ဘင်္ဂလားပင်လယ်အော် အနောက်မြောက်ပိုင်းတွင် ဖြစ်ပေါ်နေသည့် အားအလွန်ကောင်းသည့် ဆိုင်ကလုံးမုန်တိုင်း “ဟမွန်း” ၏ အရှိန်ကြောင့် အောက်တိုဘာလ ၂၄ ရက်တွင် ရန် ကုန်တိုင်း မြို့နယ်အချို့တွင် မိုးသည်းထန်စွာ ရွာသွန်းခဲ့ပြီးရေကြီးရေလျှံမှုများ ဖြစ်ပေါ်ခဲ့ကြောင်း သိရသည်။
အဆိုပါ မိုးသည်းထန်စွာ ရွာသွန်းမှုကြောင့် ရန်ကုန်တိုင်း ဗဟန်းမြို့နယ်အတွင်းရှိ ရွှေတိဂုံ စေတီတော်၏ တောင်ဘက်မုခ်စောင်းတန်းနှင့် အရှေ့ဘက်မုဒ်တွင် ရေကြီးရေလျှံမှုများ ဖြစ်ပေါ်ခဲ့ကြောင်း ဘုရားဖူး ပြည်သူများက လူမှုကွန်ရက်စာမျက်နှာမှတဆင့် ယနေ့ ညနေပိုင်းတွင် မျှဝေထားသည်ကို တွေ့ရသည်။
ထို့အပြင် တာမွေမြို့နယ်၊ သင်္ဃန်းကျွန်းမြို့နယ်၊ မြောက်ဒဂုံမြို့နယ်တို့ရှိ အနိမ့်ပိုင်း ရပ်ကွက်များတွင်လည်း ရေကြီးရေလျှံမှုများဖြစ်ပေါ် လမ်းများပေါ်တွင် ဆိုးရွားစွာ ရေလျှံမှုများ ၊ နေအိမ်အတွင်း ရေဝင်ရောက်မှုများ ဖြစ်ပေါ်ခဲ့ကြောင်း သိရသည်။
တာမွေမြို့နယ် Ocean ဈေးဝယ်စင်တာအနီးရှိ လမ်းမပေါ်တွင် ရေများပြည့်လျှံနေသည့် မြင်ကွင်းကို ပြည်သူများမှ လူမှုကွန်ရက် စာမျက်နှာတွင် ဖြန့်ဝေထားသည်ကိုလည်း ယနေ့ အောက်တိုဘာ (၂၄) ရက်နေ့ပိုင်းတွင် တွေ့ရသည်။
အဆိုပါ အားအလွန်ကောင်းသော ဆိုင်ကလုံးမုန်တိုင်း ” ဟမွန်း”သည် လက်ရှိအချိန်ထိ မြန်မာနိုင်ငံဘက်သို့ ဦးတည် ရွှေ့လျားမည့် အခြေအနေ မရှိသည့်အတွက် အဝါရောင်အ ဆင့်အနေဖြင့် သတ်မှတ်ထားကြောင်း မိုးဇလက အသိပေးထုတ်ပြန်ထားသည်။
မုန်တိုင်း ” ဟမွန်း” သည် မြန်မာနိုင်ငံဘက်သို့ ဦးတည်ရွေ့လျားမည့်အခြေအနေ မရှိသော်လည်း ရခိုင်ပြည်နယ်နှင့် ချင်းပြည်နယ်တို့မှာ မုန်တိုင်း၏ သက်ရောက်မှုကို ခံစားရနိုင်ကြောင်း မိုးဇလက သတိပေးထားသည်။
ထို့အပြင် တိုင်းနှင့်ပြည်နယ် အချို့တွင် နေရာကွက်၍ မိုးကြီးနိုင်ပြီး ရေကြီးရေလျှံမှုများ ဖြစ်ပေါ်နိုင်သည့်အတွက် သတိထား နေထိုင်ကြရန်လည်း မိုးလေဝသနှင့် ဇလဗေဒညွှန်ကြားမှု ဦးစီးဌာနက အသိပေးထားသည်။
Photo Credit
