မြန်မာ့မီးရထား၏ အွန်လိုင်းရထားလက်မှတ်ဝယ်ယူမှုစနစ် (Online Railway Ticket Prospect – ORTP) ကို အသုံးပြု၍ TikTok၊ Facebook၊ Telegram နှင့် Viber စသည့် Social Media များမှတစ်ဆင့် အပိုဝန်ဆောင်ခကောက်ခံကာ လက်မှတ်ဝယ်ယူပေးနေမှုများကို တရားဝင်ခွင့်ပြုထားခြင်းမရှိကြောင်းနှင့် ထိုသို့ဆောင်ရွက်သူများကို ဥပဒေအရ အရေးယူသွားမည်ဖြစ်ကြောင်း မြန်မာ့မီးရထားမှ သတိပေးထုတ်ပြန်လိုက်သည်။
မြန်မာ့မီးရထားသည် ၂၀၂၆ ခုနှစ် ဖေဖော်ဝါရီ ၁ ရက်မှစတင်၍ ရန်ကုန်-မန္တလေး လမ်းပိုင်းရှိ အမြန်ရထားများအတွက် ORTP စနစ်ကို စတင်ခဲ့ခြင်းဖြစ်ပြီး၊ လက်မှတ်တစ်စောင်လျှင် တင်ဒါအောင်ကုမ္ပဏီမှ သတ်မှတ်ထားသည့် ဝန်ဆောင်ခ ကျပ် ၂၀၀ နှင့် ဘဏ်ငွေလွှဲခများကိုသာ ကောက်ခံခွင့်ပြုထားခြင်းဖြစ်သည်။
လက်ရှိတွင် Social Media များပေါ်၌ မြန်မာ့မီးရထား၏ ခွင့်ပြုချက်မရှိဘဲ အပိုဝန်ဆောင်ခများဖြင့် လက်မှတ်ဝယ်ယူပေးနေသည့် လုပ်ဆောင်ချက်များကို တွေ့ရှိနေရသဖြင့် အောက်ပါအတိုင်း အသိပေးထားပါသည် –
တရားဝင်ခွင့်ပြုချက်မရှိခြင်း
မြန်မာ့မီးရထားသည် မည်သည့်ကိုယ်စားလှယ်တစ်ဦးတစ်ယောက်ကိုမျှ အပိုဝန်ဆောင်ခကောက်ခံရန် တာဝန်ပေးအပ်ထားခြင်းမရှိပါ။
ဥပဒေအရအရေးယူမည်
Social Media မှတစ်ဆင့် ဝန်ဆောင်ခယူကာ လက်မှတ်ဝယ်ယူပေးနေသည်ကို တွေ့ရှိပါက တည်ဆဲဥပဒေများနှင့်အညီ ထိရောက်စွာ အရေးယူဆောင်ရွက်သွားမည်ဖြစ်သည်။
ခရီးသည်များအတွက် အကူအညီ
အွန်လိုင်းမှ ဝယ်ယူရန် အခက်အခဲရှိသော ခရီးသည်များအတွက် ဘူတာရုံများတွင် အထောက်အကူပြုကောင်တာများ ဖွင့်လှစ်ပေးထားပြီး ဘူတာဝန်ထမ်းများမှ ORTP စနစ်ဖြင့် ဝယ်ယူပေးရန် စီစဉ်ထားရှိသည်။