မြန်မာရွေ့ပြောင်း အလုပ်သမားများအပေါ် အလုပ်ရှင်များက လုပ်အားခခေါင်းပုံဖြတ်ခြင်းကို ကာကွယ်စောင့်ရှောက်ပေးရန်၊ ထိုင်းနိုင်ငံ နွန်ထပူရီ မြို့တွင် အလုပ်သမားသံရုံးသစ် ဖွင့်လှစ်လိုက်ကြောင်း အလုပ်သမားဝန်ကြီးဌာနမှ သိရသည်။
အဆိုပါ အလုပ်သမားသံရုံးသစ် ဖွင့်လှစ်မည့်နေရာသို့ အလုပ်သမားဝန်ကြီးဌာန ပြည်ထောင်စုဝန်ကြီး ဦးမြင့်နောင် ကြည့်ရှုစစ်ဆေးခဲ့ကြောင်း သိရသည်။
အလုပ်သမားဝန်ကြီးဌာန၊ ပြည်ထောင်စုဝန်ကြီး ဦးမြင့်နောင် ဦးဆောင်သည့် မြန်မာကိုယ်စားလှယ်အဖွဲ့နှင့် မြန်မာသံအမတ်ကြီး ဦးချစ်ဆွေ တို့သည် ဒီဇင်ဘာ ၁၁ ရက် နံနက်ပိုင်းက နွန်ထပူရီမြို့ရှိ အလုပ်သမား သံအရာရှိရုံး၊ သာမန်မြန်မာနိုင်ငံကူးလက်မှတ်ထုတ်ပေးရေးဌာနစိတ်၏ ယာယီအချက်အလက် ကောက်ယူရေးဌာနခွဲ(TDCC)နှင့် မြန်မာပြည်ပအလုပ်အကိုင် ဝန်ဆောင်မှု လုပ်ငန်းရှင်များအဖွဲ့ချုပ် (MOEAF) တို့၏ ရုံးခန်းနေရာများ ပြောင်းရွှေ့ဖွင့်လှစ်မည့်နေရာသစ်သို့ သွားရောက်ခဲ့ကြောင်း သိရသည်။
ပြည်ထောင်စုဝန်ကြီးနှင့်အဖွဲ့သည် အလုပ်သမားသံအရာရှိရုံး ပြောင်းရွှေ့ဖွင့်လှစ်မည့် နေရာများနှင့် ဝန်ထမ်းအိပ်ဆောင်များ၊ သံအရာရှိရုံးသို့ အကူအညီတောင်းခံလာသည့် အလုပ်သမားများအတွက် ခေတ္တတည်းခိုနေထိုင်မည့် နေရာများကို လှည့်လည်ကြည့်ရှုစစ်ဆေးခြင်း၊ ယာယီအချက်အလက်ကောက်ယူရေးဌာနခွဲ(TDCC)နှင့် မြန်မာပြည်ပအလုပ်အကိုင်ဝန်ဆောင်မှု လုပ်ငန်းရှင်များအဖွဲ့ချုပ်(MOEAF)၏ ရုံးခန်းဖွင့်လှစ်နေရာချထားမည့် နေရာများအား စစ်ဆေးကြည့်ရှုခြင်း၊ အဆောက်အဦငှားရမ်းရေးစာချုပ် ချုပ်ဆိုခြင်းနှင့် MOEAF မှ တာဝန်ရှိသူတို့နှင့် တွေ့ဆုံ၍ လုပ်ငန်းအခြေအနေ တင်ပြမှုများကို ညှိနှိုင်းဆောင်ရွက်ပေးခဲ့ကြောင်း သိရသည်။
မြန်မာရွေ့ပြောင်းအလုပ်သမားများအပေါ် အလုပ်ရှင်များက လုပ်အားခေါင်းပုံဖြတ်ခြင်းကို ကာကွယ်စောင့်ရှောက်ပေးရန်၊ သက်ဆိုင်ရာနိုင်ငံ၏ ဥပဒေပါအတိုင်း အကျိုးခံစားခွင့်များရရှိရေး ဆောင်ရွက်ပေးရန်နှင့် အလုပ်သမားရေးရာပြဿနာများကို အချိန်နှင့်တပြေးညီ ညှိနှိုင်းဆောင်ရွက်ပေးနိုင်ရန်အတွက် ပြည်ပတွင် အလုပ်လုပ်ကိုင်မှု ကြီးကြပ်ရေးကော်မတီ၏ ကြီးကြပ်မှုဖြင့် ၂၀၁၁ ခုနှစ်မှစ၍ အလုပ်သမားသံအရာရှိတစ်ဦးကို ခန့်ထားဆောင်ရွက်ခဲ့ကြောင်း သိရသည်။
