သြစတြေးလျအနေဖြင့် မြန်မာအပါအဝင် ကမ္ဘာတစ်ဝန်း၌ အသက်ဆုံးရှုံးစေနိုင်သည့် ရောဂါများကိုတို-က်ဖျ-က်ရန် သြစတြေးလျက ဒေါ်လာ ၃၈၆ သန်း ပံ့ပိုးပေးမည်ဖြစ်ကြောင်း မြန်မာနိုင်ငံဆိုင်ရာ ဩစတြေးလျသံရုံးက ထုတ်ပြန်ထားသည်။
၂၀၂၆ ခုနှစ်မှ ၂၀၃၀ ခုနှစ်အထိ မြန်မာနိုင်ငံအပါအဝင် မိမိတို့ဒေသတွင်းနှင့် ကမ္ဘာတစ်လွှား၌ အသက်ဆုံးရှုံးစေနိုင်သည့်ရောဂါများကိုတို-က်ဖျ-က်ရန်အတွက် Gavi, the Vaccine Alliance များ၏ ရေးကြီးသောလုပ်ငန်းများတွင် အထောက်အကူဖြစ်စေရန် ဒေါ်လာ ၃၈၆ သန်းကို ပံပိုးပေးအပ်မည်ဖြစ်သည်။
Gavi သည် ကမ္ဘာတစ်လွှားရှိ ကလေးငယ် ၁.၁ ဘီလီယံကျော်ကိုကာကွယ်ဆေးထိုးနှံပေးခဲ့ပြီး အသက်ပေါင်း ၁၈.၈ သန်းကျော်ကိုကယ်ဆယ်နိုင်ခဲ့သည့် public-private partnership တစ်ခုဖြစ်သည်။
အာရှနှင့် ပစိဖိတ်ဒေသအတွင်း ကလေးငယ် ၆၃၃ သန်းကျော်ကိုကာကွယ်ဆေးထိုးနှံပေးခဲ့ပြီး အသက်ပေါင်း ၆ သန်းကျော်ကိုကယ်ဆယ်နိုင်ခဲ့ကြောင်း သိရသည်။
မြန်မာနိုင်ငံတွင်လည်း ကိုဗစ်-၁၉ ကပ်ရောဂါကာလကစပြီး ကလေးငယ်နှင့်ကိုယ်ဝန်ဆောင်မိခင်သန်းပေါင်းများစွာအတွက် ကာကွယ်ဆေးများရရှိအောင်ကူညီလျက်ရှိကြောင်း၊ ယင်းအပြင် မြန်မာ၊ အင်ဒိုနီးရှား၊ လာအို၊ ကမ္ဘောဒီးယား၊ ဆော်လမွန်ကျွန်းနိုင်ငံနှင့် တီမောလက်စ်တေနိုင်ငံတို့တွင် သားအိမ်ခေါင်းကင်ဆာကာကွယ်ဆေးကိုလက်လှမ်းမီရရှိအောင်ကူညီဆောင်ရွက်ခြင်းဖြင့် သားအိမ်ခေါင်းကင်ဆာကြောင့်ေ-သဆုံးမှု ၂၇,၀၀၀ ကျော်ကို Gavi က တားဆီးနိုင်ခဲ့ကြောင်း ထုတ်ပြန်ချက်အရ သိရသည်။
ကမ္ဘာတစ်လွှား မသေချာမရေရာမှုများမြင့်တက်နေချိန်တွင် သြစတြေးလျအနေဖြင့် မြန်မာနိုင်ငံအပါအဝင် အနီးဆုံးအိမ်နီးချင်းနိုင်ငံများ အသက်ကယ်ကာကွယ်ဆေးများရရှိနိုင်ရန်အတွက် Gavi နှင့်အတူပူးပေါင်းကာ ကူညီပံ့ပိုးပေးသည်ကို ဝမ်းမြောက်ကြောင်းဆိုသည်။