၂၀၂၅-၂၀၂၆ ပညာသင်နှစ်အတွက် ယွန်းပညာကောလိပ်(ပုဂံ)မှ ယွန်းအတတ်ပညာ ဒီပလိုမာ(၂)နှစ်သင်တန်း ဝင်ခွင့်လျှောက်လွှာများကို လက်ခံခေါ်ယူလျက်ရှိကြောင်းယွန်းပညာကောလိပ်(ပုဂံ)မှ သိရသည်။
မြန်မာ့ရိုးရာယဉ်ကျေးမှုအမွေအနှစ်တစ်ရပ်ဖြစ်သော ပန်းယွန်းအတတ်ပညာများကို အစဉ်ထိန်းသိမ်းစောင့်ရှောက်နိုင်ရေးနှင့် ယွန်းပညာရပ်များ မှေးမှိန်ပပျောက်မှုမရှိစေရေးအတွက် လက်ဆင့်ကမ်း ထိန်းသိမ်းနိုင်ရေးတို့ကိုရည်ရွယ်၍ ပုံမှန်သင်တန်းများဖြစ်သော ယွန်းအတတ်ပညာဒီပလိုမာ(၂)နှစ်သင်တန်းနှင့် ယွန်းအတတ်ပညာကျွမ်းကျင်သူ(၁)နှစ်သင်တန်းတို့ကို နှစ်စဉ်ဖွင့်လှစ်သင်ကြားပေးလျက်ရှိသည်။
ဒီပလိုမာလက်မှတ်နှင့် ဘွဲ့များအတွက်ယွန်းအတတ်ပညာဒီပလိုမာ(၂)နှစ်သင်တန်းပြီးဆုံးပါက ယွန်းအတတ်ပညာဒီပလိုမာ (Dip.L.T) Diploma in Lacquerware Technology ကို ရရှိမည်ဖြစ်ပြီး သမဝါယမနှင့်စီမံခန့်ခွဲမှုပညာတက္ကသိုလ် (စစ်ကိုင်း၊သန်လျင်)များသို့ တတိယနှစ်မှစ၍ ပေါင်းကူးတက်ရောက်၍ ဈေးကွက်ဖော်ဆောင်ရေး စီမံခန့်ခွဲမှုဘာသာ (Marketing Management) နှင့် လူမှုစီးပွားစီမံခန့်ခွဲမှုဘာသာ (Social Enterprise Management) စသည့် မေဂျာဘာသာရပ်(၂)ခုကို လေ့လာသင်ယူနိုင်မည်ဖြစ်ပြီး B.B.Sc (Marketing Management)နှင့် B.B.Sc (Social Enterprise Management) ဘွဲ့များကို ရရှိမည်ဖြစ်သည်။
ယွန်းအတတ်ပညာဒီပလိုမာ(၂)နှစ်သင်တန်းသို့ တက်ရောက်မည့် ကျောင်းသား/သူများအား အဆောင်အခမဲ့ နေထိုင်ခွင့်ပေးသည့်အပြင် နိုင်ငံတော်မှ ပညာသင်ကာလအတွင်း စားသောက်စရိတ် တစ်လလျှင် ကျပ် ၉၀၀၀၀ နှင့် သတ်မှတ်ချက်များနှင့် ကိုက်ညီသည့် ထူးချွန်ဒီပလိုမာကျောင်းသားများအား တစ်ဦးလျှင် တစ်လပညာသင်ထောက်ပံ့ကြေး ကျပ် ၁၅၀၀၀၀ ထောက်ပံ့ပေးအပ်မည်ဖြစ်သည်။
သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန ကြီးကြပ်မှု အောက်ရှိ ယွန်းပညာကောလိပ်(ပုဂံ)သည် မန္တလေးတိုင်းဒေသကြီး၊ ညောင်ဦးခရိုင်၊ ပုဂံမြို့ဟောင်းတွင် တည်ရှိပြီး ၁၉၂၄ ခုနှစ်တွင် အစိုးရယွန်းထည်လုပ်ငန်းအတတ်သင်ကျောင်းမှစ၍ ၁၉၉၄ ခုနှစ်တွင် မြန်မာ့ယွန်းသိပ္ပံအဆင့်သို့လည်းကောင်း၊ ၂၀၀၃ ခုနှစ်တွင် ယွန်းပညာကောလိပ်အဆင့်သို့ တိုးမြှင့်ဖွင့်လှစ်နိုင်ခဲ့သည်။