မြန်မာနိုင်ငံ ဆန်စပါးအသင်းချုပ်၏ (၆)ကြိမ်မြောက်ရွေးချယ်တင်မြှောက်ပွဲတွင်၂ဝ၂၅ -၂ဝ၂၇ သက်တမ်းကာလအတွက် ဥက္ကဋ္ဌအဖြစ် ဦးရဲမင်းအောင်ကို ဆက်လက် ရွေးချယ်တင်မြှောက်ခဲ့ကြောင်း သိရသည်။
မြန်မာနိုင်ငံ ဆန်စပါးအသင်းချုပ်အနေဖြင့်ရွေးကောက်တင်မြှောက်ပွဲ (၅) ကြိမ်ကျင်းပခဲ့ပြီး ဖွဲ့စည်းပုံနှင့်အညီ ကဏ္ဍအသီးသီးမှ အထွေထွေညီလာခံ ကိုယ်စားလှယ်များက စီမံခန့်ခွဲရေးကော်မတီခေါင်းဆောင်များ၊ ဗဟိုအလုပ်အမှုဆောင်၊ အလုပ်အမှုဆောင်များကို ရွေးချယ်တင်မြှောက်ခဲ့ကြသည်။
ထို့ပြင် ၂ဝ၁၉ ခုနှစ်၊ မန္တလေးမြို့တွင် ကျင်းပသော အထွေထွေညီလာခံတွင် ဥက္ကဋ္ဌ ဦးချစ်ခိုင်မှ နှုတ်ထွက်ရန် အဆိုပြုတင်ပြခဲ့ပြီး ကျန်ရှိသော သက်တမ်းကာလအတွက် နောင်ရွေးချယ်တင်မြှောက်ပွဲ မကျင်းပချိန်အထိ ယာယီအားဖြင့် ဥက္ကဋ္ဌ ဦးရဲမင်းအောင်၊ အထွေထွေအတွင်းရေးမှူး ဦးလူမော်မြင့်မောင်တို့ကို အထွေထွေညီလာခံမှ တင်မြှောက်ထားခြင်းဖြစ်ကြောင်း သိရသည်။
ထို့နောက်အသင်းချုပ်၏ ၂ဝ၂၂-၂ဝ၂၄ သက်တမ်းအတွက် ရွေးကောက်ပွဲကို ၂၀၂၁ ခုနှစ် ဒီဇင်ဘာလ (၃၁) ရက်တွင် ကျင်းပခဲ့ပြီး ဥက္ကဋ္ဌအဖြစ် ဦးရဲမင်းအောင်၊ အထွေထွေအတွင်းရေးမှူးအဖြစ် ဦးလူမော်မြင့်မောင်တို့အား ရွေးချယ်တင်မြှောက်ခဲ့သည်။
အသင်းချုပ်၏ (၆)ကြိမ်မြောက်ရွေးချယ်တင်မြှောက်ပွဲကို ၂ဝ၂၅ ခုနှစ် ဇန်နဝါရီလ ၂၃ ရက်တွင် ကျင်းပပြုလုပ်ခဲ့ပြီး ၂ဝ၂၅ -၂ဝ၂၇ သက်တမ်းကာလအတွက် ခေါင်းဆောင်အသစ်များကို ရွေးချယ်တင်မြှောက်ခဲ့ရာ ဥက္ကဋ္ဌအဖြစ် ဦးရဲမင်းအောင်မှ ဆက်လက်တာဝန်ထမ်းဆောင်မည်ဖြစ်ပြီး အထွေထွေအတွင်းရေးမှူး ဦးလူမော်မြင့်မောင်မှ တာဝန်ယူဆောင်ရွက်မည်ဖြစ်ကြောင်း သိရသည်။
မြန်မာနိုင်ငံဆန်စပါးကုန်သည်များအသင်း၊ မြန်မာနိုင်ငံဆန် စက်လုပ်ငန်းရှင်များအသင်း၊ မြန်မာနိုင်ငံဆန်စပါးစိုက်ပျိုးထုတ်လုပ်သူများအသင်းတို့ကို အစုအဖွဲ့ အဖြစ် ပါဝင်သည့် ဆန်စပါး အထူးပြုကုမ္ပဏီများ ပူးပေါင်းပါဝင်သော ဆန်စပါးစိုက်ပျိုးသည်မှ တင်ပို့ရောင်းချသည်အထိ (Supply Chain) တလျှောက်လုံး ပါဝင်သော စိုက်ပျိုးထုတ်လုပ်၊ ကြိတ်ခွဲတင်ပို့ရောင်းချသူများအားလုံး စည်းစည်းလုံးလုံး ညီညီညွတ်ညွတ်ဖြင့် အချိတ်အဆက်မိစွာ လုပ်ငန်းများဆောင်ရွက်နိုင်စေရန်အတွက် ၂ဝ၁ဝ ခုနှစ်၊ ဇန်နဝါရီလ(၂)ရက်တွင် မြန်မာနိုင်ငံ ဆန်စပါးလုပ်ငန်းအသင်း (Myanmar Rice Industry Association-MRIA) ကို ဖွဲ့စည်းခဲ့ကြောင်း သိရသည်။
၂၀၁၁ ခုနှစ် နိုင်ငံတော်သမ္မတ ဦးသိန်းစိန်၏ အစိုးရလက်ထက်တွင် မြန်မာနိုင်ငံဆန်စပါးလုပ်ငန်းအသင်း(MRIA)အား မြန်မာနိုင်ငံ ဆန်စပါးအသင်းချုပ်(MRF) အဖြစ်သို့ ပြောင်းလဲတိုးမြှင့် ဖွဲ့စည်းရန်နှင့် မူလတည်ရှိသော အသင်းများ၊ ပြန်လည်သက်ဝင်လှုပ်ရှားပြီး အသင်းချုပ်၏ ဦးဆောင်မှုအောက်တွင် လုပ်ငန်း ဆောင်ရွက်ရန် သဘောတူညီမှုဖြင့် ၂ဝ၁၃ ခုနှစ်၊ ဇွန်လ(၂၃)ရက်တွင် မြန်မာနိုင်ငံဆန်စပါးအသင်းချုပ်ကို (Federation) တိုးမြှင့်ဖွဲ့စည်းခဲ့ခြင်းဖြစ်ကြောင်း သိရသည်။