မြဝတီ-မဲဆောက် အမှတ်(၂) ချစ်ကြည်ရေးတံတားမပိတ်ခင် သွင်းကုန်လိုင်စင်ကျပြီး မတင်သွင်းရသေးသည့်ကုန်စည်များ ပြန်လည်တင်သွင်းနိုင်ရေးအတွက် စာရင်းကောက်ယူနေကြောင်း မြဝတီနယ်စပ်ကုန်သည်များ၏ပြောပြချက်အရ သိရသည်။
အဆိုပါ စာရင်းကောက်ယူမှုတွင် တံတားမပိတ်မီကတည်းက သွင်းကုန်လိုင်စင်လျှောက်ထားဆဲဖြစ်ပြီး ထိုင်းနိုင်ငံ Free Zone အတွင်းရှိ ကုန်ပစ္စည်းများ၊ သွင်းကုန်လိုင်စင်ရရှိပြီး တင်သွင်းရန်ကျန်ရှိသော ကုန်ပစ္စည်းများ၊ သွင်းကုန်လိုင်စင်ဖြင့် တင်သွင်းထားပြီး အကောက်ခွန်ဂျူတီ မဆောင်ရသေးသည့် ကုန်ပစ္စည်းများနှင့် အကောက်ခွန်ဂျူတီ ဆောင်ပြီးသား ကုန်ပစ္စည်းများ ပါဝင်ကြောင်း သိရသည်။
” တံတားမပိတ်ခင်တုန်းက သွင်းကုန်လိုင်စင်ကျပြီးသားသူတွေက သက်တမ်းကုန်သွားတာပေါ့။ အဲဒီဟာတွေ ပြန်လျှောက်ကြတယ်။ နောက်တစ်ခုက လိုင်စင်လျှောက်ထားဆဲပေါ့၊ တံတားမပိတ်ခင်တုန်းက လျှောက်ထားတယ်၊ ဒါပေမယ့်မကျသေးဘူး၊ အဲဒီလိုဟာတွေလည်း လျှောက်ကြတယ်။ ဒါပေမယ့်ဘယ်လိုပုံစံမျိုးနဲ့ ပြန်ချပေးမလဲဆိုတာကိုတော့ မပြောထားဘူး။ တံတားပြန်ဖွင့်မယ့်ရက်ကိုလည်း ဘယ်ဘက်ကမှ အတိအလင်း တရားဝင်ကြေညာထားတာတော့မရှိသေးဘူး”ဟု မြဝတီနယ်စပ်ကုန်သည်တစ်ဦးက ပေါ်ပြူလာနယူးစ်သို့ ပြောသည်။
ထိုသို့တင်ပြခြင်းကို ပြီးခဲ့သည့်ဧပြီလက ကြေညာခဲ့ခြင်းဖြစ်ပြီး ကုန်သည်အများစုက လျှောက်ထားပြီးဖြစ်ကြောင်း သိရသည်။
မြဝတီ-မဲဆောက် အမှတ်(၂) ချစ်ကြည်ရေးတံတားကို သင်္ကြန်ကာလအပြီးပြန်ဖွင့်မည်ဟု သတင်းများထွက်ပေါ်နေသော်လည်း တံတားနှင့်ပတ်သက်ပြီး တရားဝင်ထုတ်ပြန်ထားချက်မရှိကြောင်း ကုန်သည်များက ဆိုသည်။
အဆိုပါတံတားပြန်လည်ဖွင့်လှစ်နိုင်ခဲ့ပါက ရပ်ဆိုင်းနေသည့် တရားဝင်နယ်စပ်ကုန်သွယ်ရေးလုပ်ငန်းများ ပြန်လည်စတင်နိုင်မည်ဖြစ်ပြီး ကုန်စည်စီးဆင်းမှု မြန်ဆန်လာနိုင်သကဲ့သို့ ဒေသတွင်း စီးပွားရေးလည်း ပြန်လည်ကောင်းမွန်လာနိုင်မည်ဖြစ်ကြောင်း သိရသည်။