နိုင်ငံတစ်နိုင်ငံဖွံ့ဖြိုးတိုးတက်မှု၏ အခြေခံအုတ်မြစ်သည် ပညာတတ်အရင်းအမြစ်များပေါများခြင်းဖြစ်ဟုပြောကြား
မြန်မာနိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်သည် ယနေ့ အောက်တိုဘာ ၂၁ ရက်နံနက်ပိုင်းက ပြည်ထောင်စုတိုင်းရင်းသားလူမျိုးများဖွံ့ဖြိုးရေးတက္ကသိုလ် ပညာရေးဘွဲ့(၅)နှစ်သင်တန်း ၏ အမှတ်စဉ်(၇)မှ ကျောင်းသား၊ ကျောင်းသူများကို တွေ့ဆုံခဲ့ကြောင်း သိရသည်။
ထိုသို့ တွေ့ဆုံပြီးနောက် နိုင်ငံတစ်နိုင်ငံ ဖွံ့ဖြိုးတိုးတက်မှု ၏ အခြေခံအုတ်မြစ်သည် ပညာတတ်အရင်းအမြစ်များပေါများခြင်းဖြစ်၍ နိုင်ငံတော်အနေဖြင့် အရည်အသွေးပြည့်ဝသည့် ဘက်စုံပညာရေးစနစ် တိုးတက်ဖြစ်ပေါ်ရေးကို ကြိုးပမ်းဆောင်ရွက်လျက်ရှိကာ အမျိုး သားကာကွယ်ရေးနှင့် လုံခြုံရေးကောင်စီမှလည်း ဦးတည်ချက်ချမှတ်ပြီး ပညာရေးကဏ္ဍတွင် တစ်နိုင်ငံလုံးအတိုင်းအတာအနေဖြင့် ဖွံ့ဖြိုးတိုးတက်အောင် ဆောင်ရွက်လျက်ရှိသည်ဟုပြောကြားခဲ့ကြောင်း သိရသည်။
ထို့ကြောင့် စာသင်ကျောင်းများသည် စာပေသင်ကြားပေးသည့်နေရာသက်သက်မဟုတ်ဘဲ ပညာရေး၏အနှစ်သာရဖြစ်သော အသိဉာဏ်ပညာဆိုင်ရာ ဗဟုသုတများပေးအပ်ခြင်းအပြင် စဉ်းစားတွေးခေါ်နိုင်စွမ်း၊ အမှားအမှန်ခွဲခြားသုံးသပ်နိုင်စွမ်းနှင့် နိုင်ငံသားကျင့်ဝတ်၊ လူမှုကျင့်ဝတ်များကို သင်ကြားပေးနေသည့်နေရာမျိုးဖြစ်ရန်လိုသည်ဟုလည်းပြောကြားခဲ့ကြောင်း သိရသည်။
” မိမိတို့ရဲ့တပည့် ကျောင်းသား၊ ကျောင်းသူတွေက်ု ကျောင်းစည်းကမ်းလိုက်နာခြင်းကအစပြုပြီး ဥပဒေ၊ စည်းမျဉ်း၊ စည်းကမ်းတွေကို လေးစားလိုက်နာတတ်တဲ့ နိုင်ငံကြီးသား အလေ့အကျင့်ကောင်းတွေ ကိန်းအောင်းလာအောင် လေ့ကျင့်ပျိုးထောင်ပေးကြရပါမယ်”ဟု ယာယီသမ္မတက ပြောသည်။
မြန်မာနိုင်ငံသည် တိုင်းရင်းသားလူမျိုးပေါင်းစုံနှင့် ဖွဲ့ စည်းထားသည့်နိုင်ငံဖြစ်၍ တိုင်းရင်းသားများအားလုံး စည်းလုံးညီညွတ်ရေးသည် နိုင်ငံအေးချမ်းတည်ငြိမ်မှုနှင့် အချုပ်အခြာအာဏာတည်တံ့ခိုင်မြဲနေစေရေးအတွက် အသက်တမျှအရေးကြီးပြီး နိုင်ငံဖွံ့ဖြိုးတိုးတက်ရေးအတွက်ကြီးမားသည့် မောင်းနှင်အားတစ်ရပ်ဖြစ်ရာ နိုင်ငံတော်တည်ငြိမ်အေးချမ်းရေးနှင့် တရားဥပဒေ စိုးမိုးရေးအတွက် တိုင်းရင်းသားပြည်သူအားလုံးမှ ညီညီညွတ်ညွတ်စည်းစည်းလုံးလုံးဖြင့် အတူတကွပူး ပေါင်းဆောင်ရွက်ရမည်ဟုပြောကြားခဲ့ကြောင်း သိရသည်။
ထို့ပြင် နိုင်ငံအတွင်းနေထိုင်ကြသည့် နိုင်ငံသူ၊ နိုင်ငံသားအားလုံး၏ စည်းလုံးညီညွတ်မှု၊ တပ်မတော်နှင့် ပြည်သူတစ်ရပ်လုံး စည်းလုံးညီညွတ်မှုတို့ကိုမဖြစ်မနေတည်ဆောက်ရမည်ဖြစ်ကာ စည်းလုံးညီညွတ်ခြင်းသည် နိုင်ငံ့အင်အားကိုတောင့်တင်းခိုင်မာစေပြီး ဖွံ့ဖြိုးတိုးတက်မှုနှင့် နိုင်ငံ့အကျိုးစီးပွားကိုဖြစ်ထွန်းစေ၍ တိုင်းပြည်ကိုပြည်တွင်းအင်အားနှင့်သာတည်ဆောက်ကြရမည်ဟုလည်းပြောကြားခဲ့ကြောင်း သိရသည်။
ထို့နောက် ယာယီသမ္မတအား ကျောင်းသား၊ ကျောင်း သူ(၂)ဦးက အမှတ်တရလက်ဆောင်ပစ္စည်းကို ဂါရဝပြုပေးအပ်ပြီး ယာယီသမ္မတမှ ကျောင်းသား၊ ကျောင်းသူများကို တစ်ဦးချင်းရင်းရင်းနှီးနှီးနှုတ်ဆက်အားပေးခဲ့ကြောင်း သိရသည်။