လက်ရှိ မြန်မာနိုင်ငံ၏ အိမ်ခြံမြေဈေးကွက်သည် အမြင့်ဘက်သို့ ဦးတည်နေကြောင်း မြန်မာနိုင်ငံအိမ်ခြံမြေလုပ်ငန်းဖွံဖြိုးတိုးတက်ရေးအသင်း (MRPDA) ဥက္ကဋ္ဌ ဦးအောင်ထွန်းက ပြောကြားသည်။
ယင်းပြောကြားချက်ကို ဇူလိုင်လ ၁၅ ရက်နေ့ ရန်ကုန်မြို့၊ အရှေ့မျဉ်းပြိုင်ကွင်းလမ်းရှိ Sky Star Hotel တွင် ပြုလုပ်သည့် ငွေကြေးခဝါချမှုတိုက်ဖျက်ရေးဗဟိုအဖွဲ့၊ အထွေထွေအုပ်ချုပ်ရေးဦးစီးဌာနနှင့် မြန်မာနိုင်ငံအိမ်ခြံမြေ လုပ်ငန်းဖွံ့ဖြိုးတိုးတက်ရေးအသင်း (MRPDA)တို့ပူးပေါင်းကျင်းပသည့် “ ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှု တိုက်ဖျက်ရေးဥပဒေနှင့် အိမ်ခြံမြေအကျိုးဆောင်များဆိုင်ရာ အသိပညာပေးဟောပြောပွဲ” တွင် ထည့်သွင်းပြောကြားခဲ့ခြင်းဖြစ်သည်။
လက်ရှိကာလ၌ မြန်မာနိုင်ငံ၏ အိမ်ခြံမြေဈေးကွက်သည် နေရာဒေသအလိုက် အတက်ဘက်ကိုသာ ဦးတည်နေပြီး ဈေးကျရန် အလားအလာနည်းနေသေးကြောင်း ၎င်းကဆိုသည်။
အိမ်ခြံမြေတစ်ခု အရောင်းအဝယ်ကောင်းမွန်ရန် လုံခြုံအေးချမ်းပြီး နေထိုင်ရန်ကောင်းမွန်သည့်ဒေသများနှင့် စီးပွားရေးလုပ်ငန်းလုပ်ကိုင်ရန် အဆင်ပြေသည့်အပေါ် မူတည်နေကြောင်းနှင့် အရောင်းအဝယ်ကိစ္စရပ်များ မှားယွင်းမှုမရှိစေရန် စနစ်တကျ သင်တန်းပေးထားပြီး ယုံကြည်စိတ်ချရသည့် အကျိုးဆောင်များနှင့် ဆောင်ရွက်သင့်ကြောင်း ၎င်းကထပ်လောင်းပြောကြားခဲ့သည်။
“မြန်မာနိုင်ငံရဲ့ အိမ်ခြံမြေစျေးကွက်က နေရာဒေသအလိုက် အတက်ဘက်ကို ဦးတည်နေပါတယ်။ စျေးကျဖို့မရှိပါဘူး။ အိမ်ခြံမြေတစ်ခု အရောင်းအ၀ယ်ကောင်းဖို့ဆိုတာ လုံခြုံအေးချမ်းပြီး နေထိုင်လို့ကောင်းတဲ့ ဒေသတွေနဲ့ စီးပွားရေးလုပ်ငန်းလုပ်ကိုင်ဖို့ အဆင်ပြေတဲ့အပေါ်မူတည်ပါတယ်” ဟု MRPDA ဥက္ကဋ္ဌ ဦးအောင်ထွန်းက ပြောကြားသည်။
လက်ရှိအချိန်၌ ရန်ကုန်မြို့၏ အိမ်ခြံမြေစျေးကွက်တွင် ဒဂုံမြို့သစ်(၄) မြို့နယ်မှာ အရောင်းအ၀ယ် ကောင်းမွန်လျက်ရှိပြီး ယင်းမြို့နယ်များအနက် ဒဂုံမြို့သစ်(မြောက်ပိုင်း)သည် အရောင်းအဝယ် အများဆုံး ပြုလုပ်လျက်ရှိကြောင်း သိရသည်။
အိမ်၊ခြံ၊မြေစျေးမြင့်တက်ခြင်းသည် ငွေကြေးဖောင်းပွမှုနှုန်းအရ ဆက်စပ်မှုရှိနေပြီး လက်၀ယ်ငွေကြေးမကိုင်ထားဘဲ ခိုင်မာသည့် အိမ်၊ ခြံ ၊မြေများအပေါ်တွင် ရင်းနှီးမြှုပ်နှံခြင်းများကြောင့် ဖြစ်သည်ဟု ဖိုးလမင်းအိမ်ခြံမြေကုမ္ပဏီမှ မန်နေးဂျင်းဒါရိုက်တာ ဦး၀ဏ္ဏစိုးကပြောကြားသည်။
