မြဝတီမြို့နှင့် ဘားအံမြို့သို့ ဆက်သွယ်သွားရောက်နိုင်သည့် ဖြတ်လမ်းတစ်ခုဖြစ်သည့် ထို့ကော်ကိုးလမ်းပိုင်းတွင် မိုးသည်းထန်စွာရွာသွန်းမှုကြောင့် တောင်ကျရေကျကျကာ လမ်းပျက်စီးမှု ဖြစ်ပွားခဲ့ကြောင်း ဒေသတွင်း သတင်းရင်းမြစ်များထံမှ သိရသည်။
အဆိုပါ ထို့ကော်ကိုး လမ်းပိုင်းသည် ပြည်နယ်အစိုးရနှင့် KNU/KNLA-PC တို့ ပူးပေါင်းကာ ပြင်ဆင်ထိန်းသိမ်းမှုများ ပြုလုပ်နေသည့် လမ်းပိုင်းတစ်ခုဖြစ်ပြီး လမ်းပျက်စီးမှုမှန်ကန်ကြောင်း KNU/KNLA-PC ပြောရေး ဆိုခွင့်ရှိသူ ဗိုလ်မှူးကြီး စောကျော်ညွန့်က ပေါ်ပြူလာနယူး(စ်) သို့ အတည်ပြုပြောကြားသည်။
” မှန်တာပေါ့ဗျာ။ မိုးက အခုထိလည်း ရွာနေတုန်းပဲ။ ထို့ကော်ကိုး ဒေါနတောင်ကို ကျော်တဲ့လမ်းဆိုတော့ ဒီလိုမျိုး မိုးများတဲ့အချိန်ဆို တောင်ကျရေတွေက အရမ်းကို ဆိုးတယ်လေ။ ရေတိုက်စားမှုက ဒီနေ့က တော်တော်ကိုဆိုးဆိုးရွားရွားဖြစ်တယ် ခင်ဗျ။ ဒီအချိန်မှာတော့ သွားလာဖို့ကတော့ စိတ်ချရတဲ့အခြေအနေမရောက်သေးဘူးလို့ ပြောချင်တယ်” ဟု ဗိုလ်မှူးကြီး စောကျော်ညွန့်က ပြောသည်။
ထို့ကော်ကိုးလမ်းပိုင်းသည် ဒေါနတော်ကျော်လမ်းဖြစ်ပြီး ကွန်ကရစ်လမ်း (၅) မိုင် ဝန်းကျင်နှင့် ကျောက်ချောမြေသားလမ်း (၁၁) မိုင်ဝန်းကျင်ရှိသည့် အနေအထားဖြစ်ပြီး လက်ရှိတွင် လမ်းပိုင်းအတွင်းရှိ အချို့နေရာများ ပျက်စီးသွားသည့်အတွက် ဖြတ်သန်းသွားလာရန် စိတ်ချရသည့်အခြေအနေရောက်မှသာ သွားလာကြရန်လည်း ၎င်းက အကြံပြသည်။
အဆိုပါ လမ်းပိုင်းသည် အာရှလမ်းသစ်မှ ဖြတ်သန်းသွားလာရန် မလွယ်ကူသည့်အချိန်တွင် မြဝတီ – ဘားအံ သွားလာရေးအတွက် ကြားဖြတ်ဆက်သွယ်ရေး လမ်းကြောင်း တစ်ခုအဖြစ် အသုံးပြုကြသည့် လမ်းဖြစ်သည်။
ယမန်နေ့က အာရှလမ်းသစ်ရှိ ဒေါနတောင်တက်လမ်းပိုင်းတွင် လမ်းပြိုကျမှုကြောင့် ဖြတ်သန်းသွားလာရန် အခက်အခဲဖြစ်နေချိန် ယင်းလမ်းပိုင်အား အသုံးပြုကြရန် စဉ်းစားမှုများ ရှိနေကြချိန်တွင် အဆိုပါလမ်းပိုင်းသည်လည်း ယခုကဲ့သို့ ပျက်စီးသွားခဲ့ခြင်းဖြစ်သည်။
ယင်းကဲ့သို့ ထို့ကော်ကိုး လမ်းပိုင်းပါ ပျက်စီးသွားမှုသည် ထိုင်း – မြန်မာ ကုန်စည်စီးဆင်မှုကို ဆိုးရွားစွာရိုက်ခတ်လာနိုင်သည့် အခြေအနေဖြစ်ကြောင်းလည်း ဒေသခံများက သုံးသပ်သည်။
” ထိုင်း-မြန်မာ ကုန်စည်စီးဆင်းမှုကတော့ တော်တော်လေးကို ခက်ခက်ခဲခဲ ကျပ်ကျပ်တည်းတည်းဖြစ်သွားနိုင်တယ်လို့ ထင်ပါတယ်။ ကုန်တင်ကားတွေ ဘာတွေအသာထား သာမန် အိမ်စီးကားတွေတောင် သွားလာဖို့ မလွယ်ကူတဲ့အခြေအနေမျိုးဆိုတော့ ထိုင်း – မြန်မာ ကုန်သွယ်မှုနဲ့ ကု န်စည်စီးဆင်းမှုက တော်တော်လေးကို အကျပ်အတည်းဖြစ်မယ်လို့ ကျွန်တော်တို့ ခန့်မှန်းထားပါတယ်” ဟု ဒေသခံတစ်ဦးက ဆိုသည်။
ယနေ့နံနက်ပိုင်းတွင် တောင်ကျရေကြောင့် ပျက်စီးသွားခဲ့သည့် ထို့ကော်ကိုးလမ်းပိုင်းကိုလည်း ပြန်လည်ပြင်ဆင်မှုများလုပ်ဆောင်သွားရန် စီစဉ်နေသည်ဟုသိရသည်။
ဓာတ်ပုံ – စိုင်းလူမုန်း