ထို့နောက် အလုပ်သမား အရေအတွက်များပြားလာခြင်းနှင့် အလုပ်သမားရေးရာ ပြဿနာများကို ပိုမိုထိရောက်စွာ ဖြေရှင်းဆောင်ရွက်နိုင်ရန်အတွက် အလုပ်သမားဝန်ကြီးဌာနမှ အလုပ်သမား သံအရာရှိ (၅) ဦးကို တာဝန်ပေး စေလွှတ်ခဲ့ကြောင်း သိရသည်။
ထို့အပြင် MoU U-turn လုပ်ငန်းစဉ်နှင့် အခြားလုပ်ငန်းလိုအပ်ချက်များအရ ၂၀၂၃ ခုနှစ်၊ အောက်တိုဘာလတွင် ညွှန်ကြားရေးမှူးအဆင့် အရာထမ်း (၁) ဦးအား အလုပ်သမား သံအရာရှိအဖြစ် ထိုင်းနိုင်ငံသို့ ထပ်မံစေလွှတ်တာဝန်ပေးအပ်ခဲ့ပြီး ဦးစီးအရာရှိအဆင့် အလုပ်သမားသံအရာရှိ(၁) ဦးကိုလ ည်း ထပ်မံသက်တမ်းတိုး တာဝန်ပေးအပ်ခဲ့ကြောင်း သိရသည်။
မြန်မာနိုင်ငံအနေဖြင့် ၂၀၂၂/ ၂၀၂၃ ခုနှစ်၊ အောက်တိုဘာလအထိ ထိုင်းနိုင်ငံသို့ စေလွှတ်ခဲ့သည့် အလုပ်သမားနှင့် CI ထုတ်ပေးမှု အရေအတွက်မှာ (၁.၁) သန်း၊ MoU လူသစ်သည် (ဝ.၄၄) သန်း၊ MoU လူဟောင်း (ဝ.၁၆)သန်း၊ စုစုပေါင်း (၁.၇) သန်းအပြင် ယခု CI ထပ်မံဆောင်ရွက်ရန် (၈) သိန်းကျော်ရှိကြောင်း သိရသဖြင့် အကြမ်းဖျဉ်းအားဖြင့် (၂.၅) သန်းဟု ခန့်မှန်းထားချက်အရ သိရသည်။
အလုပ်သမားသံအရာရှိရုံးအနေဖြင့် ပြည်ပတွင်အလုပ်လုပ်ကိုင်မှု ကြီးကြပ်ရေးကော်မတီနှင့် ဝန်ကြီးဌာန၏ လမ်းညွှန်မှုကိုခံယူကာ ထိုင်းနိုင်ငံရောက် မြန်မာရွှေ့ပြောင်းအလုပ်သမားများ အပေါ် သက်ဆိုင်ရာနိုင်ငံမှ အလုပ်ရှင်များက လုပ်အားခေါင်းပုံဖြတ်မခံရစေရန် ကာကွယ်စောင့်ရှောက်မှုများပေးခြင်း၊ သက်ဆိုင်ရာနိုင်ငံများ၏ အလုပ်သမားဥပဒေပါ အကျိုးခံစားခွင့်များ အပြည့်အဝရရှိခံစားနိုင်ရေး ဆောင်ရွက်ပေးခြင်းနှင့် အလုပ်သမားရေးရာအခက်အခဲများကို သက်ဆိုင်ရာ နိုင်ငံရှိ ဝန်ကြီးဌာနများ၊ လူမှုရေးအဖွဲ့အစည်းများနှင့် ချိတ်ဆက်ပြီး ကူညီဆောင်ရွက်ပေးလျက်ရှိကြောင်းလည်း သိရသည်။
