ရုရှားနိုင်ငံနှင့်ပူးပေါင်း၍ ဆက်လက်လုပ်ဆောင်ရမည့် နယ်ပယ်များစွာရှိနေသေးဟု နစက ဥက္ကဋ္ဌပြော

ရုရှားနိုင်ငံနှင့်ပူးပေါင်း၍ ဆက်လက်လုပ်ဆောင်ရမည့် နယ်ပယ်များစွာရှိနေသေးသည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ရုရှားနိုင်ငံ၊ မော်စကိုမြို့သို့ နိုင်ငံတော်အဆင့်ချစ်ကြည်ရေးခရီးစဥ်ရောက်ရှိနေစဥ် မေ ၈ ရက်က ရုရှားနိုင်ငံ RT သတင်းဌာနနှင့်တွေ့ဆုံရာ၌ ပြောကြားခဲ့ခြင်းဖြစ်သည်။

ရုရှားနိုင်ငံနှင့် မြန်မာနိုင်ငံတို့၏ ပူးပေါင်းဆောင်ရွက်မှုနယ်ပယ်မှာကျယ်ပြန့်ပြီး ကာကွယ်ရေးကဏ္ဍသာမက သိပ္ပံနှင့်နည်းပညာ၊ စီးပွားရေး၊ ဥပဒေဘက်ဆိုင်ရာ၊ ပညာရေး၊ ကျန်းမာရေးနယ်ပယ်များစွာရှိကာ ဆွေးနွေးသည့်ကိစ္စများလည်းရှိပြီးဖြစ်သည်ဟု ပြောသည်။

ထို့ပြင် မိမိအနေဖြင့် မတ်လအတွင်းကလာရောက်ခဲ့သည့် ရုရှားနိုင်ငံခရီးစဥ်အတွင်း၌ နျူးကလီးယားနှင့်ပတ်သက်သည့် ဓာတ်အားပေးစက်ရုံတည်ဆောက်ရေး၊ ထားဝယ်ရေနက်ဆိပ်ကမ်းတည်ဆောက်ရေး၊ ကမ်းလွန်ရေနံနှင့်ဓာတ်ငွေ့ထုတ်လုပ်ရေးတို့အတွက် ရင်းနှီးမြှုပ်နှံမည့်ကိစ္စများကို ဆွေးနွေးနိုင်ခဲ့ကာ သဘောတူခဲ့မှုများ၊ လုပ်ဆောင်နေမှုများလည်းရှိ၍ ဆက်လက်လုပ်ဆောင်ရမည့် နယ်ပယ်များစွာရှိနေသည်ဟု ပြောသည်။

ထို့အတူ ရုရှားနိုင်ငံသည် အာဆီယံအတွက်အရေးပါသည့်နိုင်ငံတစ်ခုဖြစ်ကာ မြန်မာနိုင်ငံသည် ၂၀၂၄ ခုနှစ်မှ ၂၀၂၇ ခုနှစ်အထိ အာဆီယံနှင့်ရုရှားနိုင်ငံတို့ ၏ ဆက်ဆံရေးကိုညှိနှိုင်းရေးတာဝန်ယူထားသည့် နိုင်ငံတစ်ခုဖြစ်ကာ ယခင်က မိမိတို့သည် တရုတ်နိုင်ငံနှင့်လုပ်ဆောင်ခဲ့ပြီး တရုတ်နိုင်ငံကိုလည်း အောင်မြင်စွာလုပ်ဆောင်ပေးခဲ့သည်ဟု ပြောသည်။

” အခုဆိုလဲ ရုရှားနဲ့ပတ်သက်ပြီးတော့ ကျွန်တော်တို့က ညှိနှိုင်းခဲ့တဲ့နိုင်ငံတစ်ခုအနေနဲ့ တာဝန်ယူထားတာပေါ့။ ကျွန်တော်တို့ရဲ့ မိတ်ဆွေနိုင်ငံတစ်ခုဖြစ်တဲ့အတွက်ကြောင့်လည်း ရုရှားနဲ့အာဆီယံနိုင်ငံ ဆက်ဆံရေးနဲ့ ပတ်သက်ပြီး ပိုကောင်းအောင်လုပ်ပေးဖို့ ကျွန်တော်တို့ဆန္ဒရှိပါတယ်။ ရုရှားက အာဆီယံအ တွက်အရေးပါတဲ့ နိုင်ငံတစ်ခုဖြစ်တယ်။ ဆွေးနွေးဖက်နိုင်ငံထဲမှာလည်းပါနေပြီဖြစ်ပါတယ်”ဟု နစက ဥက္ကဋ္ဌကပြောသည်။

ထို့ကြောင့် ရှေ့ဆက်ကာလများတွင် အာဆီယံနှင့်ပူပေါင်းဆောင်ရွက်မှုများ၌ ရုရှားနိုင်ငံသည် အရေးပါသောအနေအထားတွင်ရှိလာနိုင်မည်ဟု မိမိအနေဖြင့်မြင်ပြီး တစ်ဖက်တွင်လည်း ရုရှားနိုင်ငံမှ အာဆီယံနိုင်ငံများနှင့် ပူးပေါင်းဆောင်ရွက်မှုနယ်ပယ်များကို ကဏ္ဍပေါင်းစုံတိုးချဲ့နိုင်ရန်အတွက် စဉ်းစားဆောင် ရွက်ပေးနိုင်ရန်လိုသည်ဟု နစက ဥက္ကဋ္ဌက ပြောကြားခဲ့သည်။