ယူကရိန်းသို့ အမေရိကန်က ထောက်ပံ့ပေးထားသည့် Bradley သံချပ်ကာယာဉ်များ၏ သုံးပုံတစ်ပုံနီးပါးသည် ပျောက်ဆုံး(သို့)ပျက်စီးသွားပြီဖြစ်ကြောင်း စစ်ဆင်ရေးဆိုင်ရာအချက်အလက်များအရသိရပြီး ယူကရိန်း၏ တန်ပြန်ထိုးစစ်သည် ခက်ခဲကာ ငွေကုန်ကြေးကျများသော အစီအစဉ်တစ်ခုဖြစ်ကြောင်း သက်သေပြနေသည်ဟု နိုင်ငံတကာသတင်းဌာနများက ရေးသားကြသည်။
သမ္မတဘိုင်ဒင် အစိုးရက တပ်ဖွဲ့ဝင် ၁၀ ဦးခန့် သယ်ဆောင်နိုင်သည့် Bradley Fighting Vehicles သံချပ်ကာယာဉ် အစီး ၅၀ ထက်မနည်းကို ယူကရိန်းသို့ စေလွှတ်မည်ဟု ဇန်နဝါရီလကတည်းက ကြေညာခဲ့သည်။
ယူကရိန်းတပ်မဟာ (၄၇) စက်ပြင်မှုဆိုင်ရာတပ်သည် ယင်းမော်တော်ယဉ်များကို လက်ခံရရှိသည့် တစ်ခုတည်းသော ယူနစ်ဖြစ်ကြောင်း New York Times သတင်းစာကြီးက စနေနေ့တွင် ဖော်ပြခဲ့သည်။ ဖေဖော်ဝါရီလတွင် ပေါက်ကြားခဲ့သည့် ပင်တဂွန်စစ်ဌာနချုပ်၏ စာရွက်စာတမ်းများအရ တပ်မဟာ ၄၇ မှ သံချပ်ကာယာဉ် စုစုပေါင်း ၉၉ စီးကို လက်ခံရရှိမည် ဖြစ်ကြောင်း သိရခဲ့သည်။ သို့သော် စစ်မြေပြင်တွင် ပထမဆုံး တပ်ဖြန့်ချထားသော သံချပ်ကာယာဉ် ၁၀၉ စီးကို အမေရိကန်က ဧပြီလတွင် ပေးပို့ခဲ့ကြောင်း အခြားသတင်းများအရ သိရသည်။
Open-source စစ်ဘက်ဆိုင်ရာ သုတေသနအဖွဲ့ Oryx က အမေရိကန်တို့၏ Bradley သံချပ်ကာယာဉ် ၃၄ စီးသည် စွန့်ပစ်ခံရခြင်း၊ ပျက်စီးခြင်း သို့မဟုတ် ဖျက်ဆီးခံရခြင်းဖြစ်သည်ဟု မြင်သာထင်ရှားစွာ အတည်ပြုနိုင်ခဲ့ကြောင်း ဖော်ပြခဲ့သည်။ Insider သတင်းဌာနကမူ ဇွန်လတိုက်ပွဲများ ရက်အနည်းငယ်အတွင်းတွင်ပင် သံချပ်ကာယာဉ် တစ်ဒါဇင်ကျော်ထက်မနည်း ဆုံးရှုံးခဲ့ကြောင်း ဆိုခဲ့သည်။