မြေနိမ့်ကော်ဖီ စိုက်ပျိုးလုပ်ကိုင်လိုသူများအနေဖြင့် နည်းပညာအပါအဝင် အကူအညီများ လိုအပ်ပါက စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနရုံး၊ ပြည်ထောင်စုဝန်ကြီးရုံးသို့ ဆက်သွယ်ဆောင်ရွက်နိုင်ကြောင်း သိရသည်။
နေပြည်တော် ရုံးအမှတ် (၁၅)တွင် တစ်ဧက စိုက်ပျိုးထားသော ရိုဘတ်စတာမြေနိမ့်ကော်ဖီပင်များ၏ (၁) နှစ် (၉) လသားအရွယ်တွင် အသီးများစတင်သီးပွင့်နေမှု၊ အသီးအားပိုမိုကောင်းမွန်စေရန် ပထမအကြိမ်အသီးများကို ခူးခြွေဖယ်ရှားထားရှိမှုတို့ကို ပြည်ထောင်စုဝန်ကြီး ဦးမင်းနောင်ကသွားရောက် ကြည့်ရှုစစ်ဆေးခဲ့ကြောင်း သိရသည်။
ကော်ဖီသီးနှံကို ပြည်ထောင်စုနယ်မြေ နေပြည်တော်အပါအဝင် မြေနိမ့်ဒေသများ၌ အောင်မြင်စွာစိုက်ပျိုးနိုင်မှုကို ပြည်သူများကျယ်ကျယ်ပြန့်ပြန့်သိရှိရေးနှင့် လက်တွေ့နည်းပညာပေးပြသမှုအပြင် လိုအပ်သောကူညီပံ့ပိုးမှုများကို လုပ်ထုံးလုပ်နည်းများနှင့်အညီ စီမံဆောင်ရွက်ရန် တာဝန်ရှိသူများကို မှာကြားခဲ့သည်။
ပင်လယ်ရေမျက်နှာပြင်မှ အမြင့်ပေ (၂၅၀၀) နှင့်အောက်ရှိ ဒေသများတွင် စိုက်ပျိုးဖြစ်ထွန်းသည့် ရိုဘတ်စတာမြေနိမ့်ကော်ဖီမျိုးများသည် အရိပ်ရပင်များဖြစ်သည့် သရက်ပင်၊ သီဟိုဠ်ပင်၊ မက္ကဒေးမီးယားပင်နှင့် ရော်ဘာပင်တို့ကိုအသုံးပြုစိုက်ပျိုးနိုင်သကဲ့သို့ ကမ်းရိုးတန်းဒေသများ၌ ကွမ်းသီးပင်များကြားတွင်လည်း စိုက်ပျိုးနိုင်ကြောင်း သိရသည်။
ကော်ဖီကို မြန်မာနိုင်ငံတစ်ဝန်းတွင် တစ်နိုင်တစ်ပိုင်မှ စီးပွားဖြစ်စိုက်ပျိုးထုတ်လုပ်နိုင်ကြကြောင်း၊ ဈေးကွက်ရှိသော သီးနှံဖြစ်၍ မြေနိမ့်ကော်ဖီစိုက်ပျိုး လုပ်ကိုင်လိုသူများအနေဖြင့် နည်းပညာအပါအဝင် အကူအညီများလိုအပ်ပါက စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးရုံး ရုံးအမှတ် (၁၅) တွင် ဆက်သွယ်ဆောင်ရွက်နိုင်ကြောင်း သိရသည်။