မြန်မာနိုင်ငံအတွက် တရုတ်နိုင်ငံသည် ဒုတိယမြောက်ရင်းနှီးမြှုပ်နှံမှုအများဆုံးဖြစ်ကြောင်း မြန်မာနိုင်ငံရင်းနှီးမြှုပ်နှံမှုနှင့် ကုမ္ပဏီများစီမံခန့်ခွဲရေးဦးစီးဌာနမှ ဒုတိယညွှန်ကြားရေးမှူးချုပ် ဦးမင်းဇော်ဦးက တရုတ်(ချုံချင့်ပိရှန်း) – မြန်မာ စီးပွားရေး ပူးပေါင်းဆောင်ရွက်မှု မိတ်ဆက်ပွဲအခမ်းအနားတွင် ပြောကြားခဲ့သည်။
“ မြန်မာနိုင်ငံမှာ တရုတ်နိုင်ငံဟာ ကျွန်တော်တို့ရဲ့ရင်းနှီးမြှုပ်နှံမှုမှာ ဒုတိယမြောက်အကြီးဆုံးလို့ စာရင်းဇယားများအရ ပေါ်ပါတယ်။ ဒါကတိုက်ရိုက်လာတဲ့ရင်းနှီးမြှုပ်နှံမှုကိုပဲ ပြောတာပဲဖြစ်ပါတယ်။ တရုတ်နိုင်ငံရဲ့ စုစုပေါင်းကုမ္ပဏီလုပ်ငန်းပေါင်း ၅၈၃ ခု ဟာ ရင်းနှီးမြုပ်နှံမှု တိုက်ရိုက်ခွင့်ပြုထားတဲ့ဟာပေါ့။ စက်မှုလုပ်ငန်းမှာ လုပ်နေတာ ၅၂၄ ခုတောင်ရှိပါတယ်။ ၉၀ ရာခိုင်နှုန်းလောက်က စက်မှုကုန်ထုတ်လုပ်ငန်းကို ဆောင်ရွက်နေကြတာဖြစ်ပါတယ်။ တရုတ်နိုင်ငံကို ဒုတိယလို့ ပြောလိုက်ရတဲ့ထဲမှာမှ တရုတ်ကတိုက်ရိုက်လာတဲ့ စာရင်းအရ ဒီ ၅၀၀ ကျော်ကနေပြီးတော့ ပေါင်းစပ်လာတဲ့ စာရင်းဖြစ်ပါတယ်။ တရုတ်နိုင်ငံကနေပြီးတော့မှ ဟောင်ကောင်ဘက်က ပတ်လာတာရှိတယ်။ စင်ကာပူကပတ်လာတာတွေရှိပါတယ်။ ဒါတွေကိုပေါင်းစပ်လိုက်ရင်တရုတ်နိုင်ငံက ရင်းနှီးမြှုပ်နှံမှုက ကျွန်တော်တို့နိုင်ငံအတွက် နံပါတ်တစ် ပါတနာလို့ ပြောလို့ရပါတယ်”ဟု ၎င်းကဆိုသည်။
တရုတ်နိုင်ငံသည် စက်မှုကုန်ထုတ်လုပ်ငန်းများတွင် အဓိကထားရင်းနှီးမြှုပ်နှံထားသည့်အတွက် မြန်မာနိုင်ငံ၏ လုပ်သားများအလုပ်ကိုင်အခွင့်အလမ်းရရှိရေးကိစ္စရပ်များတွင်လည်း တရုတ်စက်မှုလုပ်ငန်းများက များစွာအထောက် အကူပြုကြောင်း သိရသည်။
မြန်မာနိုင်ငံတွင် တရုတ်နိုင်ငံမှ ကုမ္ပဏီပေါင်း ၅၈၀ ကျော် ရင်းနှီးမြှုပ်နှံထားမှုမှ ကန်ဒေါ်လာ ၂၁ ဒသမ ၇ ဘီလျံကျော်ရှိပြီး စုစု ပေါင်း နိုင်ငံခြား ရင်းနှီးမြှုပ်နှံမှု၏ ၂၃ ရာခိုင်နှုန်းကျော်ဖြင့် ဒုတိယအများဆုံး လာရောက် ရင်းနှီးမြှုပ်နှံထားခြင်းဖြစ်ကြောင်း သိရသည်။