မြန်မာ-ထိုင်းနှစ်နိုင်ငံအကျိုးစီးပွားအတွက် (၁၀၁) ကြိမ်မြောက် မြန်မာ-ထိုင်းမြို့နယ်အဆင့်နယ်ခြားကော်မတီ(တာချီလိတ်-မယ်ဆိုင်)ပုံမှန်အစည်းအဝေးကို ယနေ့ သြဂုတ် ၂၉ ရက်နံနက်ပိုင်းက တာချီလိတ်မြို့၌ကျင်းပခဲ့ကြောင်း သိရသည်။
တာချီလိတ်မြို့နယ်အဆင့် နယ်ခြားကော်မတီဥက္ကဋ္ဌ ၊ စစ်ဗျူဟာ(အခြေချ)တာချီလိတ် စစ်ဗျူဟာမှူးဗိုလ်မှူးကြီးကျော်မင်းထွန်းနှင့် တာဝန်ရှိသူများ၊ မြို့နယ်အဆင့်နယ်ခြားကော်မတီ ဥက္ကဋ္ဌ၊ ကျောက်တာခ့်လှုပ်ရှားတပ်ဖွဲ့မှ ဗျူဟာမှူး ဗိုလ်မှူးကြီး အနုဝပ်ဘန်းယားနန်းနှင့် တာဝန်ရှိသူများတက်ရောက်ခဲ့ကြကြောင်း သိရသည်။
အစည်းအဝေးတွင် မြန်မာ-ထိုင်းနှစ်နိုင်ငံ နယ်စပ်ဒေသတစ်လျှောက်တည်ငြိမ်ရေး၊ လုံခြုံရေး၊ ရာဇဝတ်မှုကင်းရှင်းရေးအတွက် ပူးပေါင်းကိုင်တွယ်ဖြေရှင်းရေး၊ နှစ်နိုင်ငံအကျီုးစီးပွာနှင့် နယ်စပ်ဒေသတွင်နေထိုင်သူများ သာယာဝပြောရေး၊ ဖွံ့ဖြိုးတိုးတက်ရေး၊ ယဉ်ကျေးမှုအပြန်အလှန်ဖလှယ်ရေး၊ အများပြည်သူဆိုင်ရာဘေးအန္တရာယ်လျှော့ချရေး၊ မူးယစ်ဆေးဝါးအန္တရာယ်တို့အား ဆက်လက်ပူးပေါင်းဆောင်ရွက်ရန် ဆွေးနွေးခဲ့ကြကြောင်း သိရသည်။
ထို့ပြင် အကြမ်းဖက်မှုနှင့် လက်နက်မှောင်ခိုမှု၊ ပြည်ပအလုပ်သမားများအရေး၊ လူကုန်ကူးမှုတားဆီးကာကွယ်ရေးတို့တွင် နှစ်နိုင်ငံပူးပေါင်းဆောင်ရွက်ရန်၊ သတင်းအချက်အလက်များအပြန်အလှန်ဖလှယ်၍ ပြဿနာများကို မြို့နယ်အဆင့်နယ်ခြားကော်မတီများမှ ပိုမိုကောင်းမွန်စွာဖြေရှင်းနိုင်ရန်နှင့် ဖြေရှင်းနိုင်ခြင်းမရှိသည့် ပြဿနာရပ်များကို အထက်ဌာနအဆင့်ဆင့်သို့ ဆက်လက်တင်ပြဖြေရှင်းရန်လည်း ဆွေးနွေးခဲ့ကြကြောင်း သိရသည်။