မြို့ပြအင်္ဂါရပ်နှင့် မီးဘေးအန္တရာယ်ကင်းရှင်းရေးအတွက် အလုံလမ်းနှင့် ရွှေတိဂုံဘုရားလမ်းတို့ရှိ ရှုပ်ထွေးနေသော ဆက်သွယ်ရေးကြိုးများ ရှင်းလင်း

ရန်ကုန်မြို့ပြအင်္ဂါရပ် ပိုမိုသပ်ရပ်လှပစေရန်နှင့် လမ်းမကြီးများပေါ်ရှိ ဘေးအန္တရာယ်ဖြစ်စေနိုင်သော ဆက်သွယ်ရေးကြိုးများ ရှင်းလင်းခြင်းလုပ်ငန်းစဉ်အား အစိုးရမှ စဉ်ဆက်မပြတ် တွန်းအားပေးဆောင်ရွက်လျက်ရှိရာ ရန်ကုန်တိုင်းဒေသကြီးအစိုးရအဖွဲ့ လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေးဝန်ကြီး ဒေါက်တာမျိုးသော်သည် သက်ဆိုင်ရာဌာနဆိုင်ရာအကြီးအကဲများနှင့်အတူ ဇူလိုင်လ ၁၅ ရက် နံနက်ပိုင်းက အလုံလမ်းနှင့် ဗဟိုလမ်းထောင့်၊ ရွှေတိဂုံဘုရားလမ်းတစ်လျှောက်တွင် ကွင်းဆင်းကြည့်ရှုစစ်ဆေးခဲ့ကြောင်း သိရသည်။

ထိုသို့ ကွင်းဆင်းစစ်ဆေးရာတွင် ရန်ကုန်တိုင်းဒေသကြီးအစိုးရအဖွဲ့ ဝန်ကြီး ဒေါက်တာမျိုးသော်က လမ်းမကြီးများတစ်လျှောက်တွင် နှစ်ရှည်လများ ရှုပ်ထွေးပွေလီစွာ သွယ်တန်းထားသည့် ကေဘယ်လ်ကြိုးများနှင့် ဆက်သွယ်ရေးကြိုးဟောင်းများသည် မြို့ပြအလှအပကို ထိခိုက်စေရုံတင်မကဘဲ ပြည်သူလူထုအတွက် မီးဘေးအန္တရာယ်နှင့် ဓာတ်လိုက်မှုအန္တရာယ်များ ဖြစ်ပေါ်စေနိုင်သဖြင့် သတ်မှတ်ထားသော စံချိန်စံညွှန်းများနှင့်အညီ စနစ်တကျနှင့် အမြန်ဆုံး ရှင်းလင်းဖယ်ရှားသွားရန် ကွင်းဆင်းကြီးကြပ်သူ တာဝန်ရှိသူများအား မှာကြားခဲ့သည်။

ရန်ကုန်မြို့တွင်းရှိ အဓိကလမ်းမကြီးများတွင် မြေအောက်ကေဘယ်လ်စနစ် သို့ မပြောင်းလဲသေးမီစပ်ကြား၊ လမ်းဘေးရှိ ဓာတ်တိုင်များနှင့် ဆက်သွယ်ရေးတိုင်များတွင် ရှုပ်ထွေးနေသော ကြိုးများကို စနစ်တကျ စည်းနှောင်ခြင်း၊ အသုံးမပြုတော့သော ကြိုးဟောင်းများကို ဖြတ်တောက်သိမ်းဆည်းခြင်းများကို ဆက်သွယ်ရေးအော်ပရေတာများ၊ ရန်ကုန်မြို့တော်စည်ပင်သာယာရေးကော်မတီနှင့် လျှပ်စစ်ဓာတ်အားပေးရေးကော်မဏီတို့ ပူးပေါင်းကာ အရှိန်အဟုန်ဖြင့် လုပ်ဆောင်လျက်ရှိကြောင်း သိရသည်