ရန်ကုန်တိုင်းဒေသကြီး၌ ယခုနှစ် ဇန်နဝါရီလမှ ဇွန်လကုန်အထိ သွေးလွန်တုပ်ကွေးရောဂါ ဖြစ်ပွားသူ (၄၈၃) ဦးရှိပြီး သေဆုံးသူ(၃) ဦးရှိခဲ့ကြောင်း ရန်ကုန်တိုင်းဒေသကြီး၊ ပြည်သူ့ကျန်းမာရေးဦးစီးဌာနမှ သိရသည်။
ရန်ကုန်တိုင်းအတွင်း သွေးလွန်တုပ်ကွေးရောဂါဖြစ်ပွားမှု အများဆုံးမြို့နယ်များမှာ လူဦးရေထူထပ်သည့် ဒဂုံမြို့သစ်(တောင်ပိုင်း)၊ လှိုင်သာယာမြို့နယ်၊ ရွှေပြည်သာမြို့နယ်နှင့် သင်္ဃန်းကျွန်းမြို့နယ်တို့ဖြစ်ကြောင်း သိရသည်။
တစ်နိုင်ငံလုံး အတိုင်းအတာဖြင့် ကြည့်မည်ဆိုပါက ရန်ကုန်တိုင်းဒေသကြီးသည် သွေးလွန်တုပ်ကွေးရောဂါဖြစ်ပွားမှု တတိယ အများဆုံး တိုင်းဒေသကြီးဖြစ်ပြီး ရောဂါဖြစ်ပွားမှု အများဆုံးမှာ တနင်္သာရီ တိုင်းဒေသကြီးဖြစ်ပြီး ဒုတိယအများဆုံးမှာ ဧရာဝတီတိုင်းဒေသကြီးဖြစ်ကြောင်း သိရသည်။
“၂၀၂၂ ခုနှစ်တုန်းက ရန်ကုန်တိုင်းက သွေးလွန်တုပ်ကွေးရောဂါ အဖြစ်များခဲ့တယ်။ ဒါကြောင့် အဖြစ်များတဲ့နှစ်နဲ့ ကပ်ရပ်နှစ်ဖြစ်တဲ့ ဒီ ၂၀၂၃ ခုနှစ်ကိုလည်း ပေါ့ဆလို့မရပါဘူး။ ဖျားပြီဆိုရင် သွေးလွန်တုပ်ကွေးကို သတိမူသင့်ပါတယ် “ဟု ရန်ကုန်တိုင်းဒေသကြီး၊ ပြည်သူ့ကျန်းမာရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာပွင့်ဖြူဖြူက ပြောသည်။
သွေးလွန်တုပ်ကွေး ရောဂါသည် ကာကွယ်နှိမ်နင်း၍ ရသောရောဂါဖြစ်အမျိုးအစားဖြစ်သည့်အတွက် ပြည်သူလူထုကပါ ကိုယ်တိုင်ကာကွယ်နှိမ်နင်းသည့် အမူအကျင့်များ ပြုလုပ်မှသာ ရောဂါဖြစ်ပွားမှုမှတဆင့် သေဆုံးခြင်းများကို ကာကွယ်ထိန်းချုပ်နိုင်မည်ဖြစ်ကြောင်းလည်း ဒေါက်တာပွင့်ဖြူဖြူက ပြောကြားသည်။
သွေးလွန်တုပ်ကွေးရောဂါသည် အသက်အရွယ်မရွေးဖြစ်ပွားနိုင်ပြီး အထူးသဖြင့် အသက်(၅)နှစ်မှ (၉)နှစ်အရွယ် ကလေးငယ်များတွင် အများဆုံးဖြစ်ပွားလေ့ရှိပြီး အသက် (၁၅) နှစ်နှင့် အထက် လူကြီးများတွင်လည်း ရောဂါဖြစ်ပွားပါက သေဆုံးနှုန်းမြင့်မားကြောင်း သိရသည်။
