မြောက်ကိုရီးယားနှင့် သုံ့ပန်းအလဲအလှယ်လုပ်ရန်အသင့်ရှိ–ဇလန်းစကီး

ရုရှားလက်တွင်းရောက် ယူကရိန်းနိုင်ငံသားများနှင့် အလဲအလှယ်လုပ်နိုင်ရေး ကို ဝင်ရောက်ဆောင်ရွက်ပေးမည်ဆိုပါက ဖမ်းမိထားသော မြောက်ကိုရီးယားစစ်သားနှစ်ဦးကို ခေါင်းဆောင်ကင်ဂျုံအန်ထံ လွှဲပြောင်းပေးရန် ကိဗ်က အသင့်ရှိသည်ဟု ယူကရိန်းသမ္မတ ဇလန်းစကီးက ဇန်နဝါရီ ၁၂ ရက်တွင် ပြောကြားခဲ့သည်။

“ပထမဆုံး ဖမ်းမိထားတဲ့ မြောက်ကိုရီးယားစစ်သားတွေအပြင် နောက်ထပ်လည်း ဖမ်းမိဦးမှာ သေချာပါတယ်၊ ဒါက ငါ့တပ်တွေ နောက်ထပ် မဖမ်းဆီးခင်လေးမှာ လုပ်တဲ့ကိစ္စပါ” ဟု ဇလန်းစကီးက X ပေါ်တွင် ပြောဆိုခဲ့သည်။

ရုရှားနိုင်ငံ ကာ့ခ်ဒေသတွင် ယူကရိန်းတပ်များက မြောက်ကိုရီးယားစစ်သားနှစ်ဦးကို ဖမ်းမိခဲ့သည်ဟု ဇန်နဝါရီ ၁၁ ရက်တွင် ဇလန်းစကီးက ပြောကြားခဲ့သည်။ အဆိုပါဖြစ်ရပ်သည် သုံးနှစ်နီးပါးကြာပြီဖြစ်သော စစ်ပွဲအတွင်းသို့ ပြီးခဲ့သောဆောင်းဦးပေါက်တွင် မြောက်ကိုရီးယားတပ်များ စတင်ဝင်ရောက်လာခဲ့ပြီးနောက်ပိုင်း ယူကရိန်းက မြောက်ကိုရီးယားစစ်သားများကို ဖမ်းမိကြောင်း ပထမဆုံးအကြိမ် ထုတ်‌ဖေါ် ပြောကြားခြင်းဖြစ်သည်။

ယူကရိန်းနှင့် အနောက်နိုင်ငံများ၏ အကဲဖြတ်ချက်များအရ ကာ့ခ်ဒေသတွင် ရုရှားတပ်များကို ကူတိုက်ရန် မြောက်ကိုရီးယားစစ်သား ၁၁,၀၀၀ ခန့် စေလွှတ်ချထားသည်ဟု သူက ဆက်လက်ပြောကြားခဲ့သည်။ ရုရှားဘက်ကမူ အဆိုပါ တပ်ဖြန့်ချထားမှုကို အတည်ပြုခြင်းမရှိသကဲ့သို့ ငြင်းချက်ထုတ်ခြင်းလည်း မရှိပေ။

ရုရှားနှင့် မြောက်ကိုရီးယားတပ်များ အကျအရှုံးများနေသည်ဟု ဇလန်းစကီးက ပြောသည်။

“ရုရှားမှာ ဖမ်းဆီးခံထားရတဲ့ ကျွန်တော်တို့စစ်သည်တွေနဲ့ အလဲအထပ်လုပ်ဖို့ သူစီစဉ်ပေးနိုင်မယ်ဆိုရင် ကင်ဂျုံအန့်စစ်သားတွေကို သူ့ဆီလွှဲပေးဖို့ ယူကရိန်းက အသင့်ပါ” ဟု ဇလန်းစကီးက ပြောဆိုခဲ့သည်။

မြောက်ကိုရီးယားစစ်သားများကို ထုတ်ပြထားသည့် ဗီဒီယိုဖိုင်အတိုကိုလည်း သူက တင်ထားခဲ့ပြီး စစ်သားတစ်ဦးသည် ပတ်တီးများဖြင့် ကုတင်ပေါ်တွင် လှဲနေခဲ့ကာ နောက်တစ်ဦးသည် မေးသိုင်းပတ်တီးတစ်ခုဖြင့် ထိုင်နေခဲ့သည်ကို တွေ့ရသည်။

Ref: သည်စထရိတ်တိုင်းမ်စ်