ယူကရိန်းစစ်အတွင်း အမေရိကန်ပစ္စည်းများရုရှသို့တင်ပို့သည့် ကြားခံကျွန်းနိုင်ငံ

စိမ်းပြာရောင်ရေများ ဝန်းရံထားသည့်လှပသည့် မော်လ်ဒိုက်ကျွန်း သည်အပန်းဖြေခရီးထွက်သူများအတွက် ရေပန်းစားသောနေရာတစ်ခုအဖြစ်သာမက ရုရှားနိုင်ငံအပေါ် ပိတ်ဆို့အရေးယူမှုများကို ရှောင်လွှဲနိုင်သည့် သင်္ဘောများ ဖြတ်သန်းရာနေရာလည်းဖြစ်လာနေသည်။

ရုရှား-ယူကရိန်းစစ် တစ်နှစ်တာအတွင်း စုစုပေါင်း ဒေါ်လာ ၅၃.၆ သန်းတန်ဖိုးရှိအမေရိကန်လုပ် တစ်ပိုင်းလျှပ်ကူးပစ္စည်း ၄၀၀,၀၀၀ ခန့်မှာ မော်လ်ဒိုက်ကိုဖြတ်ပြီး ရုရှားဆီ တင်ပို့ခဲ့သည်။

အိန္ဒိယသုတေသနကုမ္ပဏီ Export Genius မှရရှိသော ရုရှားအကောက်ခွန်ရှင်းလင်းရေးအချက်အလက်များကို Nikkei မှခွဲခြမ်းစိတ်ဖြာ၍ရေးသားခဲ့ခြင်းဖြစ်သည်။

စစ်အတွင်း ယင်းကဲ့သို့ တင်သွင်းမှုနှင့်ပတ်သက်၍ ဟောင်ကောင်အပါအဝင် မော်လ်ဒိုက်သည် တရုတ်နိုင်ငံပြီးလျှင် ဒုတိယမြောက်ကုန်သွယ်မူအများဆုံးဖြစ်နေသည်။

စစ်မဖြစ်မီ တစ်နှစ်အတွင်း မှတ်တမ်းများတွင် မော်လ်ဒိုက်မှ ရုရှားသို့ ချစ်ပ်ပြားများ တင်ပို့မှုမရှိခဲ့ပေ။

ကုလသမဂ္ဂ အချက်အလက်များအရ မော်လ်ဒိုက်၏ စုစုပေါင်းပို့ကုန်သည် ၂၀၂၁ ခုနှစ်တွင် အမေရိကန်ဒေါ်လာ သန်း ၂၈၀ ခန့်အထိ ရှိလာခဲ့သည်။

မော်လ်ဒိုက်မှ ရုရှားသို့ US semiconductor တင်ပို့မှုတန်ဖိုးသည် ဤပမာဏ၏ ၂၀% နှင့် ညီမျှသည်။

စစ်ကြောင့်ခေတ္တရပ်နားထားသည့်ရုရှားလေကြောင်းလိုင်းကြီး Aeroflot သည် မော်လ်ဒိုက် မြို့တော်နှင့် မော်စကိုမြို့တို့အကြား ပျံသန်းမှု ပြန်လည်စတင်ခဲ့သည့် ၂၀၂၂ ခုနှစ် မေလတွင် တစ်ပိုင်းလျှပ်ကူးပစ္စည်း တင်ပို့မှုများ သိသိသာသာ တိုးလာခဲ့သည်။

Omdia ၏အကြီးတန်းအတိုင်ပင်ခံဒါရိုက်တာ Akira Minamikawa ၏အဆိုအရ မော်လ်ဒိုက်၌ဆီမီးကွန်ဒတ်တာစျေးကွက်မရှိဘဲရုတ်တရက်တိုးလာခြင်းဖြစ်သည်။

အကောက်ခွန်အချက်အလက်များအရ မော်လ်ဒိုက်မှ ရုရှားနိုင်ငံသို့ တစ်ပိုင်းလျှပ်ကူးပစ္စည်း တင်ပို့သူ ၁၄ ဦးရှိသည်။ ထိုကုမ္ပဏီများသည် မော်လ်ဒိုက်တွင် အခြေစိုက်ပုံမပေါ်ပါ။

ထိုကုမ္ပဏီများထဲမှတစ်ခုဖြစ်သည့် လန်ဒန်အခြေစိုက် Mykines ကော်ပိုရေးရှင်းသည် ခန့်မှန်းခြေအားဖြင့် ဒေါ်လာ သန်း ၄၀ တန်ချစ်ပ်များ သို့မဟုတ် စုစုပေါင်းတင်ပို့မှု၏ ၈၀% ကို တင်ပို့ခဲ့သည်။ Mykines သည် ရုရှားနိုင်ငံသို့ ဒေါ်လာ ၁.၂ ဘီလီယံတန်ဖိုးရှိ အီလက်ထရွန်းနစ်ပစ္စည်းများကို တင်ပို့ခဲ့ကြောင်း Financial Times မှ ၂၀၂၃ ခုနှစ် ဧပြီလတွင် ဖော်ပြခဲ့သည်။

Source: Nikkei Asia