ဖေဖော်ဝါရီ (၂၈) ရက်မှ စတင်၍ ရန်ကုန် – နေပြည်တော် – မန္တလေး – ရန်ကုန် ရထားလမ်းပိုင်း၌ ဂျပန်နိုင်ငံမှ ဝယ်ယူရောက်ရှိလာသည့် ခေတ်မီ DEMU ရထားတွဲဆိုင်းသစ်များဖြင့် စတင်ပြေးဆွဲပေးသွားမည်ဖြစ်ကြောင်း မြန်မာ့မီးရထားမှ သိရသည်။
အဆိုပါ ခေတ်မီ DEMU ရထားတွဲဆိုင်းဖြင့် နေပြည်တော်မှ ရန်ကုန်အထိ စတင်စမ်းသပ်ပြေးဆွဲသည့် ခရီးစဉ်အဖြစ် ဖေဖော်ဝါရီ (၂၁) ရက် ၊ နံနက် (၈) နာရီတွင် နေပြည်တော်ဘူတာကြီးမှ စတင်ထွက်ခွာခဲ့ပြီး မြန်မာ့စားသောက်ကုန်လုပ်ငန်းဖွံ့ဖြိုးတိုးတက်ရေးဖိုရမ် ၂၀၂၅ (MSME) နေပြည်တော်သို့ တက်ရောက်လာကြသည့် ကုမ္ပဏီအဖွဲ့အစည်းအသီးသီးမှ ပုဂ္ဂလိကလုပ်ငန်းရှင်များအပါအဝင် ခရီးသွားပြည်သူ (၁၃၀)လိုက်ပါစီးနင်းခဲ့ကြကြောင်း သိရသည်။
ရန်ကုန်ဘူတာသို့ မွန်းလွဲ (၁) နာရီ ၊ မိနစ် (၅၀) တွင် ရောက်ရှိပြီး နေပြည်တော်မှ ရန်ကုန်သို့ ဘူတာစဉ်ရပ်တန့်ချိန်များအပါအဝင် ခရီးသွားချိန် (၅) နာရီ မိနစ် (၅၀) ကြာမြင့်ကြောင်း သိရသည်။
ထို့ပြင် အဆင့်မြှင့်တင်ပြီးဖြစ်သည့် ရန်ကုန်-နေပြည်တော် ရထားလမ်းပိုင်း၌ စတင်ပြေးဆွဲမည့် DEMU ရထားတွင် ပထမတန်းလေးတွဲ၊ အထက်တန်းနှစ်တွဲ စုစုပေါင်း တွဲဆိုင်းခြောက်တွဲဖြင့် ခရီးသည် (၃၁၂) ဦး လိုက်ပါစီးနင်းနိုင်မည်ဖြစ်ပြီး နေပြည်တော် – မန္တလေး ပြေးဆွဲမည့် လေအိတ်ရထားခရီးစဉ်အတွက် ရိုးရိုးတန်း(၄)တွဲ၊ အထက်တန်း(၂)တွဲ စုစုပေါင်း တွဲဆိုင်း(၆)တွဲဖြင့် ခရီးသည် (၃၃၀) လိုက်ပါစီးနင်းနိုင်မည်ဖြစ်ကြောင်း သိရသည်။
အဆိုပါ ရထားအချိန်စာရင်းနှင့် လက်မှတ်ခနှုန်းထားတို့ကို မြန်မာ့မီးရထားမှ ထပ်မံထုတ်ပြန်သွားမည်ဖြစ်ကြောင်း ရန်ကုန် – မန္တလေး ခရီးစဉ်တလျှောက် ပဲခူး၊ ဖြူး၊ တောင်ငူ၊ နေပြည်တော်၊ သာစည်ဘူတာတို့၌ ရပ်တန့်ပေးသွားမည်ဖြစ်သည်။
ပို့ဆောင်ရေးနှင့်ဆက်သွယ်ရေးဝန်ကြီးဌာန၊ မြန်မာ့မီးရထားအနေဖြင့် အဓိကရထားလမ်းပိုင်းများဖြစ်သည့် ရန်ကုန် – မန္တလေးလမ်းပိုင်း၊ ရန်ကုန်-ပြည်လမ်းပိုင်း၊ ရန်ကုန်-မော်လမြိုင်လမ်းပိုင်းများနှင့် ရန်ကုန်မြို့ပတ်နှင့် ဆင်ခြေဖုံးလမ်းပိုင်းများတွင်သာမက အခြားလမ်းပိုင်းများဖြစ်သော ပုသိမ် -ဟင်္သာတ-ကြံခင်း လမ်းပိုင်း၊ ပျဉ်းမနား – တောင်တွင်းကြီး လမ်းပိုင်း၊ ရန်ကုန် – ပြည် – ပုဂံလမ်းပိုင်း၊ မြစ်ကြီးနား – မိုး ကောင်း လမ်းပိုင်း၊ လက်ပံတန်း-သာရဝေါလမ်းပိုင်းနှင့် သာစည်-ရွှေညောင်လမ်းပိုင်း စသည့်လမ်းပိုင်းများတွင် လူစီးရထားခရီးစဉ်များကို စီစဉ်ပြေးဆွဲပေးလျက်ရှိကြောင်း သိရသည်။