ရန်ကုန်တိုင်းနှင့် မန္တလေးတိုင်းတို့တွင် ယနေ့ ဇန်နဝါရီ ၂၈ ရက်နံနက်ပိုင်းက ကားမီးလောင်မှုများဖြစ်ပွားခဲ့ကြောင်း မီးသတ်တပ်ဖွဲ့နှင့် ဒေသခံလူမှုကူညီရေးအသင်းဝင်များထံမှ သိရသည်။
ယနေ့ ဇန်နဝါရီ ၂၈ ရက်နံနက် ၇ နာရီ ၁၈ မိနစ်ခန့်က ရန်ကုန်တိုင်း၊ သင်္ဃန်းကျွန်းမြို့နယ်၊ ရန်ကုန်သစ်ရပ်ကွက်၊ ၁၇လမ်းထိပ်တွင် ကားတစ်စီးမီးလောင်မှုဖြစ်ပွား၍ သင်္ဃန်းကျွန်းမြို့နယ်မီးသတ်စခန်းမှတပ်ဖွဲ့ဝင်များက မီးသတ်ယာဉ်(၂)စီးဖြင့် သွားရောက်ငြှိမ်းသတ်ခဲ့ကြသဖြင့် နံနက် ၇ နာရီ ၂၆ မိနစ်တွင် မီးငြိမ်းသွားခဲ့ကြောင်း သိရသည်။
ထို့ပြင် နံနက် ၉ နာရီ ၁၀ မိနစ်ခန့်ကလည်း မန္တလေးတိုင်းရှိ ကျောက်ပန်းတောင်း-မိတ္ထီလာသွားကားလမ်း၏ မိုင်တိုင်အမှတ် ၄၁/၀ တွင် HYUNDAI CITY BUS ခရီးသည်တင်ကားတစ်စီး မီးလောင်မှုဖြစ်ပွား၍ ကျောက်ပန်းတောင်းမြို့ နယ်မီးသတ်စခန်း၊ လက်ပံပျားနယ်မြေမီးသတ်စခန်းတို့မှတပ်ဖွဲ့ဝင်များနှင့် ဒေသခံလူမှုကူညီရေးအသင်းဝင်များက ပူးပေါင်းငြှိမ်းသတ်ခဲ့ကြသည်။
ထို့ကြောင့် နံနက် ၉ နာရီ ၄၄ မိနစ်တွင် မီးငြိမ်းသွားခဲ့ပြီး ဖြစ်စဉ်ကြောင့် ခရီးသည်တင်ကားမှာ ပျက်စီးဆုံးရှုံးမှုများဖြစ်ပေါ်ခဲ့သော်လည်း ထိခိုက်ဒဏ်ရာရသူမရှိခဲ့ကြောင်း သိရသည်။
အဆိုပါ မီးလောင်မှုဖြစ်စဉ်(၂)ခုနှင့်ပတ်သက်၍ တာဝန်ရှိသူ(၂)ဦးအား သက်ဆိုင်ရာရဲစခန်းများတွင် အမှုဖွင့်အရေးယူထားကြောင်း သိရသည်။