ပြည်တွင်းသရက်သီးဈေးကွက်၌ မြန်မာ့စိန်တလုံးသရက်သီးများ ပေါ်ဦးပေါ်ဖျားရာသီဖြစ်သည့်အတွက် ဈေးကောင်းရရှိနေကြောင်း ပြည်တွင်းသရက်သီး ဈေးကွက်အတွင်းမှ စုံစမ်းသိရှိရသည်။
မြန်မာနိုင်ငံတွင် သရက်သီးစိုက်ပျိုးထုတ်လုပ်မှုအရ မြန်မာ့စိန်တလုံးသရက်သီးကို ပဲခူးတိုင်း၊ မကွေးတိုင်း၊ စစ်ကိုင်းတိုင်းဒေသကြီး၊ မန္တလေးတိုင်း၊ ကျောက်ဆည်ဒေသ၊ စဉ့်ကိုင်ဒေသနှင့် ရှမ်းပြည်နယ်တို့တွင် အဓိကစိုက်ပျိုးကြခြင်းဖြစ်သည်။
ထို့ပြင် စစ်ကိုင်းတိုင်းဒေသကြီး၊ မုံရွာမြို့နယ်ရှိ ရွှေဘို၊ ကန့်ဘလူ၊ ဘုတလင်မြို့နယ်များသည် စိန်တလုံးသရက်ကို အများဆုံးစိုက်ပြီး ပတ္တမြားငမောက်နှင့် စိမ်းချိုစသည့် သရက်မျိုးများကိုလည်း စိုက်ပျိုးကြသည်။
ယခု မေလဆန်းပိုင်များစ၍ ရွှေဘို၊ ဘုတလင်၊ ကနီမြို့နယ်များမှ ဝင်ရောက်လာပြီး မုံရွာမြို့ရှိဈေးများသို့ မြန်မာ့စိန်တလုံးသရက်သီးသည် ဈေးကွက်ရရှိနေပြီး ပေါ်ဦးပေါ်ဖျားဖြစ်၍ ဈေးကောင်းရရှိကာ သရက်သီးပွဲရုံများတွင် တောင်းပြတ်ရောင်းချလျှင် တောင်းတစ်တောင်းလျှင် လက်က္ကားဈေးပြွန် ပျမ်းမျှ တစ်လုံး(၅၀၀) ကျပ်နှုန်းဖြင့် အလုံးရေ (၁၂၀) ပါ (၆၀၀၀၀)ကျပ်ဖြင့် ရောင်းချရကြောင်း သိရသည်။
ယင်းအပြင်သစ်သီးခြင်းတစ်ခြင်းလျှင် အလုံးရေ(၁၀၀)လုံးပါ ငွေကျပ် (၅)သောင်းဖြင့် ရောင်းချလျက်ရှိပြီး ရွေးကောက်ရောင်းချလျှင် သရက်သီးအလုံး အသေး/အကြီးအမျိုးအစား ပေါ်မူတည်၍ (၅၀၀)ကျပ်မှ စတင်ပြီး (၁၀၀၀)ကျပ် အထိရောင်းချရပြီး ဈေးကွက်အတွင်း အရောင်းသွက်လျက်ရှိကြောင်း သိရသည်။
တစ်ရက်ရောင်းချရမှုမှာ သရက်သီးတောင်းရေ (၁၀၀) မှ (၁၅၀) ခန့်ထိ ရောင်းချရပြီး ရန်ကုန်၊ မန္တလေး၊ ပြင်ဦးလွင်မြို့များသို့ ပို့ဆောင်ရကြောင်း သရက်သီးပွဲရုံများမှ သိရသည်။
မြန်မာနိုင်ငံတွင် အဓိကအားဖြင့် စိုက်ပျိုးကြသည့် ရောင်းတန်းဝင် သရက်သီး အမျိုးအစားများမှာ မြကျောက်၊ စိန်တလုံး၊ ရွှေဟင်္သာ၊ ရင်ကွဲ၊ မချစ်စု၊ ပတ္တမြားငမောက်နှင့် စိမ်းချိုစသော သရက်သီး အမျိုးအစားများ ဖြစ်ကြောင်း သိရသည်။