မော်စကို၊ ဖေဖော်ဝါရီ ၂၅
ရုရှားသမ္မတ ဗလာဒီမာ ပူတင်က ရုရှားနိုင်ငံ၏ ကမ္ဘာလုံးဆိုင်ရာ ယှဉ်ပြိုင်နိုင်စွမ်း၊ စီးပွားရေးတိုးတက်မှုနှင့် လူနေမှုဘဝအရည်အသွေးတို့ကို မြှင့်တင်ပေးနိုင်မည့် မြေရှားသတ္တုလုပ်ငန်း ဖွံ့ဖြိုးတိုးတက်ရေးသည် အရေးကြီးသော ဦးစားပေးလုပ်ငန်းဖြစ်ကြောင်း တနင်္လာနေ့တွင် ပြောကြားခဲ့သည်။
မြေရှားသတ္ထုလုပ်ငန်းဖွံ့ဖြိုးတိုးတက်ရေးဆိုင်ရာ အစည်းအဝေးတစ်ခုတွင် ဗီဒီယိုကွန်ဖရင့်မှ တစ်ဆင့် မိန့်ခွန်းပြောကြားရာ၌ ယင်းကဏ္ဍသည် ရုရှားနိုင်ငံ၏ ခေတ်သစ်စီးပွားရေးအတွက် အရေးပါသော အရင်းအမြစ်တစ်ခုဖြစ်ကြောင်း ပူတင်က မှတ်ချက်ပြုပြောကြားခဲ့သည်။
ပူတင်က မြေရှားသတ္တုများသည် မိုက်ခရိုအီလက်ထရွန်းနစ်၊ စွမ်းအင်၊ ဒစ်ဂျစ်တယ်အခြေခံအဆောက်အဦဖွဲ့စည်းမှုနှင့် ကာကွယ်ရေးလုပ်ငန်းများတွင် မရှိမဖြစ်လိုအပ်ပြီး နည်းပညာဆိုင်ရာ သဘောတရားအသစ် တစ်ခုလုံးတွင် လိုအပ်နေကြောင်း အထူးသိရှိစေရန် ၎င်းက တိုက်တွန်း ပြောကြားခဲ့သည်။
ရုရှားသည် ကမ္ဘာပေါ်တွင် မြေရှားသတ္တုသိုက်များနှင့် ပတ်သက်၍ ကမ္ဘာ့ထိပ်တန်းနိုင်ငံ တစ်ခုဖြစ်သည်။ သို့သော်လည်း တိုင်းပြည်သည် ဤအရင်းအမြစ်များကို အပြည့်အဝအသုံးချခြင်း မရှိသေးကြောင်း ပူတင်က ဝန်ခံခဲ့ပြီး ဤအရေးကြီးသောလုပ်ငန်းကဏ္ဍတွင် ဖွံ့ဖြိုးတိုးတက်ရေး လုပ်ဆောင်ရန် လိုအပ်ကြောင်း အထူးအလေးပေးပြောကြားခဲ့သည်။
ရုရှားနိုင်ငံ၏စက်မှုလုပ်ငန်းနယ်ပယ်တွင် စွမ်းရည်မြှင့်တင်ရန်အတွက် ရည်ရွယ်ပြီး နိုင်ငံတော်ပရောဂျက် “New Materials and Chemistry” စီမံကိန်းကို ယခုနှစ်တွင် စတင်ခဲ့သည်။ ဤအစီအစဉ်အရ ရုရှားသည် ရှားပါးသတ္တုများကိုထုတ်ယူခြင်း၊ တန်ဖိုးမြင့်နည်းပညာဆိုင်ရာ ကုန်ပစ္စည်းများ ထုတ်လုပ်ခြင်း၊ ပြုပြင်ခြင်းနှင့် ထုတ်လုပ်ခြင်းတို့ပါဝင်သည့် သက်တမ်းပြည့်ရှားပါးသတ္တုလုပ်ငန်းကို တည်ထောင်ရန် ရည်မှန်းထားသည်။
ပူတင်က ရုရှားသည် မြေရှားသတ္တုကဏ္ဍတွင် နိုင်ငံခြားမိတ်ဖက်များ၊ အထူးသဖြင့်အမေရိကန်ကုမ္ပဏီများနှင့် လက်တွဲပူးပေါင်း လုပ်ဆောင်ရန် အခွင့်အရေး ဖွင့်လှစ်ထားကြောင်း ပြည်တွင်းမီဒီယာများသို့ ပြောကြားခဲ့သည်။
Ref: ရှင်းဟွာ