ဒီ တမ်ဆီလ်က ပြောကြားခဲ့သည်။
ဒေသအချို့တွင် ပုစွန်ဈေးနှုန်းသည် ၃၅ ရာခိုင်နှုန်းအထိ ကျဆင်းသွားခဲ့သည်ဟု ၎င်းက ပြောဆိုသည်။
“အမေရိကန် အက်ဖ်ဒီအေက BMS ကို အနီရောင်အဆင့် သတိပေးမှုစာရင်းမှာ ထည့်သွင်းလိုက်တာကြောင့် မွေးမြူရေးသမားတွေဆီက ပုစွန်ဝယ်ယူမှုဟာ ၃၀ ကနေ ၃၅ ရာခိုင်နှုန်းလောက်အထိ လျော့ကျသွားပါတယ်” ဟု မစ္စတာ တမ်ဆီးလ်က ပြောကြားခဲ့သည်။
Ref: သည်စထရိတ်တိုင်းမ်စ်